LIVE TV
ജീവിതത്തിലെ പ്രതിസന്ധിഘട്ടങ്ങളിൽ ഒപ്പം നിന്നവരെയും കൈവിട്ട് പോയവരെയും കുറിച്ച് സംസാരിച്ച് ഭാവന. കുടുംബവും സുഹൃത്തുക്കളും പോലെ തന്നെ പ്രേക്ഷകരും തനിക്കൊപ്പം നിന്നെന്ന് ഭാവന പറഞ്ഞു. അതേസമയം, കൂടെ നിൽക്കുമെന്ന് കരുതിയ ചിലരാണ് കേസിന്റെ സമയത്ത് മൊഴി മാറ്റിയതെന്നും നടി പറഞ്ഞു.
പുതിയ ചിത്രമായ അനോമിയുടെ പ്രൊമോഷന്റെ ഭാഗമായി എഡിറ്റോറിയൽ എന്ന യൂട്യൂബ് ചാനലിന് നൽകിയ അഭിമുഖത്തിനിടെയാണ് ഭാവന ഇക്കാര്യങ്ങൾ സംസാരിച്ചത്. കേസിന്റെ സമയത്ത് കൂടെ നിൽക്കുമെന്ന കരുതിയവരിൽ ഒപ്പം നിൽക്കാത്തവരും അപ്രതീക്ഷിതമായി കൂടെ നിന്നവരും ഉണ്ടായിരുന്നോ എന്നായിരുന്നു അവതാരകന്റെ ചോദ്യം. അതിന് മറുപടിയായി, കൂടെ ആരെങ്കിലും ഉണ്ടാകുമെന്ന് ആലോചിച്ചിട്ടില്ല ഇത്തരം കാര്യങ്ങളിൽ തീരുമാനം എടുക്കുന്നതെന്നും കേസുമായി പോയതെന്നും ഭാവന മറുപടി നൽകി.
'ഇങ്ങനെയൊരു തീരുമാനം എടുക്കുമ്പോൾ ആരൊക്കെ കൂടെയുണ്ടാകും, കൂടെയുണ്ടാകില്ല എന്തൊക്കെ ഇനി സംഭവിക്കും തുടങ്ങി ഒന്നിനെ കുറിച്ചും നമ്മൾ ആലോചിക്കില്ല. കൂടെ നിന്നവരിൽ എനിക്ക് വളരെ അടുത്ത് നിൽക്കുന്നവരുണ്ട്. അധികം പരിചയമില്ലാത്തവർ നൽകുന്ന പിന്തുണ കണ്ട് അത്ഭുതപ്പെട്ടിട്ടുണ്ട്. അതൊക്കെ കാണുമ്പോൾ വികാരാധീനയായി പോകാറുണ്ട്. കൂടെ നിൽക്കുമെന്ന് കരുതിയിട്ട് കൂടെ നിൽക്കാത്തത് മൊഴിമാറ്റിയ ചില സാക്ഷികളെന്ന് പറയാം. ആരുടെയും പേര് പറയാൻ ഞാൻ ആഗ്രഹിക്കുന്നില്ല. ഇപ്പോൾ ആലോചിക്കുമ്പോൾ അവരൊന്നും മൊഴിമാറ്റിയതിൽ എനിക്ക് വലിയ ഞെട്ടലൊന്നുമില്ല. അത് അവരുടെ തീരുമാനമായിരുന്നു,' ഭാവന പറഞ്ഞു.
പ്രേക്ഷകർ നൽകുന്ന പിന്തുണയെ കുറിച്ചും ഭാവന അഭിമുഖത്തിൽ വാചാലയായി. നേരിട്ട പരിചയമില്ലാത്ത നിരവധി പേർ തനിക്ക് വലിയ പിന്തുണ നൽകുന്നുണ്ടെന്നും അവരോടുള്ള നന്ദി വാക്കുകളിൽ ഒതുക്കാനാകില്ലെന്നും ഭാവന പറഞ്ഞു. പ്രേക്ഷകരുടെ സ്നേഹം അനുഭവിക്കാനായത് തന്റെ ഭാഗ്യമാണെന്നും നടി കൂട്ടിച്ചേർത്തു.
'എന്റെ സിനിമകളോ അഭിമുഖങ്ങളോ കണ്ട് എന്നെ ഇഷ്ടപ്പെടുന്നവർ ഒരുപാട് പേരുണ്ട്. അവരോടുള്ള നന്ദി എനിക്ക് വാക്കുകളിൽ ഒതുക്കാനാകില്ല. എന്റെ ജീവിതം തന്നെ അവരോട് കടപ്പെട്ടിരിക്കുന്നു. അവർ നൽകുന്ന നിബന്ധനകളില്ലാത്ത സ്നേഹത്തിന് എങ്ങനെയാണ് നന്ദി പറയുക. എന്റെ കുടുംബവും സുഹൃത്തുക്കളും എത്രത്തോളം പ്രിയപ്പെട്ടതാണ് അതുപോലെ തന്നെയാണ് പിന്തുണക്കുന്ന പ്രേക്ഷകരും. പരിചയമില്ലാത്ത ഒരാൾ വന്ന് 'ഞങ്ങൾ ഒപ്പമുണ്ട്, പ്രാർത്ഥിക്കാം, സ്ട്രോങ്ങായിരിക്കൂ' എന്നെല്ലാം പറയുമ്പോൾ അത് എനിക്ക് നൽകുന്ന വലിയ ശക്തിയുണ്ട്. വാക്കുകൾ കൊണ്ട് ആ സ്നേഹത്തിന് നന്ദി പറയാൻ എനിക്കാകില്ല എങ്കിലും താങ്ക്യു എന്ന് പറയുകയല്ലാതെ എനിക്ക് മറ്റൊന്നും ചെയ്യാനാകില്ല. പക്ഷെ എന്റെ ഉള്ളിലുള്ള സ്നേഹം അതിനേക്കാൾ എത്രയോ മടങ്ങ് കൂടുതലാണ്,' ഭാവന പറഞ്ഞു.
അതേസമയം, ഫെബ്രുവരി ആറിനാണ് അനോമി തിയേറ്ററുകളിലെത്തുന്നത്. ടി സീരീസ് പനോരമ സ്റ്റുഡിയോസ് എന്നിവർ ചേർന്ന് ആദ്യമായി മലയാളത്തിൽ എത്തിക്കുന്ന ചിത്രമാണ് അനോമി. സയൻസ് ഫിക്ഷൻ മിസ്റ്ററി ത്രില്ലർ ഗണത്തിൽപ്പെടുന്ന ചിത്രത്തിന്റെ ഫസ്റ്റ് ലുക്ക്, സെക്കന്റ് ലുക്ക് പോസ്റ്ററുകൾ സോഷ്യൽ മീഡിയയിൽ വൈറലായിരുന്നു. റഹ്മാൻ, വിഷ്ണു അഗസ്ത്യ, ബിനു പപ്പു, ഷെബിൻ ബെൻസൺ, അർജുൻ ലാൽ, ദൃശ്യ രഘുനാഥ് തുടങ്ങിയവരും ചിത്രത്തിൽ നിർണ്ണായക വേഷങ്ങൾ ചെയ്യുന്നുണ്ട്.
Content Highlights: Bhavana talks about witnesses becaming hostile in the case and adds she is not shocked about their decisions now
