Get the latest news at
your fingertips!
Download our app now
LIVE TV
Search
ദളപതി വിജയ്‌യെ നായകനാക്കി എച്ച് വിനോദ് സംവിധാനം ചെയ്യുന്ന ചിത്രമാണ് ജനനായകൻ. ഒരു കൊമേർഷ്യൽ എന്റർടൈനർ ആയി പുറത്തിറങ്ങുന്ന സിനിമ ഇതിനോടകം തന്നെ ചർച്ചകളിൽ ഇടം പിടിച്ചിട്ടുണ്ട്. രാഷ്ട്രീയ പ്രവേശനത്തിന് മുന്നോടിയായി വിജയ് അഭിനയിക്കുന്ന അവസാന ചിത്രമാണിത്. സിനിമയിലെ ആദ്യ ഗാനം കഴിഞ്ഞ ദിവസം പുറത്തുവന്നിരുന്നു. എന്നാൽ പ്രതീക്ഷകൾക്ക് വിപരീതമായി വളരെ കുറവ് വ്യൂസ് ആണ് ഗാനത്തിന് ലഭിക്കുന്നതെന്ന റിപ്പോർട്ടുകൾ ആണ് പുറത്തുവരുന്നത്.
'ദളപതി കച്ചേരി' എന്നാണ് ഗാനത്തിന്റെ പേര്. പുറത്തിറങ്ങി 24 മണിക്കൂർ കഴിയുമ്പോൾ വെറും 14 മില്യൺ വ്യൂസ് മാത്രമാണ് ഗാനത്തിന് നേടാനായത് എന്നാണ് ഒരു തെലുങ്ക് മീഡിയ റിപ്പോർട്ട് ചെയ്യുന്നത്. അതേസമയം, കഴിഞ്ഞ വിജയ് ചിത്രമായ ദി ഗോട്ടിലെ 'വിസിൽ പോഡ്' എന്ന ഗാനം 24 മണിക്കൂറിൽ നേടിയത് 24 മില്യൺ വ്യൂസ് ആണ്. പതിവ് പോലെ 'ദളപതി കച്ചേരി'ക്ക് ആരാധകരെ പ്രീതിപ്പടുത്താൻ കഴിഞ്ഞില്ലെന്നാണ് റിപ്പോർട്ട്. എന്നാൽ ഗാനത്തിന് ഒരു വിഭാഗം പ്രേക്ഷകരിൽ നിന്ന് വലിയ സ്വീകാര്യത ലഭിക്കുന്നുണ്ട്. അനിരുദ്ധ് പ്രതീക്ഷകൾക്കൊത്ത് ഉയർന്നില്ലെങ്കിലും വിജയ്‌യുടെ പ്രെസെൻസ് കൊണ്ട് ഗാനം നന്നായി മാറി എന്നാണ് കമന്റുകൾ. നിലവിൽ ഗാനത്തിന് യൂട്യൂബിൽ 35 മില്യൺ വ്യൂസ് ആണുള്ളത്.
അതേസമയം, ഗാനം പുറത്തുവന്നതിന് പിന്നാലെ വലിയ വിമർശനങ്ങളും ഉയരുന്നുണ്ട്. ഗാനത്തിന്റെ വരികളിൽ ഇടക്കിടെ 'ദളപതി' എന്ന വാക്ക് വരുന്നുണ്ട്. ഇതാണ് പ്രേക്ഷകരെ ചൊടിപ്പിച്ചിരിക്കുന്നത്. വിജയ്‌യെ സിനിമയിൽ ദളപതി എന്നാണ് ആരാധകർ വിളിക്കുന്നത്. എന്നാൽ ഇടക്കിടെ ഗാനത്തിന്റെ വരികൾക്കിടയിൽ ദളപതി എന്ന് ഉപയോഗിക്കുന്നത് അരോചകമായി അനുഭവപ്പെടുന്നു എന്നാണ് കമന്റുകൾ. രജനി, ഷാരൂഖ് ഖാൻ, ചിരഞ്ജീവി ചിത്രങ്ങളിലെ ഗാനങ്ങൾക്കും ഇതേ പരാതി പ്രേക്ഷകർ ഉന്നയിക്കുന്നുണ്ട്. രജനി സിനിമകളിൽ എല്ലാം തലൈവർ, സൂപ്പർസ്റ്റാർ എന്നീ ടാഗുകൾ ഗാനങ്ങളിൽ ഉപയോഗിക്കുന്നുണ്ട്. ഇതും കുറച്ചു നാളുകളായി പ്രേക്ഷകർ ശ്രദ്ധയിൽപ്പെടുത്തുന്നുണ്ട്.
ജനനായകൻ ബാലയ്യ ചിത്രമായ ഭഗവന്ത് കേസരിയുടെ റീമേക്ക് ആണെന്ന സംശയങ്ങൾ ആരാധകർക്കിടയിൽ ശക്തമാകുകയാണ്. രണ്ട് കാരണമാണ് വിജയ് ചിത്രം ഭഗവന്ത് കേസരിയുടെ റീമേക്ക് തന്നെയെന്ന് ഉറപ്പിക്കുന്നതെന്ന് പലരും സോഷ്യൽ മീഡിയയിൽ കുറിക്കുന്നു. ജനനായകനിലെ ഗാനത്തിന് സമാനമായ ഒരു ഗാനം ബാലയ്യ ചിത്രത്തിലും ഉണ്ടെന്നും അതിൽ സിനിമയിലെ പ്രധാന കഥാപാത്രങ്ങളായ ബാലയ്യയും ശ്രീലീലയും കാജൽ അഗർവാളും പ്രത്യക്ഷപ്പെടുന്നുണ്ടെന്നും കണ്ടെത്തിയിരിക്കുകയാണ് വിജയ് ഫാൻസ്‌. ജനനായകനിലെ ഗാനത്തിലും വിജയ്‌ക്കൊപ്പം പൂജയും മമിതയും പ്രത്യക്ഷപ്പെടുന്നുണ്ട്.
മമിത കഴുത്തിൽ അണിഞ്ഞിരിക്കുന്ന മാലയാണ് റീമേക്ക് എന്ന് ഉറപ്പിക്കാനുള്ള മറ്റൊരു കാരണം. ഭഗവന്ത് കേസരിയിൽ ശ്രീലീലയുടെ കഥാപാത്രം ഒരു ലോക്കറ്റ് ധരിച്ചിട്ടുണ്ട്. ഇതിന് സമാനമായ ഒരു ലോക്കറ്റ് ജനനായകനിലെ ഗാനത്തിൽ മമിതയും ധരിച്ചിട്ടുണ്ടെന്ന് കണ്ടെത്തിയിരിക്കുകയാണ് ആരാധകർ. ഇതോടെയാണ് ചിത്രം റീമേക്ക് ആണെന്ന് ഉറപ്പിച്ചത്. നിരവധി പേർ ഇതിൽ നിരാശ പ്രകടിപ്പിച്ച് രംഗത്തെത്തുന്നുണ്ട്.
Content Highlights: Jananayagan song gets shockingly low views
