LIVE TV
മലയാള സിനിമയുടെ ചരിത്രം തിരുത്തിയെഴുതുകയാണ് ഡൊമിനിക് അരുൺ ചിത്രം ലോക. 275 കോടി രൂപ ആഗോളതലത്തിൽ കളക്ഷൻ നേടിയ ഇൻഡസ്ട്രി ഹിറ്റ് ചിത്രം എന്ന ലേബൽ ഇനി ലോകയ്ക്ക് സ്വന്തം. സിനിമയുടെ രണ്ടാം ഭാഗത്തിന്റെ വരവ് അറിയിച്ചുകൊണ്ടുള്ള വീഡിയോ അണിയറപ്രവർത്തകർ നേരത്തെ പങ്കുവെച്ചിരുന്നു. ഇപ്പോഴിതാ സിനിമയുടെ ടൈറ്റിലിലെ ബ്രില്യൻസ് കണ്ടുപിടിച്ചിരിക്കുകയാണ് സോഷ്യൽ മീഡിയ.
ടൊവിനോ അവതരിപ്പിക്കുന്ന ചാത്തനെ മുൻനിർത്തിയാണ് രണ്ടാം ഭാഗത്തിന്റെ കഥപറയുന്നത്. ആദ്യ ഭാഗത്തിൽ കത്തിയായിരുന്നു കല്യാണിയുടെ നീലിയുടെ ആയുധമെങ്കിൽ രണ്ടാം ഭാഗത്തിൽ കാർഡുകൾ ആണ് ടൊവിനോയുടെ ചാത്തന്റെ ആയുധം. ഈ കാർഡുകൾ ഉൾപ്പെടുത്തിയാണ് രണ്ടാം ഭാഗത്തിന്റെ ടൈറ്റിൽ നിർമിച്ചിരിക്കുന്നത്. ടൈറ്റിലിലെ ഒ,കെ,എച്ച് എന്നീ അക്ഷരങ്ങളിൽ കാർഡുകൾ ഒളിപ്പിച്ചിട്ടുണ്ട്. ഇതാണ് ഇപ്പോൾ ആരാധകർ കണ്ടുപിടിച്ചിരിക്കുന്നത്. അതേസമയം, ആദ്യ ഭാഗത്തിന്റെ ടൈറ്റിൽ ശ്രദ്ധിച്ചാൽ ഒ,കെ എന്നീ അക്ഷരങ്ങളുടെ ഇടയിൽ ഒരു കത്തി ഒളിപ്പിച്ചിട്ടുണ്ട്. ആദ്യ ഭാഗം മഞ്ഞ കളർ ആണ് ടൈറ്റിലിനായി ഉപയോഗിച്ചിരിക്കുന്നതെങ്കിൽ രണ്ടാം ഭാഗത്തിന് അത് ചുവപ്പ് നിറമാണ്. ആദ്യ ഭാഗത്തേക്കാൾ വയലന്റ് ആകുമോ രണ്ടാം ഭാഗമെന്നാണ് ആരാധകർ ചോദിക്കുന്നത്.
സിനിമയുടെ രണ്ടാം ഭാഗം ചാത്തന്റെ വരവ് ആയിരിക്കുമെന്ന് നേരത്തെ തന്നെ അണിയറപ്രവർത്തകർ അറിയിച്ചിരുന്നു. എന്നാൽ ചാത്തൻ അല്ല ചാത്തന്റെ ചേട്ടനാണ് വരുന്നത്. ഇവർ തമ്മിലുള്ള ഏറ്റുമുട്ടലാണ് ചിത്രമെന്ന സൂചനയാണ് വീഡിയോ നൽകുന്നത്. ടൊവിനോയ്ക്ക് ഒപ്പം ദുൽഖർ സൽമാനും വിഡിയോയിൽ ഉണ്ട്. മികച്ച വരവേൽപ്പാണ് വിഡിയോയ്ക്ക് സോഷ്യൽ മീഡിയയിൽ ലഭിക്കുന്നത്. ചാത്തന് ശേഷം ദുൽഖറിന്റെ ഓടിയന്റെ കഥയാകും എത്തുന്ന എന്ന സൂചനയും നൽകുന്നുണ്ട്.
ചന്ദ്രയുടെ ആയുധം (#Lokah) കത്തി ആയിരുന്നു... ചാത്തൻ മൈക്കിളിൻ്റെ ആയുധം കാർഡ്സ് ആണ്....!!!
— Leo Messi (@leomessi9622) September 27, 2025
ഒരേ കാർഡിൽ രണ്ട് ചിഹ്നങ്ങൾ കാണിക്കാനും ചാത്തന് കഴിയും... H ശ്രദ്ധിക്കൂ. മാജിക്കിൻ്റെ മാന്ത്രികവലയത്തിലാവും ചാത്തന്മാരുടെ വരവ്...!!!#LokahChapter2 pic.twitter.com/mxRbrrkDn1
ഓണം റിലീസായി എത്തിയ ചിത്രം 24 ദിവസം കൊണ്ടാണ് ചിത്രം മലയാളത്തിലെ ഓൾ ടൈം റെക്കോർഡ് ആഗോള ഗ്രോസർ ആയി മാറിയത്. കള്ളിയങ്കാട്ട് നീലിയുടെ ഐതിഹ്യ കഥയിൽ നിന്ന് പ്രചോദനം ഉൾക്കൊണ്ട് ഡൊമിനിക് അരുൺ രചിച്ച് സംവിധാനം ചെയ്ത ചിത്രത്തിൽ കല്യാണി പ്രിയദർശൻ, നസ്‌ലെൻ എന്നിവരാണ് പ്രധാന കഥാപാത്രങ്ങളെ അവതരിപ്പിച്ചത്. അഞ്ച് ഭാഗങ്ങൾ ഉള്ള ഒരു വമ്പൻ ഫാന്റസി സിനിമാറ്റിക് യൂണിവേഴ്‌സിലെ ആദ്യ ഭാഗമായി എത്തിയ ഈ ബിഗ് ബഡ്ജറ്റ് ചിത്രത്തിൽ ചന്തു സലിംകുമാർ, അരുൺ കുര്യൻ, ശരത് സഭ, നിഷാന്ത് സാഗർ, വിജയരാഘവൻ എന്നിവരും തിളങ്ങിയിട്ടുണ്ട്. ഇവർക്കൊപ്പം ദുൽഖർ സൽമാൻ, ടോവിനോ തോമസ്, സണ്ണി വെയ്ൻ എന്നിവരുടെ ത്രസിപ്പിക്കുന്ന അതിഥി വേഷവും ശ്രദ്ധ നേടി.
Content Highlights: Lokah title design brilliance goes viral
