Get the latest news at
your fingertips!
Download our app now
LIVE TV
Search
ശിവകാർത്തികേയനെ നായകനാക്കി എ ആർ മുരുഗദോസ് സംവിധാനം ചെയ്യുന്ന സിനിമയാണ് മദ്രാസി. ചിത്രത്തിന്‍റെ ട്രെയ്‌ലർ കഴിഞ്ഞദിവസം അണിയറപ്രവർത്തകർ പുറത്തുവിട്ടു. മികച്ച പ്രതികരണമാണ് ട്രെയ്‌ലറിന് ലഭിക്കുന്നത്. ഇപ്പോഴിതാ സിനിമയുടെ പ്രമോഷൻ പരിപാടിയിൽ നടൻ പറഞ്ഞ വാക്കുകളാണ് ശ്രദ്ധ നേടുന്നത്. ഗോട്ട് എന്ന സിനിമയ്ക്ക് ശേഷം വിജയ്‌യുടെ സ്ഥാനത്തേക്ക് എത്താൻ പോകുന്നത് ശിവകാർത്തികേയൻ ആകുമെന്ന തരത്തിൽ സോഷ്യൽ മിഡിയയിൽ പോസ്റ്റുകൾ നിറഞ്ഞിരുന്നു.
ഗോട്ടിലെ ഒരു സീനായിരുന്നു ഇതിന് കാരണം. വിജയ് രാഷ്ട്രീയ പ്രവേശനം പ്രഖ്യാപിച്ചത് ശേഷമുള്ള ചിത്രമായിരുന്നു ഗോട്ട്. സിനിമയിൽ ഒരു നിർണായക ഘട്ടത്തിൽ തോക്ക് വിജയ് ശിവകർത്തികേയൻ കൈമാറുന്ന സീൻ വൈറലായിരുന്നു. ഈ സിനിമയ്ക്ക് ശേഷം ഇറങ്ങിയ ശിവകാർത്തികേയന്റെ അമരൻ ബോക്സ് ഓഫീസ് ഹിറ്റ് അടിക്കുകയൂം ചെയ്തിരുന്നു. എന്നാൽ താൻ ഒരിക്കലും വിജയ്‌യുടെ സ്ഥാനം ആഗ്രഹിച്ചിട്ടില്ലെന്ന് പറയുകയാണ് ശിവകാർത്തികേയൻ. അദ്ദേഹം എപ്പോഴും 'അണ്ണൻ' മാത്രമാണെന്നും താൻ അദ്ദേഹത്തിന്റെ അനിയൻ ആണെന്നും ശിവകാർത്തികേയൻ പറഞ്ഞു.
'ഗോട്ട് എന്ന ചിത്രത്തിൽ വിജയ് സർ എനിക്ക് തോക്ക് തന്ന രംഗത്തെ ഒരുപാട് പേർ പ്രശംസിക്കുന്നുണ്ട്. അതേസമയം, അത് ട്രോളുകൾക്കും ചർച്ചകൾക്കും വഴിവെച്ചിട്ടുണ്ട്. എന്നെ 'അടുത്ത ദളപതി', 'കുട്ടി ദളപതി', 'ധിടീർ ദളപതി' എന്നൊക്കെ ചിത്രീകരിക്കുന്നു എന്ന് ചിലർ വിമർശിച്ചു. പക്ഷേ ഞാൻ അങ്ങനെയൊന്നും ചെയ്യാൻ ശ്രമിച്ചിട്ടില്ല. എന്നെ സംബന്ധിച്ചിടത്തോളം അദ്ദേഹം എപ്പോഴും 'അണ്ണൻ' മാത്രമാണ്, ഞാൻ എപ്പോഴും അദ്ദേഹത്തിൻ്റെ 'തമ്പിയും' ആണ്. അദ്ദേഹത്തിന് ശേഷം ആ സ്ഥാനത്തേക്ക് വരണം എന്ന് വിചാരിക്കുന്ന ആളല്ല ഞാൻ. ആ നിമിഷം എനിക്കൊരു നല്ല അനുഭവം എന്നതിലുപരി മറ്റൊന്നുമല്ല.
SK about Thupakki#MadharaasiAudioLaunch #Sivakarthikeyan #TVKVijay pic.twitter.com/00HacAAemT
— VishGo (@GobiVishnu) August 24, 2025
എനിക്ക് അദ്ദേഹത്തിന്റെ ഫാൻസിനെ സ്വന്തമാക്കണമെന്ന ചിന്തയുണ്ട് എന്ന തരത്തിലുള്ള ട്രോളുകൾ ഉണ്ട്, ആർക്കും ആരുടേയും ഫാൻസിനെ വശത്താക്കാനൊന്നും സാധിക്കില്ല. ആരാധകർ ഒരു പവർ ആണ്. വിജയ് സാർ അവസാന ചിത്രം ചെയുന്നു അത് കഴിഞ്ഞു പെതുസേവനം നടത്തുന്നു എന്ന് പറഞ്ഞപ്പോൾ അദ്ദേഹത്തിന്റെ ഫാൻസും കൂടെ പോകുകയാണ് ചെയ്തുരിക്കുന്നത്,' ശിവകാർത്തികേയൻ പറഞ്ഞു.
അതേസമയം, ശിവകാർത്തികേയന്റെ ഇതുവരെ കാണാത്ത പവർ ഫുൾ പെർഫോമൻസ് ആണ് മദ്രാസി ട്രെയ്‌ലറിൽ ഒരുക്കിയിരിക്കുന്നത്. ചിത്രത്തിൽ മലയാളികളുടെ പ്രിയപ്പെട്ട താരം ബിജു മേനോനും പ്രധാന കേന്ദ്ര കഥാപാത്രമായി എത്തുന്നുണ്ട്. പൊലീസ് വേഷത്തിലാണ് ബിജു മേനോൻ സിനിമയിൽ എത്തുന്നത്. ട്രെയിലറിലെ അനിരുദ്ധിന്റെ ബാക്ക്ഗ്രൗണ്ട് സ്കോറിന് മികച്ച അഭിപ്രായമാണ് ലഭിക്കുന്നത്. റൊമാൻസ് മാത്രമായിരിക്കില്ല ചിത്രം ഗംഭീര ആക്ഷനും ഉറപ്പ് നൽകുന്നുണ്ട്. വിദ്യുത് ജംവാൾ ആണ് സിനിമയിൽ വില്ലൻ വേഷത്തിലെത്തുന്നത്.
'തുപ്പാക്കി' എന്ന ഹിറ്റ് വിജയ് ചിത്രത്തിന് ശേഷം വിദ്യുതും എ ആർ മുരുഗദോസും വീണ്ടും ഒന്നിക്കുന്ന സിനിമയാണ് മദ്രാസി. ശിവകാർത്തികേയൻ്റെ കരിയറിലെ ഏറ്റവും ഉയർന്ന ബജറ്റിലാണ് സിനിമയൊരുങ്ങുന്നത്. ഇത് ആദ്യമായാണ് എ ആർ മുരുഗദോസ്സ് സംവിധാനം ചെയ്യുന്ന ചിത്രത്തിൽ ശിവകാർത്തികേയൻ അഭിനയിക്കുന്നത്. വിദ്യുത് ജംവാള്‍, വിക്രാന്ത്, രുക്മിണി വസന്ത് എന്നിവരാണ് ചിത്രത്തിലെ മറ്റു പ്രധാന താരങ്ങൾ. ചിത്രം സെപ്റ്റംബർ അഞ്ചിന് തിയേറ്ററുകളിലെത്തും.
Content Highlights: sivakarthikeyan about vijay
