LIVE TV
മുംബൈ: ഇന്ത്യയിലെ സാധാരണക്കാരന്റെ ദൈനംദിന ജീവിതത്തെയും മൊബൈൽ ഇന്റർനെറ്റ് ശീലങ്ങളെയും മാറ്റിമറിച്ച റിലയൻസ് ജിയോയുടെ പിറവിക്ക് പിന്നിലെ രഹസ്യം വെളിപ്പെടുത്തി ഇഷ അംബാനി. ഇന്നത്തെ ഇന്ത്യയിലെ വൻകിട ഡിജിറ്റൽ സാമ്രാജ്യത്തിന്റെ തുടക്കം ഒരു കോളേജ് അസൈൻമെന്റ് സമർപ്പിക്കാൻ കഴിയാതെ പോയതിലുള്ള ഇഷയുടെ പരാതിയില്‍ നിന്നായിരുന്നുവെന്നാണ് അവർ വെളിപ്പെടുത്തുന്നത്.
അമേരിക്കന്‍ സർവകലാശാലയിലെ പഠനകാലത്ത് അവധിക്കായി വീട്ടിലെത്തിയ ഇഷാ അംബാനിക്ക് മോശം ഇന്റർനെറ്റ് കണക്ഷൻ മൂലം കോഴ്‌സ് വർക്ക് കൃത്യസമയത്ത് സമർപ്പിക്കാൻ സാധിച്ചില്ല. ഈ നിരാശ ഇഷ പിതാവ് മുകേഷ് അംബാനിയോട് പങ്കുവെച്ചു. രാജ്യത്തെ ഏറ്റവും വലിയ വ്യവസായ കുടുംബങ്ങളിലൊന്നിൽ പോലും അതിവേഗ ഇന്റർനെറ്റ് ലഭ്യമല്ലെങ്കിൽ, സാധാരണക്കാരായ ഇന്ത്യൻ ജനതയുടെ അവസ്ഥ എന്തായിരിക്കും എന്ന വലിയൊരു ചിന്തയിലേക്കാണ് ഈ സംഭവം മുകേഷ് അംബാനിയെ എത്തിച്ചത്.
തുടർന്ന് നടന്ന ചർച്ചയിൽ, ടെലികോം മേഖല ഇനി വോയ്‌സ് കോളുകളിലല്ല, മറിച്ച് ഡാറ്റയിലും ഇന്റർനെറ്റ് സേവനങ്ങളിലുമാണ് ശ്രദ്ധ കേന്ദ്രീകരിക്കേണ്ടതെന്ന് മകൻ ആകാശ് അംബാനി ചൂണ്ടിക്കാട്ടി. ഇത് ഇന്ത്യയുടെ ഡിജിറ്റൽ വിടവ് നികത്താനുള്ള പുതിയൊരു പദ്ധതിക്ക് വഴിതുറന്നു. പഴയ വോയ്‌സ് നെറ്റ്‌വർക്കുകളെ നവീകരിക്കുന്നതിന് പകരം, പൂർണ്ണമായും ഡാറ്റാ അധിഷ്ഠിതമായ ഒരു 4G LTE നെറ്റ്‌വർക്ക് അടിത്തറ മുതൽ നിർമ്മിക്കാൻ റിലയൻസ് തീരുമാനിച്ചു. അങ്ങനെ 2011-ൽ പ്രവർത്തനങ്ങൾ തുടങ്ങി, 2016 സെപ്റ്റംബറിൽ റിലയൻസ് ജിയോ ഔദ്യോഗികമായി സേവനം ആരംഭിച്ചു.
തുടക്കത്തിൽ സൗജന്യ വോയ്‌സ് കോളുകളും കുറഞ്ഞ നിരക്കിലുള്ള അതിവേഗ ഡാറ്റയും നൽകിയുള്ള ജിയോയുടെ കടന്നുവരവ് ഇന്ത്യൻ ടെലികോം മേഖലയിൽ വലിയ തരംഗമാണ് സൃഷ്ടിച്ചത്. ഇന്റർനെറ്റിനെ ഒരു ആഡംബരത്തിൽ നിന്ന് സാധാരണക്കാരന്റെ അവകാശമാക്കി മാറ്റാൻ ഇതിലൂടെ സാധിച്ചു. വെറുമൊരു കണക്റ്റിവിറ്റി ദാതാവ് എന്നതിൽ നിന്ന് എന്റർടൈൻമെന്റ്, കൊമേഴ്‌സ്, ഫിനാൻഷ്യൽ സർവീസസ് തുടങ്ങിയ വിശാലമായ മേഖലകളിലേക്ക് ജിയോ പടർന്നുപന്തലിച്ചു. 2022 ജൂണിൽ റിലയൻസ് ജിയോ ഇൻഫോകോമിന്റെ ചെയർമാനായി ആകാശ് അംബാനി ചുമതലയേറ്റു.
ഒരു വീട്ടിലെ വേഗത കുറഞ്ഞ ഇന്റർനെറ്റിനെക്കുറിച്ചുള്ള സംഭാഷണത്തിൽ നിന്ന് തുടങ്ങിയ ആ യാത്ര ഇന്ന് 53.33 കോടി (533.3 ദശലക്ഷം) ഉപഭോക്താക്കളുള്ള രാജ്യത്തെ ഏറ്റവും വലിയ ഡിജിറ്റൽ സാങ്കേതിക ശൃംഖലയായി പടർന്നു കഴിഞ്ഞു.
Content Highlights: Isha Ambani has revealed that Jio’s origins can be traced to an incident around 2009–10, when she was unable to submit a college assignment online because of poor internet connectivity in Mumbai. The experience prompted discussions with her brother, Akash Ambani, about India’s digital infrastructure. Their conversations helped shape the idea of building a digital technology platform, leading to Jio’s launch in 2016.
