LIVE TV
തമിഴ്നാട് മുഖ്യമന്ത്രി സി. ജോസഫ് വിജയ്യുടെ നേതൃത്വത്തിൽ യുകെയിൽ തുടരുന്ന ഔദ്യോഗിക സന്ദർശനത്തിൽ സംസ്ഥാനത്തിന് വൻ നിക്ഷേപ വാഗ്ദാനങ്ങൾ ലഭിച്ചു. ആഗോള വാഹന ഉൽപ്പാദന വിതരണ ശൃംഖലയിലെ പ്രമുഖരായ സമവർധന മദർസൺ ഇന്റർനാഷണൽ ലിമിറ്റഡ് തമിഴ്നാട്ടിൽ 11,000 കോടി രൂപയുടെ നിക്ഷേപം നടത്താൻ ഔദ്യോഗികമായി കരാറൊപ്പിട്ടു. ലണ്ടനിൽ തിങ്കളാഴ്ച നടന്ന ചടങ്ങിൽ തമിഴ്നാട് മുഖ്യമന്ത്രി സി. ജോസഫ് വിജയ്യുടെ സാന്നിധ്യത്തിലാണ് കമ്പനിയും തമിഴ്നാട് സർക്കാരിന്റെ നിക്ഷേപക പ്രോത്സാഹന ഏജൻസിയായ 'ഗൈഡൻസും' തമ്മിൽ ധാരണാപത്രം കൈമാറിയത്.
ഈ വൻകിട പദ്ധതിയിലൂടെ തമിഴ്നാട്ടിൽ ഡിസൈൻ, എഞ്ചിനീയറിംഗ്, മാനുഫാക്ചറിംഗ്, അസംബ്ലിംഗ്, ലോജിസ്റ്റിക്സ് തുടങ്ങിയ വിവിധ മേഖലകളിലായി ഏതാണ്ട് 7,000 ആളുകൾക്ക് പുതിയ തൊഴിലവസരങ്ങൾ സൃഷ്ടിക്കപ്പെടുമെന്ന് സർക്കാർ ഔദ്യോഗിക പ്രസ്താവനയിലൂടെ അറിയിച്ചു. സമവർധന മദർസൺ ഗ്രൂപ്പിന്റെ ഗ്ലോബൽ മാർക്കറ്റിംഗ് ആൻഡ് കമ്മ്യൂണിക്കേഷൻസ് ഹെഡ് ബാരി പെയിന്ററും തമിഴ്നാട് ഗൈഡൻസ് മാനേജിംഗ് ഡയറക്ടർ ദീപക് ജേക്കബ് ഐഎഎസും ചേർന്നാണ് കരാറിൽ ഒപ്പുവെച്ചത്. ചടങ്ങിൽ യുണൈറ്റഡ് കിംഗ്ഡത്തിലെ ഇന്ത്യൻ ഹൈക്കമ്മീഷണർ കുമരൻ പെരിയസാമിയും തമിഴ്നാട് സർക്കാരിലെ മറ്റ് മുതിർന്ന ഉദ്യോഗസ്ഥരും പങ്കെടുത്തു.
സമവർധന മദർസൺ ഗ്രൂപ്പിന് പുറമെ മറ്റ് പ്രമുഖ ആഗോള കമ്പനികളും തമിഴ്നാട്ടിലേക്ക് നിക്ഷേപവുമായി രംഗത്തെത്തിയിട്ടുണ്ട്. പ്രമുഖ കൺസൾട്ടൻസി സ്ഥാപനമായ ഇ വൈ തങ്ങളുടെ ഒരു ക്ലയന്റിന് വേണ്ടി തമിഴ്നാട്ടിൽ ഒരു ഗ്ലോബൽ കേപ്പബിലിറ്റി സെന്റർ ആരംഭിക്കുന്നതിനായി 1,000 കോടി രൂപയുടെ നിക്ഷേപം വാഗ്ദാനം ചെയ്തിട്ടുണ്ട്. ഇത് വഴി ഐടി-അധിഷ്ഠിത മേഖലയിൽ രണ്ടായിരത്തിലധികം ഉയർന്ന മൂല്യമുള്ള പുതിയ തൊഴിലവസരങ്ങൾ സൃഷ്ടിക്കപ്പെടുമെന്നാണ് പ്രതീക്ഷിക്കുന്നത്. അതോടൊപ്പം പ്രമുഖ സാങ്കേതിക വിദ്യ കമ്പനിയായ സിഗ്മ ടെക്നോളജി ഗ്രൂപ്പും തമിഴ്നാട്ടിൽ തങ്ങളുടെ പ്രവർത്തനം വിപുലീകരിക്കാൻ താല്പര്യം പ്രകടിപ്പിച്ചിട്ടുണ്ട്.
തമിഴ്നാട് വ്യവസായ വകുപ്പ് പുറത്തുവിട്ട പ്രസ്താവന പ്രകാരം, പരമ്പരാഗത ഉൽപ്പാദന മേഖലകളെയും അത്യാധുനിക സാങ്കേതിക വിദ്യകളെയും ഒരുപോലെ സമന്വയിപ്പിച്ചു കൊണ്ടുള്ളതാണ് പുതിയ നിക്ഷേപങ്ങൾ. ആഗോള വിപണിയിലെ വിതരണ ശൃംഖലയുമായി തമിഴ്നാടിനെ കൂടുതൽ അടുപ്പിക്കുന്നതിനും സംസ്ഥാനത്തെ യുവാക്കൾക്ക് ഗുണമേന്മയുള്ള മികച്ച തൊഴിലവസരങ്ങൾ ലഭ്യമാക്കുന്നതിനും മുഖ്യമന്ത്രിയുടെ ഈ ലണ്ടൻ സന്ദർശനം വലിയ രീതിയിൽ ഗുണം ചെയ്യുമെന്നും സർക്കാർ വ്യക്തമാക്കുന്നു.
Content highlights:Samvardhana Motherson International has signed an agreement to invest ₹11,000 crore in Tamil Nadu. The project is expected to create around 7,000 jobs across design, engineering, manufacturing, assembly and logistics. EY has proposed a ₹1,000 crore investment to establish a Global Capability Centre for a client.
