LIVE TV
അന്താരാഷ്ട്ര വിമാനക്കമ്പനികള്ക്കുള്ള ഇന്ധനവില പൊതുമേഖലാ എണ്ണക്കമ്പനികള് 5 ശതമാനം വര്ധിപ്പിച്ചു. ഇതോടെ വിദേശത്തേക്കുള്ള വിമാന യാത്രകളുടെ ചെലവ് വര്ധിക്കാനുള്ള സാധ്യത തെളിയുകയാണ്. ആഗോള വിപണിയിലെ എണ്ണവിലയിലുണ്ടായ വ്യതിയാനങ്ങളെ തുടര്ന്നാണ് ഈ മാറ്റം. തുടര്ച്ചയായ രണ്ടാം മാസമാണ് വിമാന ഇന്ധനത്തിന് വില വര്ധിപ്പിക്കുന്നത്. വിദേശ വിമാനക്കമ്പനികള്ക്കും അന്താരാഷ്ട്ര സര്വീസുകള്ക്കും മാത്രമാണ് വിലവര്ധന ബാധകമാകുക. ആഭ്യന്തര വിമാനക്കമ്പനികള്ക്കുള്ള ഇന്ധന വിലയില് മാറ്റമില്ല.
ഡല്ഹിയില് അന്താരാഷ്ട്ര വിമാനക്കമ്പനികള്ക്കുള്ള ഇന്ധനവില കിലോലിറ്ററിന് 76.55 ഡോളറാണ് വര്ധിപ്പിച്ചത്. പുതിയ നിരക്ക് കിലോലിറ്ററിന് 1,511.86 ഡോളറാണ്. ഇന്ത്യയിലെ ഏറ്റവും തിരക്കേറിയ വിമാനത്താവളമുള്ള ഡല്ഹിയിലെ നിരക്കാണ് ഇന്ധന വില നിര്ണയത്തിനുള്ള മാനദണ്ഡമായി കണക്കാക്കുന്നത്. ഏപ്രില് ഒന്നിന് ആഭ്യന്തര വിമാനക്കമ്പനികള്ക്കുള്ള ഇന്ധനവിലയില് 25 ശതമാനം വര്ധന വരുത്തിയിരുന്നു. അന്ന് വില കിലോലിറ്ററിന് 1,04,927.18 രൂപയായാണ് ഉയര്ന്നത്. അടുത്ത കാലത്തുണ്ടായ ഏറ്റവും വലിയ വര്ധനകളില് ഒന്നായിരുന്നു അത്.
ഇന്ത്യയില് വിമാന ഇന്ധന വില നിയന്ത്രണം എടുത്തുകളഞ്ഞിട്ട് രണ്ട് പതിറ്റാണ്ടിലേറെയായി. വിമാനക്കമ്പനികളും എണ്ണ വിതരണ കമ്പനികളും തമ്മിലുള്ള ധാരണ പ്രകാരം അന്താരാഷ്ട്ര വിപണിയിലെ വിലയ്ക്ക് അനുസരിച്ചാണ് നിരക്കുകള് നിശ്ചയിക്കുന്നത്. പശ്ചിമേഷ്യന് പ്രതിസന്ധിയെ തുടര്ന്ന് ആഗോള ഊര്ജ്ജ വിപണിയിലുണ്ടായ മാറ്റങ്ങള് ഇന്ധനച്ചെലവ് വര്ധിപ്പിച്ചു. ഈ ആഘാതം മുഴുവനായി ഒരേസമയം നല്കാതെ ഘട്ടംഘട്ടമായി വില കൂട്ടാനാണ് സര്ക്കാരും എണ്ണക്കമ്പനികളും തീരുമാനിച്ചിരിക്കുന്നതെന്ന് റിപ്പോര്ട്ടുണ്ട്.
അന്താരാഷ്ട്ര വിമാനക്കമ്പനികളില് നിന്നും വിദേശ സര്വീസുകളില് നിന്നും വിപണി നിരക്ക് ഈടാക്കും. എന്നാല്, ഇന്ത്യന് വിമാനക്കമ്പനികളുടെ ബാധ്യത കുറയ്ക്കുന്നതിനായി ആഭ്യന്തര സര്വീസുകള്ക്കുള്ള ഇന്ധന വില നിയന്ത്രിച്ചു നിര്ത്തുകയാണ്. വിമാനക്കമ്പനികളുടെ പ്രവര്ത്തനച്ചെലവില് ഏറ്റവും വലിയ പങ്കും ഇന്ധനത്തിനായാണ് ചെലവാകുന്നത്. ഇന്ധനവിലയിലുണ്ടാകുന്ന ഏത് മാറ്റവും ചെലവിനെ നേരിട്ട് ബാധിക്കും. ഇതോടെ വരും ദിവസങ്ങളില് വിദേശ രാജ്യങ്ങളിലേക്കുള്ള വിമാന ടിക്കറ്റ് നിരക്കുകളില് വര്ധന പ്രതീക്ഷിക്കാം.
ഇന്ത്യന് ഓയില് കോര്പ്പറേഷന് ഉള്പ്പെടെയുള്ള പൊതുമേഖലാ എണ്ണക്കമ്പനികളാണ് ഓരോ മാസവും ആഗോള പ്രവണതകള് വിലയിരുത്തി വിമാന ഇന്ധന നിരക്കുകള് പുതുക്കുന്നത്. ഈ നീക്കത്തിലൂടെ അന്താരാഷ്ട്ര സര്വീസുകള്ക്ക് തുടര്ച്ചയായ രണ്ടാം മാസവും ചെലവ് വര്ധിച്ചപ്പോള്, ആഭ്യന്തര സര്വീസുകള്ക്ക് വില നിയന്ത്രണത്തിലൂടെ ആശ്വാസം ലഭിക്കുന്നു.
Content Highlights: The price of Aviation Turbine Fuel (ATF), or jet fuel, for international airlines was raised by 5 per cent on Friday. This is the second straight monthly increase. State-owned oil firms revised the rates as global energy prices remain elevated. However, the increase applies only to foreign carriers and international operations. There is no change in ATF prices for domestic airlines.
