LIVE TV
ന്യൂഡല്ഹി: ഇന്ധന വില വര്ധിപ്പിച്ച് നയാര എനര്ജി. പെട്രോള് ലിറ്ററിന് 5.30 രൂപയും ഡീസലിന് ലിറ്റര് 3 രൂപയുമാണ് വര്ധിപ്പിച്ചത്. ഇന്ത്യയിലെ ഏറ്റവും വലിയ സ്വകാര്യ ഇന്ധന റീട്ടെയിലറാണ് നയാര എനര്ജി. പശ്ചിമേഷ്യന് സംഘര്ഷത്തിന്റെ പശ്ചാത്തലത്തിലാണ് നടപടി.
അതേസമയം, ഇന്ധനക്ഷാമം സംബന്ധിച്ച ആശങ്കകള്ക്കിടയില് പല സംസ്ഥാനങ്ങളിലെ പമ്പുകളിലേക്കും ഇന്ധനം നിറയ്ക്കാനായി ആളുകള് ഒഴുകിയെത്തുകയാണ്. രാജ്യത്ത് പെട്രോള്, ഡീസല്, എല്പിജി എന്നിവയ്ക്ക് ക്ഷാമമുണ്ടെന്ന തരത്തില് പ്രചരിക്കുന്ന വാര്ത്തകള് അടിസ്ഥാനരഹിതമാണെന്ന് പൊതുമേഖലാ എണ്ണക്കമ്പനികള് നേരത്തെ തന്നെ മുന്നറിയിപ്പ് നല്കിയിരുന്നു. ഇന്ത്യന് ഓയില്, ഭാരത് പെട്രോളിയം, ഹിന്ദുസ്ഥാന് പെട്രോളിയം എന്നിവരുടേതാണ് അറിയിപ്പ്.
സോഷ്യല് മീഡിയയില് പ്രചരിക്കുന്ന വ്യാജവാര്ത്തകള് ജനങ്ങളെ പരിഭ്രാന്തരാക്കുന്ന പശ്ചാത്തലത്തിലാണ് കമ്പനികള് ഔദ്യോഗിക വിശദീകരണവുമായി രംഗത്തെത്തിയത്. രാജ്യത്തുടനീളം ഇന്ധന വിതരണം തടസ്സമില്ലാതെ നടക്കുന്നുണ്ടെന്നും എല്ലാ പെട്രോള് പമ്പുകളിലും ആവശ്യത്തിന് സ്റ്റോക്ക് ലഭ്യമാണെന്നും കമ്പനികള് വ്യക്തമാക്കി.
Content Highlights:Petrol, diesel prices hiked by Nayara Energy across India
