കല്പ്പറ്റ: സംസ്ഥാനത്ത് ഒരിടവേളയ്ക്ക് ശേഷം മഴ കനക്കുന്നു. മഴ ശക്തമാകുന്ന സാഹചര്യത്തില് വിവിധ ജില്ലകളില് നാളെ വിദ്യാഭ്യാസ സ്ഥാപനങ്ങള്ക്ക് അവധി പ്രഖ്യാപിച്ചു. വയനാട്, എറണാകുളം, കാസര്കോട്, ആലപ്പുഴ, കോട്ടയം ജില്ലകളിലാണ് സ്കൂളുകള്ക്ക് അവധി പ്രഖ്യാപിച്ചിരിക്കുന്നത്. കോഴിക്കോട് ജില്ലയില് താമരശ്ശേരി, വടകര താലൂക്കുകളിലെ വിദ്യാഭ്യാസ സ്ഥാപനങ്ങള്ക്കും അവധി പ്രഖ്യാപിച്ചു.
ഓറഞ്ച് അലേര്ട്ടിന്റെ പശ്ചാത്തലത്തിലാണ് നാല് ജില്ലകളില് സ്കൂളുകള്ക്ക് അവധി പ്രഖ്യാപിച്ചിരിക്കുന്നത്. കോഴിക്കോട് ജില്ലയിലും ഓറഞ്ച് അലേര്ട്ട് ആണെങ്കിലും രണ്ട് താലൂക്കുകളില് മാത്രമാണ് അവധി. വയനാട് ജില്ലയില് അങ്കണവാടികള്, മത പഠന ക്ലാസുകള്, ട്യൂഷന് സെന്ററുകള്, സ്പെഷ്യല് ക്ലാസുകള്, പ്രൊഫഷണല് കോളേജുകള് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും അവധിയായിരിക്കുമെന്ന് ജില്ലാ കളക്ടര് അറിയിച്ചു. റസിഡന്ഷ്യല് സ്കൂള്, റസിഡന്ഷ്യല് കോളേജുകള് എന്നിവയ്ക്ക് അവധി ബാധകമല്ല. എറണാകുളം, കാസര്കോട്, ആലപ്പുഴ ജില്ലകളിലും സമാനമായാണ് അവധി.
ആറ് ജില്ലകള്ക്ക് പുറമേ അഞ്ച് ജില്ലകളിലും നാളെ ഓറഞ്ച് അലേര്ട്ടാണ് പ്രഖ്യാപിച്ചിരിക്കുന്നത്. തിരുവനന്തപുരം, കൊല്ലം, പത്തനംതിട്ട, ഇടുക്കി, കണ്ണൂര് ജില്ലകളിലാണ് നാളെ ഓറഞ്ച് അലേര്ട്ട് പ്രഖ്യാപിച്ചിരിക്കുന്നത്. തൃശൂര്, പാലക്കാട്, മലപ്പുറം ജില്ലകളില് നാളെ യെല്ലോ അലേര്ട്ടാണ്.
ശനിയാഴ്ച (01-08-2026) ഒമ്പത് ജില്ലകളില് ഓറഞ്ച് അലേര്ട്ടും അഞ്ച് ജില്ലകളില് യെല്ലോ അലേര്ട്ടുമാണ്. പത്തനംതിട്ട, കോട്ടയം, ഇടുക്കി, എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, വയനാട് ഓറഞ്ച് അലേര്ട്ട്. തിരുവനന്തപുരം, കൊല്ലം, ആലപ്പുഴ, കണ്ണൂര്, കാസര്കോട് ജില്ലകളിലാണ് യെല്ലോ അലേര്ട്ട്. ഞായറാഴ്ച (02-08-2026) പത്തനംതിട്ട, കോട്ടയം, ഇടുക്കി, എറണാകുളം, കോഴിക്കോട്, വയനാട്, കണ്ണൂര്, കാസര്കോട് ജില്ലകളില് യെല്ലോ അലേര്ട്ടും പ്രഖ്യാപിച്ചിട്ടുണ്ട്.
പൊതുജനങ്ങള്ക്കുള്ള ജാഗ്രത നിര്ദേശം
- ഉരുള്പൊട്ടല്, മണ്ണിടിച്ചില്, മലവെള്ളപ്പാച്ചില് സാധ്യതയുള്ള പ്രദേശങ്ങളില് താമസിക്കുന്നവര് അധികൃതരുടെ നിര്ദ്ദേശാനുസരണം സുരക്ഷിതമായ സ്ഥലങ്ങളിലേക്ക് മാറി താമസിക്കണം.
- നദിക്കരകള്, അണക്കെട്ടുകളുടെ കീഴ്പ്രദേശങ്ങള് എന്നിവിടങ്ങളില് താമസിക്കുന്നവരും അപകടസാധ്യത മുന്കൂട്ടി കണ്ട് അധികൃതരുടെ നിര്ദേശാനുസരണം മാറി താമസിക്കേണ്ടതാണ്.
- ദുരന്തസാധ്യത പ്രദേശങ്ങളില് താമസിക്കുന്നവര് നിര്ബന്ധമായും തങ്ങളുടെ പ്രദേശത്ത് ക്യാമ്പുകള് തുറന്നു എന്നുറപ്പാക്കേണ്ടതും പകല് സമയത്ത് തന്നെ അങ്ങോട്ട് മാറി താമസിക്കേണ്ടതുമാണ്. ഇതിനായി തദ്ദേശ സ്ഥാപന, റവന്യൂ അധികാരികളുമായി ബന്ധപ്പെടാവുന്നതാണ്.
- ശക്തമായ കാറ്റിന് സാധ്യതയുള്ളതിനാല് അടച്ചുറപ്പില്ലാത്ത വീടുകളില് താമസിക്കുന്നവരും മേല്ക്കൂര ശക്തമല്ലാത്ത വീടുകളില് താമസിക്കുന്നവരും പ്രത്യേക ജാഗ്രത പാലിക്കേണ്ടതാണ്. അപകടാവസ്ഥ മുന്നില് കാണുന്നവര് അധികൃതരുമായി ബന്ധപ്പെട്ട് സുരക്ഷിതമായ സ്ഥലങ്ങളിലേക്ക് സുരക്ഷാ മുന്കരുതലിന്റെ ഭാഗമായി മാറി താമസിക്കണം.
- കാറ്റില് മരങ്ങള് കടപുഴകി വീണും പോസ്റ്റുകള് തകര്ന്നു വീണും ഉണ്ടാകാനിടയുള്ള അപകടങ്ങളെയും ശ്രദ്ധിക്കേണ്ടതാണ്. സംസ്ഥാന ദുരന്ത നിവാരണ അതോറിറ്റി പുറപ്പെടുവിച്ച ശക്തമായ കാറ്റില് സ്വീകരിക്കേണ്ട മുന്കരുതല് നടപടികള് /windwarning/ എന്ന ലിങ്കില് ലഭ്യമാണ്
- ശക്തമായ മഴ പെയ്യുന്ന സാഹചര്യത്തില് ഒരു കാരണവശാലും നദികള് മുറിച്ചു കടക്കാനോ, നദികളിലോ മറ്റ് ജലാശയങ്ങളിലോ കുളിക്കാനോ മീന്പിടിക്കാനോ മറ്റ് ആവശ്യങ്ങള്ക്കോ ഇറങ്ങാന് പാടുള്ളതല്ല.
- ജലാശയങ്ങള്ക്ക് മുകളിലെ മേല്പ്പാലങ്ങളില് കയറി കാഴ്ച കാണുകയോ സെല്ഫി എടുക്കുകയോ ചിത്രങ്ങള് പകര്ത്തുകയോ കൂട്ടം കൂടി നില്ക്കുകയോ ചെയ്യാന് പാടുള്ളതല്ല.
- മഴ ശക്തമാകുന്ന അവസരങ്ങളില് അത്യാവശ്യമല്ലാത്ത യാത്രകള് പൂര്ണമായും ഒഴിവാക്കുക. വെള്ളച്ചാട്ടങ്ങള്, ജലാശയങ്ങള്, മലയോര മേഖലകള് എന്നിവിടങ്ങളിലേക്കുള്ള വിനോദയാത്രകള് മഴ മുന്നറിയിപ്പ് മാറുന്നത് വരെ പൂര്ണമായി ഒഴിവാക്കേണ്ടതാണ്.
- ജലാശയങ്ങളോട് ചേര്ന്ന റോഡുകളിലൂടെയുള്ള യാത്രകളില് പ്രത്യേക ജാഗ്രത പാലിക്കുക. അറ്റകുറ്റപ്പണികള് നടക്കുന്ന റോഡുകളിലും ജാഗ്രത പാലിക്കുക. അതിശക്തമായ മഴയുണ്ടാകുന്ന സാഹചര്യത്തില് റോഡപകടങ്ങള് വര്ധിക്കാന് സാധ്യത മുന്നില് കാണണം. ജലാശയങ്ങള് കരകവിഞ്ഞ് ഒഴുകുന്നയിടങ്ങളില് വാഹനം ഓടിക്കാന് ശ്രമിക്കരുത്.
- സ്വകാര്യ പൊതു ഇടങ്ങളില് അപകടാവസ്ഥയില് നില്ക്കുന്ന മരങ്ങള്/പോസ്റ്റുകള്/ബോര്ഡുകള്, മതിലുകള് തുടങ്ങിയവ സുരക്ഷിതമാക്കേണ്ടതും മരങ്ങള് കോതി ഒതുക്കുകയും ചെയ്യേണ്ടതാണ്. അപകടാവസ്ഥകള് അധികൃതരുടെ ശ്രദ്ധയില് പെടുത്തേണ്ടതാണ്.
- ദുരന്ത സാധ്യത മേഖലയിലുള്ളവര് ഒരു എമര്ജന്സി കിറ്റ് അടിയന്തരമായി തയ്യാറാക്കി വെയ്ക്കേണ്ടതാണ്. കിറ്റ് തയ്യാറാക്കുന്നതിനുള്ള നിര്ദേശങ്ങള് /wp-content/uploads/2020/07/Emergency-Kit.pdf എന്ന ലിങ്കില് ലഭിക്കും.
- കേരളത്തിലെ എല്ലാ ജില്ലകളിലും 24*7 മണിക്കൂര് പ്രവര്ത്തിക്കുന്ന താലൂക്ക്, ജില്ലാ കണ്ട്രോള് റൂമുകള് ഉണ്ട്. അപകട സാധ്യത മുന്നില് കാണുന്ന ഘട്ടത്തിലും സഹായങ്ങള്ക്കുമായി 1077,1070 എന്നീ ടോള് ഫ്രീ നമ്പറുകളില് ബന്ധപ്പെടാവുന്നതാണ്.
- ഓറഞ്ച്, മഞ്ഞ അലര്ട്ടുകള് പ്രഖ്യാപിച്ച ജില്ലകളില് എങ്ങനെയാണ് മുന്നൊരുക്കങ്ങള് നടത്തേണ്ടതെന്നും ഏത് തരത്തിലാണ് അലര്ട്ടുകളെ മനസിലാക്കേണ്ടത് എന്നും സംസ്ഥാന ദുരന്ത നിവാരണ അതോറിറ്റിയുടെ ഓറഞ്ച് പുസ്തകം 2026 ല് വിശദീകരിക്കുന്നുണ്ട്. അത് /wp-content/uploads/2026/06/Orange-Book-of-Disaster-Management-2026_WithSECEdits-2026.pdf എന്ന ലിങ്കില് ലഭ്യമാണ്.
- കേന്ദ്ര കാലാവസ്ഥ വകുപ്പ് മുന്നറിയിപ്പില് മാറ്റങ്ങള് വരുത്തുന്നതനുസരിച്ച് അലര്ട്ടുകളില് മാറ്റം വരാവുന്നതാണ്. ദുരന്ത നിവാരണ അതോറിറ്റിയുടെ ഫേസ്ബുക്ക്, ട്വിറ്റര് പേജുകളും പരിശോധിക്കുക.
Content Highlights- Educational institutions in several districts of Kerala will remain closed tomorrow due to heavy rainfall
LIVE TV
