LIVE TV
തിരുവനന്തപുരം: എംപിമാരായ കെ സുധാകരനെയും അടൂര് പ്രകാശിനെയും സന്ദര്ശിച്ച് കെപിസിസി അധ്യക്ഷന് സണ്ണി ജോസഫ്. നേതൃത്വവുമായി അതൃപ്തിയില് കഴിയുന്ന കെ സുധാകരനെ ഡല്ഹിയിലെ ഫ്ളാറ്റിലെത്തിയാണ് സണ്ണി ജോസഫ് കൂടിക്കാഴ്ച്ച നടത്തിയിരിക്കുന്നത്. മത്സര സന്നദ്ധത അറിയിച്ചതിന് പിന്നാലെയാണ് ഇവരെയും സണ്ണി ജോസഫ് കണ്ടത്. കണ്ണൂരില് മത്സരിക്കുമെന്ന് സുധാകരന്റെ പ്രഖ്യാപനത്തോട് ആരും സ്വയം സ്ഥാനാര്ത്ഥിയാകേണ്ട എന്ന താക്കീതായിരുന്നു സണ്ണി ജോസഫ് നല്കിയത്. അനുകൂല നിലപാടില്ലാത്തതിനാല് നേതൃത്വവുമായി ഇടഞ്ഞ് നില്ക്കുകയാണ് കെ സുധാകരന്. എംപിമാര് മത്സരിക്കുന്ന കാര്യത്തില് അന്തിമ തീരുമാനം ഹൈക്കമാന്റിന്റേതാകുമെന്ന് സണ്ണി ജോസഫ് ഇരുവരെയും ധരിപ്പിച്ചതായാണ് സൂചന.
കണ്ണൂരില് മത്സരിക്കാനുള്ള തന്റെ താല്പര്യം സുധാകരന് നേരത്തെ തന്നെ പ്രകടിപ്പിച്ചിരുന്നു. കോണ്ഗ്രസ് സ്ഥാനാര്ത്ഥി നിര്ണയത്തിനായുള്ള സ്ക്രീനിങ് കമ്മിറ്റി യോഗം ചേരാനിരിക്കെയാണ് സുധാകരന്റെ സ്വയം സ്ഥാനാര്ത്ഥിത്വ പ്രഖ്യാപനം നടന്നത്. കെ സുധാകരന് പകരം ആര് മത്സരിക്കുമെന്നുള്ള ചര്ച്ചകള് നടന്നിട്ടുണ്ടെന്നാണ് റിപ്പോര്ട്ടുകള്. അമൃത രാമകൃഷ്ണന്, ടി ഒ മോഹനന് എന്നിവരുടെ പേരുകളാണ് സ്ഥാനാര്ത്ഥി ചര്ച്ചയില് ഉയര്ന്ന് വന്നത്. എംപിമാരില് സുധാകരന് മാത്രം ഇളവ് നല്കിയാല് കൂടുതല് നേതാക്കള് അവകാശവാദവുമായി രംഗത്തെത്താന് സാധ്യതയുണ്ട്. ഈ സാഹചര്യം കൂടി കണക്കിലെടുത്താണ് സണ്ണി ജോസഫ് അനുനയ ചര്ച്ച നടത്തിയത്.
Content Highlight; Sunny Joseph Meets K. Sudhakaran and Adoor Prakash
