LIVE TV
തിരവനന്തപുരം: ദ കേരള സ്റ്റോറിയുടെ രണ്ടാം ഭാഗം പുറത്തിറക്കാനുള്ള നീക്കത്തിനെതിരെ രൂക്ഷ വിമര്ശനവുമായി മന്ത്രി സജി ചെറിയാന് രംഗത്ത്. വര്ഗീയ ധ്രുവീകരണത്തിലൂടെ കേരളത്തിന്റെ മതനിരപേക്ഷ മനസിനെ മുറിവേല്പ്പിക്കാന് ലക്ഷ്യമിട്ടുള്ള 'ദ കേരള സ്റ്റോറി' എന്ന പ്രൊപ്പഗാണ്ട സിനിമയുടെ രണ്ടാം ഭാഗത്തിന്റെ ടീസര് പുറത്തുവന്നിരിക്കുകയാണെന്നും വസ്തുതകളുമായി യാതൊരു ബന്ധവുമില്ലാത്ത, നുണകള് മാത്രം ഉത്പാദിപ്പിക്കുന്ന സംഘപരിവാര് ഫാക്ടറിയുടെ മറ്റൊരു ഉത്പന്നം മാത്രമാണിതെന്ന് പ്രഥമദൃഷ്ട്യാ തന്നെ വ്യക്തമാണെന്നും മന്ത്രി ഫേസ്ബുക്ക് കുറിപ്പില് പറഞ്ഞു.
മതേതരത്വത്തിന്റെ മാതൃകയായ കേരളത്തെ മതതീവ്രവാദത്തിന്റെ പ്രഭവകേന്ദ്രമായി ചിത്രീകരിച്ച് ലോകത്തിന് മുന്നില് അപമാനിക്കാനാണ് സിനിമയുടെ അണിയറപ്രവര്ത്തകര് വീണ്ടും ശ്രമിക്കുന്നത്. ലവ് ജിഹാദ് പോലുള്ള വ്യാജ ആരോപണങ്ങളെ ആവര്ത്തിച്ചും, വിദ്വേഷം പടര്ത്തുന്ന സംഭാഷണങ്ങളിലൂടെയും കേരളത്തിലെ സമാധാനാന്തരീക്ഷം തകര്ക്കാനുള്ള ഈ നീക്കം ആസൂത്രിതമാണ്. ആവിഷ്കാര സ്വാതന്ത്ര്യം എന്നത് നാടിനെ ധ്രുവീകരിക്കാനോ ജനങ്ങള്ക്കിടയില് ഭിന്നിപ്പുണ്ടാക്കാനോ ഉള്ള ലൈസന്സല്ല. അന്വേഷണ ഏജന്സികളും കോടതികളും തള്ളിക്കളഞ്ഞ വാദങ്ങളെ സത്യമെന്നോണം എഴുന്നള്ളിക്കുന്നത് രാഷ്ട്രീയ ലാഭം മാത്രം ലക്ഷ്യമിട്ടാണ്. വര്ഗീയ വിഷവിത്തുകള് വിതച്ച് നേട്ടം കൊയ്യാനുള്ള ഇത്തരം ശ്രമങ്ങളെ കേരളം ഒറ്റക്കെട്ടായി പ്രതിരോധിക്കുമെന്നും മന്ത്രി പറഞ്ഞു.
ഫേസ്ബുക്ക് പോസ്റ്റിന്റെ പൂര്ണരൂപം
വര്ഗീയ ധ്രുവീകരണത്തിലൂടെ കേരളത്തിന്റെ മതനിരപേക്ഷ മനസ്സിനെ മുറിവേല്പ്പിക്കാന് ലക്ഷ്യമിട്ടുള്ള 'ദ കേരള സ്റ്റോറി' എന്ന പ്രൊപ്പഗാണ്ട സിനിമയുടെ രണ്ടാം ഭാഗത്തിന്റെ ടീസര് പുറത്തുവന്നിരിക്കുകയാണ്. വസ്തുതകളുമായി യാതൊരു ബന്ധവുമില്ലാത്ത, നുണകള് മാത്രം ഉല്പ്പാദിപ്പിക്കുന്ന സംഘപരിവാര് ഫാക്ടറിയുടെ മറ്റൊരു ഉല്പ്പന്നം മാത്രമാണിതെന്ന് പ്രഥമദൃഷ്ട്യാ തന്നെ വ്യക്തമാണ്. മതേതരത്വത്തിന്റെ മാതൃകയായ കേരളത്തെ മതതീവ്രവാദത്തിന്റെ പ്രഭവകേന്ദ്രമായി ചിത്രീകരിച്ച് ലോകത്തിന് മുന്നില് അപമാനിക്കാനാണ് സിനിമയുടെ അണിയറപ്രവര്ത്തകര് വീണ്ടും ശ്രമിക്കുന്നത്. ലവ് ജിഹാദ് പോലുള്ള വ്യാജ ആരോപണങ്ങളെ ആവര്ത്തിച്ചും, വിദ്വേഷം പടര്ത്തുന്ന സംഭാഷണങ്ങളിലൂടെയും കേരളത്തിലെ സമാധാനാന്തരീക്ഷം തകര്ക്കാനുള്ള ഈ നീക്കം ആസൂത്രിതമാണ്. ആവിഷ്കാര സ്വാതന്ത്ര്യം എന്നത് നാടിനെ ധ്രുവീകരിക്കാനോ ജനങ്ങള്ക്കിടയില് ഭിന്നിപ്പുണ്ടാക്കാനോ ഉള്ള ലൈസന്സല്ല. അന്വേഷണ ഏജന്സികളും കോടതികളും തള്ളിക്കളഞ്ഞ വാദങ്ങളെ സത്യമെന്നോണം എഴുന്നള്ളിക്കുന്നത് രാഷ്ട്രീയ ലാഭം മാത്രം ലക്ഷ്യമിട്ടാണ്. വര്ഗീയ വിഷവിത്തുകള് വിതച്ച് നേട്ടം കൊയ്യാനുള്ള ഇത്തരം ശ്രമങ്ങളെ കേരളം ഒറ്റക്കെട്ടായി പ്രതിരോധിക്കും.
സുദീപ്തോ സെന് സംവിധാനം ചെയ്ത ദ കേരള സ്റ്റോറി ഏറെ വിമര്ശനങ്ങള് ഏറ്റുവാങ്ങിയിരുന്നു. ലവ് ജിഹാദ് അടക്കം ഉയര്ത്തി കേരളത്തിന്റെ പ്രതിച്ഛായയെ തകര്ക്കുന്ന രീതിയില് കൃത്യമായ അജണ്ടയോടെയായിരുന്നു ചിത്രം പുറത്തിറക്കിയത്. 2023 മെയിലായിരുന്നു ചിത്രം റിലീസ് ചെയ്തത്. കേരളത്തില് നിയമസഭാ തെരഞ്ഞെടുപ്പ് അടുത്തിരിക്കെ ഫെബ്രുവരി 27നാണ് ദ കേരള സ്റ്റോറി 2 ൻ്റെ റിലീസ് തീരുമാനിച്ചിരിക്കുന്നത്. കമഖ്യ നാരായണ് സിംഗാണ് ചിത്രം സംവിധാനം ചെയ്തിരിക്കുന്നത്. ഉല്ക്ക ഗുപ്ത, അദിതി ഭാട്ട്യ, ഐശ്വര്യ ഓജ എന്നിവരാണ് ചിത്രത്തില് അഭിനയിച്ചിരിക്കുന്നത്.
Content Highlights- Minister Saji Cherian has sharply criticized the plans to release the second part of The Kerala Story.
