LIVE TV
കൊച്ചി: മുനമ്പം ഭൂസംരക്ഷണസമിതിയുടെ ഔദ്യോഗിക വിഭാഗം സമരം അവസാനിപ്പിച്ചു. മന്ത്രിമാരായ കെ രാജനും പി രാജീവും സമരപന്തലിലെത്തി. അതേസമയം വിയോജിപ്പുമായി ഒരു വിഭാഗം സമരം തുടങ്ങി. റവന്യൂ അവകാശങ്ങൾ പൂർണമായും പുനഃസ്ഥാപിക്കണമെന്ന് ആവശ്യപ്പെട്ടാണ് ബിജെപി അനുകൂല വിഭാഗത്തിന്റെ സമരം. സമരം അവസാനിപ്പിക്കുന്നത് വഞ്ചനയാണെന്നും ഇവർ ആരോപിച്ചു.
മുനമ്പത്ത് താമസിക്കുന്നവരുടെ ഭൂനികുതി സ്വീകരിക്കാൻ സംസ്ഥാന സർക്കാരിന് ഹൈക്കോടതി അനുമതി നൽകിയിരുന്നു. വഖഫ് ബോർഡ് അവകാശവാദം ഉന്നയിച്ച ഭൂമിയിലെ താമസക്കാർക്ക് വ്യവസ്ഥകളോടെ ഭൂനികുതി അടയ്ക്കാമെന്നായിരുന്നു ഹൈക്കോടതി ഉത്തരവ്. പിന്നാലെ കുടുംബങ്ങൾക്ക് കരമടയ്ക്കാൻ കഴിഞ്ഞിരുന്നു. ഭൂമിപോക്കുവരവിനും വഴിയൊരുങ്ങി. ഇതിന് പിന്നാലെയാണ് 414 ദിവസമായി തുടരുന്ന മുനമ്പം ഭൂസംരക്ഷണ സമരം അവസാനിപ്പിക്കാൻ സമിതി തീരുമാനിച്ചത്. ഇനി ജുഡീഷ്യൽ കമ്മീഷന്റെ പ്രശ്‌നപരിഹാരവും വഖഫ് ട്രൈബ്യൂണലിന്റെ തീർപ്പിനുമായാണ് മുനമ്പം നിവാസികൾ കാത്തിരിക്കുന്നത്.
സമരം അവസാനിപ്പിക്കുന്നത് താൽക്കാലിക ഇടവേള മാത്രമാണെന്നും പ്രശ്‌നങ്ങൾ ഉണ്ടായാൽ വീണ്ടും സമരം ആരംഭിക്കുമെന്നും മുനമ്പം സമരസമിതി രക്ഷാധികാരി ഫാ ആന്റണി സേവ്യർ പറഞ്ഞു. വഖഫ് ബോർഡ് ആസ്തി പട്ടികയിൽ നിന്ന് ഭൂമി മാറ്റലാണ് ലക്ഷ്യം. ആ ലക്ഷ്യത്തിലേക്കുള്ള യാത്രയുടെ ഇടവേള മാത്രമാണിതെന്നും അദ്ദേഹം പറഞ്ഞു.
സമരം അവസാനിപ്പിക്കുന്നത് ശരിയായ തീരുമാനമെന്ന് മന്ത്രി പി രാജീവ് പറഞ്ഞു. മുനമ്പം പ്രശ്‌നത്തിൽ സർക്കാർ രാഷ്ട്രീയം കാണുന്നില്ല. നിയമപരമായി സാധ്യമാകുന്നതെല്ലാം ചെയ്തു. കയ്യടിക്ക് വേണ്ടിയുള്ള പരിഹാരം അല്ല മുനമ്പത്ത് ചെയ്യാൻ ഉദ്ദേശിച്ചത്. പണം കൊടുത്തു വാങ്ങിവർ നിയമപരമായ അവകാശികൾ എന്നാണ് കാഴ്ചപ്പാട്. മുനമ്പത്തെ സങ്കീർണത മനസ്സിലാക്കി ആണ് ജുഡീഷ്യൽ കമ്മീഷനെ നിയോഗിച്ചത്. ചിലർ രാഷ്ട്രീയ മുതലെടുപ്പിന് ശ്രമിച്ചുവെന്നും മന്ത്രി പറഞ്ഞു.
നികുതി സ്വീകരിക്കാനുള്ള സർക്കാർ തീരുമാനം കോടതി അംഗീകരിച്ചു, കോടതി എതിർക്കാത്തിടത്തോളം പോക്കുവരവിനും തടസ്സമില്ലെന്ന് മന്ത്രി കെ രാജൻ പറഞ്ഞു. കൃത്യമായ നിലപാട് സ്വീകരിച്ചാണ് സർക്കാർ മുന്നോട്ടുപോകുന്നത്. അർഹതപ്പെട്ടവരെ മുനമ്പത്തെ ഭൂമിയിൽ നിന്ന് ഇറക്കിവിടില്ല. മുനമ്പം ജനതയോടൊപ്പമാണ് സർക്കാർ. നിലപാടിൽ അന്നും ഇന്നും മാറ്റമില്ല. കൃത്യതയോടെ കൂടിയുള്ള സമീപനമാണ് സർക്കാർ സ്വീകരിച്ചതെന്നും കെ രാജൻ പറഞ്ഞു.
Content Highlights: munambam land dispute strike ends
