Get the latest news at
your fingertips!
Download our app now
LIVE TV
Search
ന്യൂഡല്‍ഹി: പിഎം ശ്രീയില്‍ പ്രതികരിച്ച് സിപിഐ നേതാവ് പ്രകാശ് ബാബു. സിപിഐഎം ജനറല്‍ സെക്രട്ടറി എം എ ബേബിയുടെ നിസഹായത വിഷമിപ്പിച്ചെന്ന് പ്രകാശ് ബാബു പറഞ്ഞു. സിപിഐ ജനറല്‍ സെക്രട്ടറി ഡി രാജ ഭക്ഷണം പോലും കഴിക്കാതെയാണ് എം എ ബേബിയെ കണ്ടതെന്നും എന്നാല്‍ ഉന്നയിച്ച വിഷയത്തിലെല്ലാം എം എ ബേബിക്ക് മൗനമായിരുന്നുവെന്നും പ്രകാശ് ബാബു കൂട്ടിച്ചേര്‍ത്തു.
'എന്തേലും നിര്‍ദേശം വിദ്യാഭ്യാസ മന്ത്രി വി ശിവന്‍കുട്ടി നല്‍കിയോ എന്നറിയില്ല. പിഎം ശ്രീ ദേശീയ വിദ്യാഭ്യാസ നയം നടത്താനുള്ള കേന്ദ്ര ഉപാധിയാണ്. സിപിഐ എന്ത് തീരുമാനിക്കണം എന്നത് നാളെ സംസ്ഥാന എക്‌സിക്യൂട്ടീവില്‍ തീരുമാനിക്കും. കേരളത്തിലെ സ്‌കൂളുകള്‍ എല്ലാം മികച്ച നിലയിലാണ്. അതുകൊണ്ട് അടിസ്ഥാന വികസനത്തിന്റെ കാര്യം പറഞ്ഞിട്ട് കാര്യമില്ല', പ്രകാശ് ബാബു പറഞ്ഞു.
പിഎം ശ്രീയില്‍ സിപിഐ ഇടഞ്ഞുനില്‍ക്കുന്നതിനിടെ കഴിഞ്ഞ ദിവസം എം എ ബേബിയും ഡി രാജയും കൂടിക്കാഴ്ച നടത്തിയിരുന്നു. ഡല്‍ഹിയില്‍വെച്ചായിരുന്നു കൂടിക്കാഴ്ച. ഇതിന് ശേഷം പിഎം ശ്രീ വിഷയത്തില്‍ കേന്ദ്ര നേതൃത്വം ഇടപെടില്ലെന്നായിരുന്നു എം എ ബേബി പ്രതികരിച്ചത്. സംസ്ഥാന തലത്തില്‍ ചര്‍ച്ച നടത്തി പരിഹാരം കാണട്ടെയെന്നും എം എ ബേബി പറഞ്ഞിരുന്നു. സിപിഐയുടെ ആവശ്യം സിപിഐഎം ദേശീയ നേതൃത്വം ഇടപെടണമെന്നായിരുന്നുവെന്നും സംസ്ഥാന നേതൃത്വം വിഷയത്തില്‍ പരിഹാരം കാണുമെന്നും എം എ ബേബി പറഞ്ഞിരുന്നു.
സര്‍ക്കാര്‍ മുന്നണി മര്യാദകള്‍ ലംഘിച്ചുവെന്നായിരുന്നു കൂടിക്കാഴ്ചയ്ക്ക് ശേഷം ഡി രാജ പ്രതികരിച്ചത്. നടപടി പാര്‍ട്ടി നയത്തിന് വിരുദ്ധമാണെന്നും ഡി രാജ പറഞ്ഞിരുന്നു. എന്‍ഇപി 2020നെ എതിര്‍ക്കുന്ന പാര്‍ട്ടികളാണ് സിപിഐയും സിപിഐഎമ്മും. വിദ്യാഭ്യാസ മേഖലയെ സ്വകാര്യവല്‍ക്കരിക്കുന്നതും കേന്ദ്രീയവല്‍ക്കരിക്കുന്നതും എതിര്‍ക്കുന്നവരാണ് തങ്ങള്‍. എന്‍ഇപിയെ ശക്തമായി എതിര്‍ക്കുന്ന പാര്‍ട്ടി ധാരണപത്രം ഒപ്പിട്ടതിനെ എങ്ങനെ ന്യായീകരിക്കാന്‍ കഴിയുമെന്നും ഡി രാജ ചോദിച്ചിരുന്നു.
Content Highlights: Prakash babu about M A Baby on PM Shri project
