LIVE TV
ജര്മന് ദേശീയ ഫുട്ബോള് ടീമിന്റെ മുഖ്യപരിശീലകനായി ചുമതലയേറ്റതിന് ശേഷമുള്ള ആദ്യ ക്യാമ്പിനായി യൂര്ഗന് ക്ലോപ്പ് പ്രഖ്യാപിച്ചത് 44 അംഗ വന് ടീമിനെ. വ്യാഴാഴ്ച പ്രഖ്യാപിച്ച പട്ടികയില് 16 പുതുമുഖ താരങ്ങളാണ് മുന് ലിവര്പൂള് പരിശീലകനായ ക്ലോപ്പ് അവസരം നല്കിയിരിക്കുന്നത്. സാധാരണയായി മത്സരങ്ങള്ക്ക് 20 ഔട്ട്ഫീല്ഡ് കളിക്കാരെയും മൂന്ന് ഗോള്കീപ്പര്മാരെയുമാണ് ഉള്പ്പെടുത്താറുള്ളതെങ്കിലും, വരാനിരിക്കുന്ന നാല് നേഷന്സ് ലീഗ് മത്സരങ്ങള്ക്കായി ടീമിനെ രണ്ട് വ്യത്യസ്ത ഗ്രൂപ്പുകളായി തിരിക്കാനാണ് ക്ലോപ്പിന്റെ തീരുമാനം.
ആദ്യ ഗ്രൂപ്പിലുള്ള കളിക്കാര് സെപ്റ്റംബര് 24-ന് ആംസ്റ്റര്ഡാമില് നെതര്ലന്ഡ്സിനെതിരെയുമുള്ള മത്സരത്തിലും, മൂന്ന് ദിവസത്തിന് ശേഷം ഓഗ്സ്ബര്ഗില് ഗ്രീസിനെതിരെയുള്ള പോരാട്ടത്തിലും അണിനിരക്കും. രണ്ടാമത്തെ ഗ്രൂപ്പ് ഒക്ടോബര് 1-ന് മ്യൂണിക്കില് സെര്ബിയക്കെതിരെയും ഒക്ടോബര് 4-ന് തെസ്സലോനിക്കിയില് ഗ്രീസിനെതിരെയും കളിക്കും.
2026 ലോകകപ്പില് റൗണ്ട് ഓഫ് 32-ല് പുറത്തായതിനെ തുടര്ന്ന് ജൂലൈയിലാണ് യുലിയന് നാഗല്സ്മാന് പകരക്കാരനായി നാല് തവണ ലോക ചാമ്പ്യന്മാരായ ജര്മനിയുടെ പരിശീലകസ്ഥാനത്തേക്ക് ക്ലോപ്പ് എത്തുന്നത്. ലിറോയ് സാനെ, ഡെനിസ് ഉന്ദാവ്, ലിയോണ് ഗോറെറ്റ്സ്ക, ഗോള്കീപ്പര് ഒലിവര് ബൗമാന് എന്നിവരെ ടീമില് നിന്ന് ഒഴിവാക്കി. വെറ്ററന് താരങ്ങളായ മാനുവല് നോയര്, അന്റോണിയോ റൂഡിഗര് എന്നിവര് അന്താരാഷ്ട്ര ഫുട്ബോളില് നിന്ന് വിരമിച്ച ശേഷമുള്ള ആദ്യ ടീം പ്രഖ്യാപനം കൂടിയാണിത്. മാര്ക്ക്-ആന്ദ്രെ ടെര് സ്റ്റീഗനായിരിക്കും ജര്മ്മനിയുടെ പ്രധാന ഗോള്കീപ്പര്. 114 മത്സരങ്ങളുടെ പരിചയസമ്പത്തുള്ള ബയേണ് മിഡ്ഫീല്ഡര് ജോഷ്വ കിമ്മിച്ച് തന്നെ ടീമിന്റെ ക്യാപ്റ്റനായി തുടരും. 31-കാരനായ കിമ്മിച്ച് റൈറ്റ് ബാക്ക് സ്ഥാനത്ത് നിന്ന് സെന്ട്രല് മിഡ്ഫീല്ഡിലേക്ക് മാറും.
നവാഗതരില് ഐന്ട്രാക്റ്റ് ഫ്രാങ്ക്ഫര്ട്ടിന്റെ യൂനസ് എബ്നൗത്താലിബ്, സ്റ്റുട്ട്ഗാര്ട്ട് ഡിഫെന്ഡര് ഫിന് ജെല്റ്റ്ഷ്, ബ്രെന്റ്ഫോര്ഡ് മിഡ്ഫീല്ഡര് വിറ്റാലി ജാനെല്റ്റ്, സെല്റ്റിക് മിഡ്ഫീല്ഡര് മിക്ക ബോര് എന്നിവര് ഉള്പ്പെടുന്നു.
content highlights: 16 New Faces, 44-Member Massive Squad: Jürgen Klopp Announces His First Germany Team
