LIVE TV
അര്ജന്റീനയുടെ ഫുട്ബോള് ഇതിഹാസം ലയണല് മെസ്സി അന്താരാഷ്ട്ര ഫുട്ബോളില് നിന്ന് വിരമിക്കല് പ്രഖ്യാപിച്ചതിന് പിന്നാലെ, അദ്ദേഹത്തിന്റെ അസാധാരണമായ കരിയറിനെയും ഫുട്ബോള് ലോകത്ത് ഉണ്ടാക്കിയ ശാശ്വതമായ സ്വാധീനത്തെയും പ്രശംസിച്ച് ഫിഫ പ്രസിഡന്റ് ജിയാനി ഇന്ഫാന്റിനോ. തിങ്കളാഴ്ച ഇന്സ്റ്റാഗ്രാമിലൂടെയാണ് മെസ്സി തന്റെ വിരമിക്കല് തീരുമാനം അറിയിച്ചത്. ഓഗസ്റ്റ് 8-ന് അന്തരിച്ച പിതാവ് ഹോര്ഹെ മെസ്സിയുടെ വേര്പാടും ഈ തീരുമാനം കൈക്കൊള്ളുന്നതില് സ്വാധീനം ചെലുത്തിയെന്ന് അദ്ദേഹം വ്യക്തമാക്കിയിരുന്നു.
തുടര്ന്ന് ഇന്സ്റ്റാഗ്രാമില് പങ്കുവെച്ച കുറിപ്പിലൂടെയാണ് ഇന്ഫാന്റിനോ മെസ്സിയുടെ കുപ്പായമഴിക്കുന്ന തീരുമാനത്തോട് പ്രതികരിച്ചത്. 2022 ലോകകപ്പ് വിജയം, അര്ജന്റീനയ്ക്കായി ഏറ്റവും കൂടുതല് മത്സരങ്ങളും ഗോളുകളും നേടിയ താരം എന്നീ നേട്ടങ്ങളെ എടുത്തുപറഞ്ഞ ഇന്ഫാന്റിനോ മെസ്സിയുടെ കളിക്കളത്തിലെ മികവിനെ ആദരിച്ചു. 'കോടിക്കണക്കിന് ആളുകള്ക്ക് പ്രചോദനമാവുകയും ഈ മനോഹരമായ കളിയെ പുനര്നിര്വ്വചിക്കുകയും ചെയ്ത അസാധാരണമായ അന്താരാഷ്ട്ര കരിയറിന് അഭിനന്ദനങ്ങള് ലയണല് മെസ്സി. 2022-ലെ ഫിഫ ലോകകപ്പ് വിജയി, അര്ജന്റീനയ്ക്ക് വേണ്ടി ഏറ്റവും കൂടുതല് മത്സരങ്ങളും ഗോളുകളും നേടിയ താരം, കൂടാതെ ഏറ്റവും കൂടുതല് ഫിഫ ലോകകപ്പ് മത്സരങ്ങള് കളിച്ച ചരിത്രത്തിലെ റെക്കോര്ഡിന് ഉടമ! നിങ്ങളുടെ മാന്ത്രിക കഴിവുകളുംളിളിമയും എന്നും ഓര്മ്മിക്കപ്പെടും' -എന്ന് ഇന്ഫാന്റിനോ കുറിച്ചു.
അര്ജന്റീന ജേഴ്സിയില് അവിസ്മരണീയമായ ഓര്മ്മകള് സമ്മാനിച്ചതിനും ലോകമെമ്പാടുമുള്ള ഫുട്ബോള് ആരാധകരെ ഒന്നിച്ചുചേര്ത്തതിനും അദ്ദേഹം മെസ്സിയോട് നന്ദി പറഞ്ഞു. 'അര്ജന്റീന കുപ്പായത്തില് സമ്മാനിച്ച ഓരോ മറക്കാനാവാത്ത ഓര്മ്മകള്ക്കും, ലോകത്തിന്റെ ഓരോ കോണിലുമുള്ള ആരാധകരെ ഒന്നിപ്പിച്ചതിനും നന്ദി. നിങ്ങളുടെ ജീവിതത്തിലെ അടുത്ത ഘട്ടത്തിന് എല്ലാവിധ ആശംസകളും നേരുന്നു,' ഇന്ഫാന്റിനോ കൂട്ടിച്ചേര്ത്തു. 2026 ഫിഫ ലോകകപ്പ് ഫൈനലില് സ്പെയിനോട് തോറ്റതിന് ഒരു മാസത്തിന് ശേഷമാണ് മെസ്സിയുടെ ഈ പ്രഖ്യാപനം.
ഫൈനല് കഴിഞ്ഞ് രണ്ടു ദിവസത്തിനുശേഷം എഴുതിയതും പിന്നീട് പിതാവിന്റെ വേര്പാടിനുശേഷം അന്തിമമാക്കിയതുമായ പ്രസ്താവനയിലാണ് മെസ്സി തന്റെ വിരമിക്കല് പ്രഖ്യാപിച്ചത്. വലിയ അഭിമാനത്തോടും സമാധാനത്തോടും കൂടിയാണ് ഈ തീരുമാനമെന്നും, പിതാവിന്റെ വിയോഗം അടുത്ത തലമുറയ്ക്ക് വഴിമാറികൊടുക്കാനുള്ള തീരുമാനത്തില് ഉറച്ചുനില്ക്കാന് തന്നെ കൂടുതല് പ്രേരിപ്പിച്ചെന്നും അദ്ദേഹം വ്യക്തമാക്കി. 'ഫൈനലിന് ശേഷമുള്ള ഈ സമയത്തെല്ലാം ഒരുപാട് ആലോചിച്ച ശേഷമാണ് ഞാന് ദേശീയ ടീമില് നിന്ന് വിരമിക്കുകയാണെന്ന കാര്യം എല്ലാവരോടുമായി പറയാന് ആഗ്രഹിക്കുന്നത്. ഉള്ളില് ഇപ്പോഴും വലിയ വിഷമമുണ്ടാക്കുന്ന ഒരു തീരുമാനമാണിത്, എങ്കിലും ഇതാണ് ശരിയായ സമയമെന്ന് ഞാന് മനസ്സിലാക്കുന്നു… ഞങ്ങള് എല്ലാം ജയിച്ച ഈ കഴിഞ്ഞ കുറച്ച് വര്ഷങ്ങളില് മാത്രമല്ല, അതിനുമുമ്പും ഞാന് എപ്പോഴും എന്റെ പരമാവധി നല്കിയിട്ടുണ്ട്. ഈ ജേഴ്സിക്ക് വേണ്ടിയും, നിങ്ങള്ക്ക് സന്തോഷം നല്കുന്നതിനും, ഫുട്ബോളിലൂടെ ഒരു അര്ജന്റീനക്കാരന് എന്ന നിലയില് നിങ്ങളെ അഭിമാനഭരിതരാക്കുന്നതിനും വേണ്ടി ഞാന് എപ്പോഴും പോരാടുകയും എല്ലാം സമര്പ്പിക്കുകയും ചെയ്തിട്ടുണ്ട്' -മെസ്സി പറഞ്ഞു.
'ഇനി അധികം സമയമില്ല, പല അധ്യായങ്ങളും അവസാനിക്കുകയാണ്. ഇത് എന്നെ വളരെ വേദനിപ്പിക്കുന്ന ഒന്നാണ്. ദേശീയ ടീമിന്റെ ഭാഗമാകാന് ഞാന് ആഗ്രഹിച്ചിരുന്നു, സ്നേഹിച്ചിരുന്നു, എപ്പോഴും സ്നേഹിക്കുകയും ചെയ്യും. എന്റെ പക്കലുള്ളതെല്ലാം ഞാന് നല്കി, ഇനി നല്കാന് എന്റെ പക്കല് ഒന്നുമില്ല. കൂടാതെ, ഇവിടെയെത്താന് അര്ഹതയുള്ള പ്രതിഭാധനരായ ധാരാളം ചെറുപ്പക്കാര് വരുന്നുണ്ട്. മനോഹരവും എന്നാല് പ്രയാസകരവുമായ ഈ യാത്രയിലുടനീളം ഒപ്പമുണ്ടായിരുന്നതിന് എന്റെ കുടുംബത്തിന് നന്ദി. നമ്മള് ഒരിക്കല് സ്വപ്നം കണ്ട നിമിഷങ്ങള് സഹതാരങ്ങള്ക്കൊപ്പം നിങ്ങള്ക്ക് നല്കാന് കഴിഞ്ഞു എന്ന സമാധാനത്തോടും അഭിമാനത്തോടും കൂടിയാണ് ഞാന് പടിയിറങ്ങുന്നത്. എന്നെ ഒരു അര്ജന്റീനക്കാരനാക്കിയതിന് ദൈവത്തിന് നന്ദി. വാമോസ് അര്ജന്റീന! ജൂലൈ 21-ന്, ഫൈനല് കഴിഞ്ഞ് രണ്ടു ദിവസത്തിന് ശേഷമാണ് ഞാന് ഈ വാക്കുകള് എഴുതിയത്. ഇന്ന്, എന്റെ അച്ഛന് സംഭവിച്ചതിന് ശേഷം, ഈ തീരുമാനത്തില് ഞാന് മുന്പത്തേക്കാള് കൂടുതല് ഉറച്ചുനില്ക്കുന്നു' -അദ്ദേഹം കൂട്ടിച്ചേര്ത്തു.
അര്ജന്റീനയ്ക്കായി ഏറ്റവും കൂടുതല് മത്സരങ്ങള് (203 മത്സരങ്ങള്) കളിക്കുകയും ഏറ്റവും കൂടുതല് ഗോളുകള് (124 ഗോളുകള്) നേടുകയും ചെയ്ത താരം എന്ന സമാനതകളില്ലാത്ത അന്താരാഷ്ട്ര റെക്കോര്ഡോടെയാണ് മെസ്സി കുപ്പായമഴിക്കുന്നത്. 2006 മുതല് 2026 വരെയുള്ള ആറ് ഫിഫ ലോകകപ്പുകളിലായി 21 ലോകകപ്പ് ഗോളുകള് മെസ്സി നേടിയിട്ടുണ്ട്. ഇതില് 2026 ലോകകപ്പിലെ എട്ട് ഗോളുകളും നാല് അസിസ്റ്റുകളും ഉള്പ്പെടുന്നു. 2021 കോപ്പ അമേരിക്ക, 2022 ഖത്തര് ലോകകപ്പ്, 2024 കോപ്പ അമേരിക്ക എന്നിവയിലേക്ക് അര്ജന്റീനയെ നയിച്ചത് മെസ്സിയായിരുന്നു. അന്താരാഷ്ട്ര ഫുട്ബോളില് നിന്ന് വിരമിച്ചെങ്കിലും, മേജര് ലീഗ് സോക്കര് ക്ലബ്ബായ ഇന്റര് മയാമിക്ക് വേണ്ടി മെസ്സി ക്ലബ് ഫുട്ബോളില് തുടര്ന്ന് കളിക്കും.
content highlights: "Inspired Millions Around the World": FIFA Pays Special Tribute to Lionel Messi
