LIVE TV
സ്പാനിഷ് ലോകകപ്പ് താരം ഫെറാന് ടോറസ് ഇനി പിഎസ്ജിയില്. ബാഴ്സലോണയില് നിന്ന് ചാമ്പ്യന്സ് ലീഗ് ജേതാക്കളായ പാരീസ് സെയ്ന്റ് ജെര്മെയ്നിലേക്ക് തന്റെ ട്രാന്സ്ഫര് നടപടികള് പൂര്ത്തിയാക്കിയതായി ഫ്രഞ്ച് ക്ലബ് സ്ഥിരീകരിച്ചു. 2031 വരെയാണ് പി.എസ്.ജിയുമായി ഫെറാന്റെ കരാര്. ഒമ്പതാം നമ്പര് ജേഴ്സിയിലായിരിക്കും താരം കളത്തിലിറങ്ങുക. 'പാരീസ് സെയ്ന്റ് ജെര്മെയ്ന് പോലൊരു വലിയ ലക്ഷ്യങ്ങളുള്ള ക്ലബ്ബില് പുതിയൊരു അധ്യായം ആരംഭിക്കുന്നതില് എനിക്ക് വലിയ സന്തോഷമുണ്ട്. എന്നെ ടീമിന്റെ ഭാഗമാക്കാന് അവസരം നല്കിയതിന് മാനേജ്മെന്റിന് നന്ദി. പരമാവധി കിരീടങ്ങള് നേടാന് ടീമിനെ സഹായിക്കാനാകുമെന്ന് ഞാന് പ്രതീക്ഷിക്കുന്നു' -ടോറസ് പറഞ്ഞു.
ഏഴാം വയസ്സില് വലെന്സിയ സി.എഫിലൂടെയാണ് ഫെറാന് തന്റെ ഫുട്ബോള് കരിയറിന് തുടക്കമിട്ടത്. തുടര്ന്ന് 2017 ഡിസംബറില് ഈബറിനെതിരെയുള്ള മത്സരത്തിലൂടെ ലാ ലിഗയില് കളിക്കുന്ന ഇരുപത്തൊന്നാം നൂറ്റാണ്ടില് ജനിച്ച ആദ്യ താരമെന്ന നേട്ടത്തോടെ അദ്ദേഹം സീനിയര് ടീമില് അരങ്ങേറ്റം കുറിച്ചു. 2017 മുതല് 2020 വരെയുള്ള മൂന്ന് വര്ഷത്തെ കരിയറില് ക്ലബ്ബിനായി ശ്രദ്ധേയമായ പല റെക്കോര്ഡുകളും താരം സ്വന്തമാക്കി. വലെന്സിയക്കായി 97 മത്സരങ്ങള് കളിച്ച താരം, 19 വര്ഷവും 324 ദിവസവും പ്രായമുള്ളപ്പോള് ക്ലബ് ചരിത്രത്തില് 50 ലീഗ് മത്സരങ്ങള് പൂര്ത്തിയാക്കുന്ന ഏറ്റവും പ്രായം കുറഞ്ഞ താരമായി മാറി. കൂടാതെ ഒരു സ്പാനിഷ് ക്ലബ്ബിനായി ചാമ്പ്യന്സ് ലീഗില് ഗോള് നേടുന്ന ഇരുപത്തൊന്നാം നൂറ്റാണ്ടില് ജനിച്ച ആദ്യ താരവുമായി. 2019-ല് കോപ്പ ഡെല് റേ കിരീടം ഉയര്ത്തിക്കൊണ്ടാണ് അദ്ദേഹം ഒരു പ്രൊഫഷണല് താരമെന്ന നിലയില് തന്റെ ആദ്യ കിരീടം നേടുന്നത്. 2020 മുതല് 2022 വരെയുള്ള രണ്ട് വര്ഷക്കാലം പ്രീമിയര് ലീഗ് വമ്പന്മാരായ മാഞ്ചസ്റ്റര് സിറ്റിക്കൊപ്പമായിരുന്നു കളിച്ചത്. പെപ് ഗ്വാര്ഡിയോളയ്ക്ക് കീഴില് 43 മത്സരങ്ങള് കളിച്ച താരം 16 ഗോളുകളും 4 അസിസ്റ്റുകളും നേടി. 2021-ല് മാഞ്ചസ്റ്റര് സിറ്റിയുടെ പ്രീമിയര് ലീഗ് കിരീടനേട്ടത്തിലും ലീഗ് കപ്പ് വിജയത്തിലും പങ്കാളിയായ താരം യുവേഫ ചാമ്പ്യന്സ് ലീഗ് ഫൈനലിലെത്തിയ സിറ്റി ടീമിന്റെ ഭാഗവുമായിരുന്നു.
2021-22 സീസണിന്റെ ആദ്യ പകുതിയില് മാഞ്ചസ്റ്റര് സിറ്റിക്ക് വേണ്ടി കളിച്ച ശേഷമാണ് ശൈത്യകാല ട്രാന്സ്ഫറില് അദ്ദേഹം എഫ്.സി ബാഴ്സലോണയിലേക്ക് മാറിയത്. 2022 മുതല് 2026 വരെ ബാഴ്സലോണയിലുണ്ടായിരുന്ന താരം, 207 മത്സരങ്ങളില് നിന്ന് 65 ഗോളുകള് നേടി ടീമിന്റെ മുന്നേറ്റ നിരയിലെ നിര്ണായക സാന്നിധ്യമായി മാറി. 2025-ല് റയല് മാഡ്രിഡിനെതിരായ കോപ്പ ഡെല് റേ ഫൈനലില് ടീമിനെ എക്സ്ട്രാ ടൈമിലേക്ക് നയിക്കാന് സഹായിച്ച ഗോളാണ് ബാഴ്സലോണക്കായുള്ള അദ്ദേഹത്തിന്റെ മികച്ച ഗോളുകളിലൊന്ന്. ബാഴ്സലോണയ്ക്കൊപ്പം മൂന്ന് ലാ ലിഗ കിരീടങ്ങളും ഒരു കോപ്പ ഡെല് റേയും രണ്ട് സ്പാനിഷ് സൂപ്പര് കപ്പുകളും ഫെറാന് ടോറസ് സ്വന്തമാക്കിയിട്ടുണ്ട്.
യൂത്ത് ടീം കാലഘട്ടം മുതല് സ്പാനിഷ് ദേശീയ ടീമിലെ നിര്ണായക താരമായിരുന്നു ഫെറാന്. 2017-ല് അണ്ടര്-17 യൂറോപ്യന് ചാമ്പ്യന്ഷിപ്പും 2019-ല് അണ്ടര്-19 യൂറോപ്യന് ചാമ്പ്യന്ഷിപ്പും അദ്ദേഹം കരസ്ഥമാക്കി. പിന്നീട് ദേശീയ സീനിയര് ടീമിലെ സ്ഥിര സാന്നിധ്യമായി മാറിയ താരം ഇതുവരെ 65 അന്താരാഷ്ട്ര മത്സരങ്ങള് കളിച്ചിട്ടുണ്ട്. ഇപ്പോഴത്തെ പിഎസ്ജി പരിശീലകനും അന്നത്തെ സ്പാനിഷ് കോച്ചും ആയിരുന്ന ലൂയിസ് എന്റികെയാണ് 2020-ല് ജര്മ്മനിക്കെതിരായ നേഷന്സ് കപ്പ് മത്സരത്തില് ഫെറാന് സീനിയര് ടീമില് ആദ്യമായി അവസരം നല്കുന്നത്. തുടര്ന്ന് യൂറോ 2020-ലും 2022-ല് ഖത്തറില് നടന്ന ലോകകപ്പിലും താരം പങ്കെടുത്തു. തുടര്ന്നുള്ള വര്ഷങ്ങളില് സ്പെയിന് ദേശീയ ടീമിനൊപ്പം വലിയ വിജയങ്ങളാണ് ഫെറാന് നേടിയത്. ആദ്യം 2023-ല് അവര് നേഷന്സ് ലീഗ് സ്വന്തമാക്കി. പിന്നീട് 2024-ല് ജര്മ്മനിയില് നടന്ന യൂറോകപ്പും നേടി ദേശീയ ടീമിനൊപ്പം തന്റെ ആദ്യ പ്രധാന കിരീടം സ്വന്തമാക്കി. അമേരിക്കയില് നടന്ന ലോകകപ്പില് സ്പെയിന് കിരീടം നേടിയപ്പോള്, വിജയഗോളടിച്ചത് ഫെറാന് ടോറസായിരുന്നു. അര്ജന്റീനയ്ക്കെതിരായ ഫൈനലിന്റെ എക്സ്ട്രാ ടൈമില് മത്സരത്തിലെ ഏക ഗോള് നേടി ഫെറാന് ചരിത്രത്തിലിടം നേടി. ഫൈനലിലെ മാന് ഓഫ് ദി മാച്ച് പുരസ്കാരവും ഫെറാന് ടോറസിനായിരുന്നു.
content highlights: Ferran Torres Leaves Barcelona to Join PSG on Contract Until 2031
