LIVE TV
വനിതാ ഏഷ്യ കപ്പില് വീണ്ടുമൊരു ഇന്ത്യ-പാകിസ്താന് പോരാട്ടം. ഗ്രൂപ്പ് ഘട്ടത്തിലെ രണ്ട് മത്സരങ്ങളും ജയിച്ച് ഇന്ത്യ ഇതിനകം തന്നെ സെമി ഫൈനലില് പ്രവേശിച്ചുകഴിഞ്ഞു. അതിനാല്, പാകിസ്താനെതിരായ മത്സരത്തിലും തങ്ങളുടെ ആധിപത്യം തുടരാനാവും ഹര്മന്പ്രീത് കൗറും സംഘവും ലക്ഷ്യമിടുന്നത്. ഇന്ന് രാത്രി എട്ടുമണിക്ക് ദുബായ് ഇന്റര്നാഷണല് ക്രിക്കറ്റ് സ്റ്റേഡിയത്തിലാണ് മത്സരം. ദുബായില് രാത്രി സമയങ്ങളിലും കടുത്ത ചൂടും ഈര്പ്പവും നിറഞ്ഞ കാലാവസ്ഥയായിരിക്കും. ടോസ് നേടുന്ന ടീമുകള് ചേസിങ് തിരഞ്ഞെടുക്കാനാണ് കൂടുതല് സാധ്യത. ടൂര്ണമെന്റിലെ ആദ്യ ഏഴ് മത്സരങ്ങളില് ആറിലും രണ്ടാമത് ബാറ്റ് ചെയ്ത ടീമുകളാണ് വിജയിച്ചത്. കൂടാതെ, സ്പിന്നര്മാര്ക്ക് കൂടുതല് അനുകൂലമായ പിച്ചാണ് ദുബായിലേത്. വനിതാ ടി20 ഏഷ്യാകപ്പില് ഇരുടീമുകളും ഏറ്റുമുട്ടിയപ്പോള് 5-1 എന്ന മികച്ച റെക്കോര്ഡ് ഇന്ത്യയ്ക്കൊപ്പമാണ്. തങ്ങളുടെ കഴിഞ്ഞ മത്സരങ്ങളില് തായ്ലാന്റിനെയും ഹോങ്കോങ്ങിനെയും തകര്ത്താണ് ഇന്ത്യ വരുന്നത്.
സാധ്യതാ ടീം
ഇന്ത്യ
സ്മൃതി മന്ഥാന, ഷഫാലി വര്മ്മ, പ്രതിക റാവല്, ഹര്മന്പ്രീത് കൗര് (ക്യാപ്റ്റന്), റിച്ച ഘോഷ് (വിക്കറ്റ് കീപ്പര്), ഭാരതി ഫുല്മാലി, ദീപ്തി ശര്മ്മ, പ്രേമ റാവത്ത്, ക്രാന്തി ഗൗഡ്, എന്. ശ്രീ ചരണി, നന്ദനി ശര്മ്മ.
പാകിസ്താന്
മുനീബ അലി (വിക്കറ്റ് കീപ്പര്), ഷവാല് സുല്ഫിക്കര്, ഗുല് ഫെറോസ, ആയിഷ സഫര്, സദഫ് ഷമാസ്, ഫാത്തിമ സന (ക്യാപ്റ്റന്), ഉമ്മെ ഹാനി, ഐമാന് ഫാത്തിമ, തുബ ഹസ്സന്, നഷ്റ സന്ധു, സാദിയ ഇഖ്ബാല്.
'ടീം സെറ്റാണ്' -ദീപ്തി ശര്മ
വനിതാ ഏഷ്യാകപ്പ് ക്രിക്കറ്റില് പാകിസ്താനെതിരായ പോരാട്ടത്തിന് മുന്നോടിയായി ഇന്ത്യന് ഓള്റൗണ്ടര് ദീപ്തി ശര്മ തന്റെ ടീമിനെ അഭിനന്ദിച്ചു. ഇന്ത്യന് ടീം മികച്ച പ്രകടനം പുറത്തെടുക്കുന്നുണ്ടെന്നും ബാറ്റിങ്, ബൗളിങ് വിഭാഗങ്ങളില് സന്തുലിതമാണെന്നും ദീപ്തി ശര്മ്മ പറഞ്ഞു. 'മുഴുവന് ടീമും നന്നായി പ്രകടനം നടത്തുന്നുണ്ട്. ബൗളിങ് യൂണിറ്റായാലും ബാറ്റിങ് യൂണിറ്റായാലും, കഴിഞ്ഞ കളി അടിസ്ഥാനമാക്കി നോക്കിയാല് രണ്ട് വശങ്ങളും സന്തുലിതമാണെന്ന് ഞാന് കരുതുന്നു' ദീപ്തി പറഞ്ഞു. തായ്ലന്ഡിനും ഹോങ്കോങ്ങിനുമെതിരെ യഥാക്രമം 94 റണ്സിനും 137 റണ്സിനും മികച്ച വിജയങ്ങള് നേടി ഗ്രൂപ്പ് എ-യില് ഒന്നാമതെത്തിയ, 2025-ലെ വനിതാ ക്രിക്കറ്റ് ലോകകപ്പ് ചാമ്പ്യന്മാരായ ഇന്ത്യ ഇക്കുറിയിലെ ഏഷ്യാകപ്പില് മികച്ച തുടക്കമാണ് കുറിച്ചത്. ഹോങ്കോങ്ങിനെതിരായ വിജയത്തിനിടെ സ്മൃതി മന്ഥാന വനിതാ ക്രിക്കറ്റിലെ നിരവധി റെക്കോര്ഡുകള് തിരുത്തിയെഴുതുന്നതിനും സാക്ഷ്യം വഹിച്ചു. പാകിസ്താന്റെ ബൗളിങ് യൂണിറ്റ് മികച്ചതാണെന്ന് ദീപ്തി പറഞ്ഞു. സ്പിന്നര്മാരായ നഷ്ര സന്ധു, സാദിയ ഇഖ്ബാല് എന്നിവരുള്പ്പെടുന്ന സംഘം കരുത്തരാണ്. ഇന്ത്യക്ക് മേല്ക്കോയ്മയുണ്ടെങ്കിലും മത്സരത്തില് അതീവ ശ്രദ്ധയോടെ കളിക്കുമെന്നും ദീപ്തി കൂട്ടിച്ചേര്ത്തു.
content highlights: India vs Pakistan Rivalry: India Maintains Dominance in Short Format & ICC Tournaments
