LIVE TV
സെഞ്ചുറി നേടിയ ദേവ്ദത്ത് പടിക്കലിന്റെയും 10 വിക്കറ്റ് കൊയ്ത മാനവ് സുതാറിന്റെയും മിന്നുന്ന പ്രകടനങ്ങളുടെ കരുത്തില്, ചരിത്രത്തിലെ 600-ാം ടെസ്റ്റ് മത്സരത്തിലാണ് ശ്രീലങ്കയ്ക്കെതിരെ ഇന്ത്യ 165 റണ്സിന്റെ വമ്പന് വിജയം കുറിച്ചത്. ശ്രീലങ്കയിലെ ഗാലെയില് ഇന്ത്യയുടെ മികച്ച പ്രകടനത്തിനും വിജയത്തിനുമാണ് ക്രിക്കറ്റ് പ്രേമികള് സാക്ഷ്യം വഹിച്ചത്. 1932-ല് അന്താരാഷ്ട്ര ക്രിക്കറ്റില് അരങ്ങേറ്റം കുറിച്ചതുമുതല് ടെസ്റ്റ് ക്രിക്കറ്റിലെ ഇന്ത്യയുടെ പ്രയാണം പ്രചോദനാത്മകമാണ്. സികെ നായിഡുവില് തുടങ്ങി കപില് ദേവ്, സച്ചിന് തെണ്ടുല്ക്കര്, വിരാട് കോഹ്ലി എന്നിവരുടെ കാലഘട്ടങ്ങളിലൂടെ നീളുന്ന ഇന്ത്യന് ക്രിക്കറ്റ് ടെസ്റ്റില് ചരിത്രംകുറിച്ചിട്ടുണ്ട്.
1960-70 കാലഘട്ടങ്ങളില് ബിഷന് സിങ് ബേദി, ഭഗവത് ചന്ദ്രശേഖര്, ശ്രീനിവാസ് വെങ്കട്ടരാഘവന് തുടങ്ങിയ പ്രതിഭകളിലൂടെ സ്പിന് ബൗളിങ്ങില് കേന്ദ്രീകരിച്ചിരുന്ന ടീമില് നിന്ന്, ഇന്ന് ജസ്പ്രീത് ബുംറ, മുഹമ്മദ് ഷമി, രവിചന്ദ്രന് അശ്വിന്, രവീന്ദ്ര ജഡേജ എന്നിവരടങ്ങുന്ന പേസിനും സ്പിന്നിനും തുല്യ പ്രാധാന്യമുള്ള ലോകോത്തര ബൗളിങ് നിരയായി ഇന്ത്യ പരിണമിച്ചു. സ്പിന് സംസ്കാരം ഇന്നും നിലനില്ക്കുമ്പോഴും, ബുംറ, ഷമി, ഇശാന്ത് ശര്മ്മ, ഉമേഷ് യാദവ്, മുഹമ്മദ് സിറാജ്, ഭുവനേശ്വര് കുമാര് തുടങ്ങിയവരുടെ പേസാക്രമണം ക്രിക്കറ്റില് ഇന്ത്യക്ക് കരുത്തായിരുന്നു. സുനില് ഗവാസ്കര്, സച്ചിന് തെണ്ടുല്ക്കര്, രാഹുല് ദ്രാവിഡ്, വിരാട് കോഹ്ലി തുടങ്ങി റണ് മെഷീനുകളായ ബാറ്റര്മാരെയും ഇന്ത്യ ലോകത്തിന് സംഭാവന ചെയ്തു. ടെസ്റ്റ് ക്രിക്കറ്റിലെ വന്മതിലായാണ് രാഹുല് ദ്രാവിഡ് അറിയപ്പെട്ടത്. ടെസ്റ്റ് ക്രിക്കറ്റിലെ തുടക്കകാലത്ത് അത്രമികച്ച തുടക്കമല്ലെങ്കിലും പിന്നീട്, ഇന്ത്യ ആധിപത്യം പുലര്ത്തിയിരുന്നു. 21-ാം നൂറ്റാണ്ടിലെ 270 ടെസ്റ്റ് ക്രിക്കറ്റുകളില്നിന്ന് ഇന്ത്യ കരസ്ഥമാക്കിയത് 126 വിജയങ്ങള്. 79 കളികളാണ് ആകെ തോറ്റത്. 65 എണ്ണത്തില് സമനിലയും.
ഇതേസമയത്താണ് ന്യൂസീലന്ഡ്, ഇംഗ്ലണ്ട്, ഓസ്ട്രേലിയ എന്നിവിടങ്ങളില് ചരിത്രപരമായ വിജയങ്ങള് കുറിച്ചതും. വിരാട് കോഹ്ലിയാണ് ഇന്ത്യയുടെ വിന്നിങ് ടെസ്റ്റ് ക്യാപ്റ്റന്. 40 വിജയങ്ങളാണ് താരത്തിന്റെ ക്യാപ്റ്റന്സിക്കിടെ ഇന്ത്യ സ്വന്തമാക്കിയത്. അങ്ങനെ ഇന്ത്യയുടെ ക്രിക്കറ്റ് ചരിത്രം അതുല്യമാണ്.
ആദ്യ ടെസ്റ്റ് മുതല് 600-ാം ടെസ്റ്റ് വരെയുള്ള ഇന്ത്യയുടെ യാത്രകളെ നോക്കാം
content highlights: 600 Test Matches: The Magnificent Evolution of Indian Cricket
