LIVE TV
ഇംഗ്ലണ്ടിനെതിരായ ഏകദിന ക്രിക്കറ്റില് പരമ്പര കൈവിട്ടതിന് പിന്നാലെ കോച്ച് ഗൗതം ഗംഭീറിനെതിരെ വിമര്ശനം രൂക്ഷം. മൂന്നാം ഏകദിനത്തില് 27 റണ്സിന്റെ തോല്വി വഴങ്ങിയതോടെ ഇന്ത്യക്ക് 2-1 ന് പരമ്പര നഷ്ടമായിരുന്നു. ലോര്ഡ്സില് നടന്ന അവസാന പോരാട്ടത്തില് ഇംഗ്ലണ്ട് ഉയര്ത്തിയ 388 റണ്സിന്റെ കൂറ്റന് ലക്ഷ്യം പിന്തുടര്ന്ന ഇന്ത്യക്ക്, രോഹിത് ശര്മയുടെ തകര്പ്പന് സെഞ്ചുറിയും (100) ക്യാപ്റ്റന് ശുഭ്മന് ഗില്, വിരാട് കോഹ്ലി എന്നിവരുടെ അര്ധസെഞ്ചുറികളും ഉണ്ടായിരുന്നിട്ടും ലക്ഷ്യത്തിലെത്താനായില്ല.
തോല്വിക്ക് പിന്നാലെ, ഇന്ത്യന് ബാറ്റിങ് ഓര്ഡറിലെ അനാവശ്യ പരീക്ഷണങ്ങളെ രൂക്ഷമായി വിമര്ശിച്ച് മുന് ബിസിസിഐ ചീഫ് സെലക്ടറും 1983-ലെ ലോകകപ്പ് ജേതാവുമായ കൃഷ്ണമാചാരി ശ്രീകാന്ത് രംഗത്തെത്തി. മുഖ്യപരിശീലകന് ഗൗതം ഗംഭീറിന്റെ നേതൃത്വത്തിലുള്ള ടീം മാനേജ്മെന്റിന്റെ തീരുമാനങ്ങളാണ് ഇന്ത്യക്ക് തിരിച്ചടിയായതെന്ന് അദ്ദേഹം തുറന്നടിച്ചു. 'ഇത്രയും വലിയൊരു ലക്ഷ്യം പിന്തുടരുമ്പോള് ആരെങ്കിലും കെഎല് രാഹുലിനെ ആറാം നമ്പറില് ബാറ്റിങ്ങിന് അയക്കുമോ? കടുപ്പമേറിയ എത്രയോ റണ് ചേസുകളില് ഇന്ത്യയെ ജയിപ്പിച്ച താരമാണവന്. രാഹുല് ആറോ ഏഴോ നമ്പറില് കളിക്കേണ്ട കളിക്കാരനാണോ?' - ശ്രീകാന്ത് ചോദിച്ചു. 'സഞ്ജു സാംസണിന്റെയും വൈഭവ് സൂര്യവംശിയുടെയും അവസരങ്ങള് ഇല്ലാതാക്കിയത് പോലെ ഇപ്പോള് അവര് കെഎല് രാഹുലിന്റെ കരിയറും നശിപ്പിക്കുകയാണ്. ഇത് വലിയ അനീതിയാണ്. മത്സരത്തില് അദ്ദേഹത്തിന്റെ ബോഡി ലാംഗ്വേജ് പോലും കടുത്ത സമ്മര്ദ്ദത്തിലായിരുന്നു.' -അദ്ദേഹം കൂട്ടിച്ചേര്ത്തു.
ഇംഗ്ലണ്ടിനെതിരായ ഏകദിന പരമ്പരയില് ഇന്ത്യന് താരം കെഎല് രാഹുല് നേരിടുന്ന ഫോമില്ലായ്മയ്ക്ക് പിന്നില് മുഖ്യപരിശീലകന് ഗൗതം ഗംഭീറിന്റെ തെറ്റായ തന്ത്രങ്ങളാണെന്ന് ആരാധകരും പറയുന്നു. രാഹുലിന്റെ ബാറ്റങ് ഓര്ഡറില് നിരന്തരം വരുത്തുന്ന മാറ്റങ്ങളും ടീം മാനേജ്മെന്റിന്റെ അസ്ഥിരമായ തീരുമാനങ്ങളുമാണ് താരത്തിന്റെ പ്രകടനത്തെ ബാധിച്ചതെന്നാണ് വിമര്ശകരുടെ പ്രധാന ആക്ഷേപം. യുവതാരം വൈഭവ് സൂര്യവംശിയുടെ കരിയര് കൈകാര്യം ചെയ്തതില് വരുത്തിയ വീഴ്ചകളോട് താരതമ്യപ്പെടുത്തിയാണ് സോഷ്യല് മീഡിയയില് ആരാധകര് ഗംഭീറിനെതിരെ രംഗത്തെത്തിയിരിക്കുന്നത്. 'വൈഭവ് സൂര്യവംശിയുടെ കരിയര് അനിശ്ചിതത്വത്തിലാക്കിയത് പോലെ കെഎല് രാഹുലിന്റെ ആത്മവിശ്വാസവും തകര്ക്കരുത്' -ആരാധകര് രോഷത്തോടെയാണ് പ്രതികരിക്കുന്നത്. ഇന്ത്യന് ടീമിനുള്ളില് വലിയ അസ്വസ്ഥതയുണ്ടാക്കുന്നതാണ് പുതിയ വിവാദങ്ങള്.
content highlights: KL Rahul's Poor Form: Severe Criticism Aimed at Gautam Gambhir; "Don't Turn Him Into Another Vaibhav"
