Get the latest news at
your fingertips!
Download our app now
LIVE TV
Search
ടി20 ലോകകപ്പിൽ നിന്ന് പുറത്തായതിന് പിന്നാലെ നാട്ടിലേക്ക് മടങ്ങാനാകാതെ വെസ്റ്റ് ഇൻഡീസ് ക്രിക്കറ്റ് ടീം ഇന്ത്യയിൽ കുടുങ്ങി. ഗൾഫ് മേഖലയിലെ യുദ്ധ സാഹചര്യത്തെത്തുടർന്ന് വ്യോമപാതകളിൽ നിയന്ത്രണം ഏർപ്പെടുത്തിയതാണ് ടീമിന്റെ മടക്കയാത്ര പ്രതിസന്ധിയിലാക്കിയത്.
സൂപ്പർ-8 പോരാട്ടത്തിൽ ഇന്ത്യയോട് തോറ്റാണ് വെസ്റ്റ് ഇൻഡീസ് ലോകകപ്പില് നിന്ന് പുറത്തായത്. മാർച്ച് ഒന്നിനായിരുന്നു ആ മത്സരം.എന്നാൽ തോൽവിക്ക് പിന്നാലെ നാട്ടിലേക്ക് മടങ്ങാനിരുന്ന താരങ്ങൾ നിലവിൽ ഇന്ത്യയിലെ ഹോട്ടൽ മുറികളിൽ കാത്തിരിപ്പിലാണ്.
ഈ സാഹചര്യത്തിൽ നാട്ടിലെത്താൻ ഫുട്ബോൾ ഇതിഹാസം ക്രിസ്റ്റ്യാനോ റൊണാൾഡോയോട് സഹായം അഭ്യർത്ഥിച്ചിരിക്കുകയാണ് വിൻഡീസ് സ്പിന്നർ അക്കീൽ ഹൊസൈൻ. ഈ ഘട്ടത്തിൽ, ഒരു വിമാനം അയച്ച് എന്നെ രക്ഷിക്കാൻ ക്രിസ്റ്റ്യാനോ റൊണാൾഡോയോട് ആവശ്യപ്പെടുന്നതാകും നല്ലത്, എന്ന് അക്കീൽ ഹൊസൈൻ എക്സിൽ കുറിച്ചു. 24 മണിക്കൂറിനുള്ളിൽ ടീമിനായി ചാർട്ടേഡ് വിമാനം ഏർപ്പെടുത്തുമെന്ന് വെസ്റ്റ് ഇൻഡീസ് ക്രിക്കറ്റ് ബോർഡ് ഇന്നലെ അറിയിച്ചിരുന്നെങ്കിലും, യാത്ര അനിശ്ചിതത്വത്തിലായതോടെയാണ് താരം ഇത്തരമൊരു പ്രതികരണവുമായി എത്തിയത്.
സംഭവത്തിൽ അമർഷം പ്രകടിപ്പിച്ച് പരിശീലകൻ ഡാരൻ സമിയും എക്സിൽ രംഗത്തെത്തിയിരുന്നു .‘എനിക്ക് വീട്ടിൽ പോയാൽ മതി’ എന്ന് ഡാരൻ സമി എക്സിൽ കുറിച്ചു. ടീം അംഗങ്ങളും സപ്പോര്ട്ട് സ്റ്റാഫുമെല്ലാം സമാന മാനസികാവസ്ഥയിലാണ്, സമി പറഞ്ഞു.
ഇറാനെതിരെ അമേരിക്കയും ഇസ്രായേലും നടത്തുന്ന സൈനിക നീക്കങ്ങളെത്തുടർന്ന് ഗൾഫ് മേഖലയിലെ വിമാന സർവീസുകൾ താറുമാറായിരിക്കുകയാണ്. ലോകത്തിലെ ഏറ്റവും തിരക്കേറിയ വിമാനത്താവളങ്ങളിലൊന്നായ ദുബായ് ഇന്റർനാഷണൽ എയർപോർട്ടിലുണ്ടായ നാശനഷ്ടങ്ങൾ പ്രതിസന്ധി രൂക്ഷമാക്കി. സുരക്ഷാ കാരണങ്ങളാൽ പല അന്താരാഷ്ട്ര വിമാനക്കമ്പനികളും സർവീസുകൾ റദ്ദാക്കുകയോ വഴിതിരിച്ചുവിടുകയോ ചെയ്തിട്ടുണ്ട്.
കളിക്കാരുടെ സുരക്ഷിതമായ മടക്കയാത്ര ഉറപ്പാക്കാൻ ഐസിസിയുമായും വിവിധ സർക്കാർ ഏജൻസികളുമായും ചർച്ചകൾ നടത്തിവരികയാണെന്ന് വെസ്റ്റ് ഇൻഡീസ് ക്രിക്കറ്റ് ബോർഡ് അറിയിച്ചു. താരങ്ങളുടെയും കുടുംബാംഗങ്ങളുടെയും ആശങ്ക മനസ്സിലാക്കുന്നുവെന്നും സുരക്ഷയ്ക്കാണ് മുൻഗണനയെന്നും ബോർഡ് വ്യക്തമാക്കി.
Content Highlights: T20 worldcup; west-indies player trapped in india request ronaldo viral
