

ദക്ഷിണാഫ്രിക്കയ്ക്കെതിരെ ഒന്നാം ഏകദിനത്തിൽ ഇന്ത്യയ്ക്ക് വമ്പൻ ടോട്ടൽ. മത്സരത്തിൽ ആദ്യം ബാറ്റ് ചെയ്ത ഇന്ത്യ നിശ്ചിത 50 ഓവറിൽ എട്ട് വിക്കറ്റ് നഷ്ടത്തിൽ 349 റൺസെടുത്തു. വിരാട് കോഹ്ലിയുടെ സെഞ്ച്വറിയും രോഹിത് ശർമയുടെയും ക്യാപ്റ്റൻ കെ എൽ രാഹുലിന്റെയും അർദ്ധ സെഞ്ച്വറിയുമാണ് ഇന്ത്യൻ ഇന്നിങ്സിന് കരുത്തായത്.
നേരത്തെ ടോസ് നേടിയ ദക്ഷിണാഫ്രിക്ക ബൗളിങ് തിരഞ്ഞെടുക്കുകയായിരുന്നു. 18 റൺസെടുത്ത യശസ്വി ജയ്സ്വാളിനെ ഇന്ത്യയ്ക്ക് തുടക്കത്തിൽ തന്നെ നഷ്ടമായി. പിന്നാലെ രോഹിത് ശർമയും വിരാട് കോഹ്ലിയും ക്രീസിലൊന്നിച്ചതോടെ ഇന്ത്യൻ സ്കോറിങ് അനായാസം മുന്നോട്ടുചലിച്ചു. 51 പന്തിൽ അഞ്ച് ഫോറും മൂന്ന് സിക്സറും സഹിതം 57 റൺസാണ് രോഹിത് നേടിയത്. കോഹ്ലിയോടൊപ്പം രണ്ടാം വിക്കറ്റിൽ 136 റൺസ് കൂട്ടിച്ചേർത്തതിന് ശേഷമാണ് രോഹിത് പുറത്തായത്.
നാലാമനായി ക്രീസിലെത്തിയ റുതുരാജ് ഗെയ്ക്ക്വാദ് എട്ട് റൺസോടെ മടങ്ങി. വാഷിങ്ടൺ സുന്ദറിനും അധികം പിടിച്ച് നിൽക്കാനായില്ല. 13 റൺസാണ് സുന്ദറിന്റെ സമ്പാദ്യം. പിന്നാലെ ക്യാപ്റ്റൻ കെ എൽ രാഹുൽ ഉത്തരവാദിത്തത്തോടെ കളിച്ചത് ഇന്ത്യൻ സ്കോർ മുന്നോട്ട് നീക്കി.
അധികം വൈകാതെ വിരാട് കോഹ്ലിയുടെ 83-ാം അന്താരാഷ്ട്ര സെഞ്ച്വറി പിറന്നു. ഏകദിന ക്രിക്കറ്റിൽ കോഹ്ലിയുടെ 52-ാം സെഞ്ച്വറിയാണിത്. 120 പന്തിൽ 11 ഫോറും ഏഴ് സിക്സറും സഹിതം 135 റൺസുമായാണ് ഇതിഹാസ താരം പുറത്തായത്. കെ എൽ രാഹുലുമായി ചേർന്ന് അഞ്ചാം വിക്കറ്റിൽ 65 റൺസ് കൂട്ടിച്ചേർത്തതിന് ശേഷമാണ് കോഹ്ലി പുറത്തായത്.
നിർണായക സംഭാവന നൽകിയ കെ എൽ രാഹുൽ 56 പന്തിൽ രണ്ട് ഫോറും മൂന്ന് സിക്സറും സഹിതം 60 റൺസെടുത്തു. അവസാന ഓവറുകളിൽ രാഹുലിന് പിന്തുണ നൽകിയ രവീന്ദ്ര ജഡേജ 20 പന്തിൽ രണ്ട് ഫോറും ഒരു സിക്സറും സഹിതം 35 റൺസുമെടുത്തു. ദക്ഷിണാഫ്രിക്കൻ ബൗളിങ് നിരയിൽ മാർകോ ജാൻസൻ, നന്ദ്ര ബർഗർ, കോർബിൻ ബോഷ്, ഒട്ട്നീൽ ബാർട്ട്മാൻ എന്നിവർ രണ്ട് വീതം വിക്കറ്റുകൽ വീഴ്ത്തി.
Content Highlights: India posted a mammoth total before South Africa in first ODI