LIVE TV
പശ്ചിമേഷ്യയിൽ പുകയുന്ന യുദ്ധവും ഭൗമരാഷ്ട്രീയ അനിശ്ചിതത്വങ്ങളും കാരണം അന്താരാഷ്ട്ര വിപണിയിൽ എണ്ണവില കുതിച്ചുയരുന്നത് ഇന്ത്യയ്ക്ക് കടുത്ത പ്രതിസന്ധി സൃഷ്ടിക്കുന്നു. ഒക്ടോബർ മാസത്തിൽ ഇന്ത്യ ഇറക്കുമതി ചെയ്യുന്ന ക്രൂഡ് ഓയിലിന്റെ ശരാശരി ബാസ്കറ്റ് വില ബാരലിന് 120.46 ഡോളർ എന്ന നിരക്കിലേക്ക് എത്തിയിരിക്കുകയാണ്. ഇത് കഴിഞ്ഞ 14 വർഷത്തിനിടയിലെ, അതായത് 2012 മാർച്ചിന് ശേഷമുള്ള ഏറ്റവും ഉയർന്ന പ്രതിമാസ ശരാശരി നിരക്കാണ്. യുദ്ധ പശ്ചാത്തലത്തിൽ കടൽമാർഗ്ഗമുള്ള ചരക്കുകൂലിയും കപ്പലുകളുടെ ഇൻഷുറൻസ് പ്രീമിയവും കുത്തനെ കൂടിയതാണ് ഇന്ത്യയിലേക്കുള്ള എണ്ണ ഇറക്കുമതി ചെലവ് വർദ്ധിപ്പിച്ചത്.
കഴിഞ്ഞ ഓഗസ്റ്റ് മാസത്തിൽ ബാരലിന് 90.19 ഡോളറായിരുന്ന എണ്ണവില സെപ്റ്റംബറിൽ 116.77 ഡോളറായും, ഒക്ടോബറിൽ 120 ഡോളറിന് മുകളിലേക്കും അതിവേഗമാണ് ഉയർന്നത്. ഒക്ടോബർ 26-ലെ കണക്കുകൾ പ്രകാരം ഒറ്റദിവസത്തെ ക്രൂഡ് വില ബാരലിന് 123.72 ഡോളർ വരെ എത്തിയിരുന്നു. ആഗോള വിപണിയിൽ ബ്രെന്റ് ക്രൂഡ് വിലയും 2026-ൽ മാത്രം ഏകദേശം 80 ശതമാനത്തോളം വർദ്ധനവാണ് രേഖപ്പെടുത്തിയിരിക്കുന്നത്. ഇത് ഇന്ത്യയുടെ മൊത്തം എണ്ണ-വാതക ഇറക്കുമതി ബില്ലിൽ വലിയ ആഘാതമുണ്ടാക്കുന്നുണ്ട്.
ഈ വിലക്കയറ്റം രാജ്യത്തിന്റെ ആഭ്യന്തര സമ്പദ്‌വ്യവസ്ഥയ്ക്കും രൂപയുടെ മൂല്യത്തിനും കടുത്ത ഭീഷണിയാണ് ഉയർത്തുന്നത്. നിലവിൽ യുഎസ് ഡോളറിനെതിരെ ഇന്ത്യൻ രൂപയുടെ മൂല്യം 95 രൂപ എന്ന റെക്കോർഡ് താഴ്ചയിലേക്ക് ദുർബലപ്പെട്ടിരിക്കുകയാണ്. റേറ്റിംഗ് ഏജൻസിയായ ഇക്രയുടെ വിലയിരുത്തൽ അനുസരിച്ച്, ക്രൂഡ് ഓയിൽ വിലയിലുണ്ടാകുന്ന ഓരോ 10 ഡോളറിന്റെയും വർദ്ധനവ് ഇന്ത്യയുടെ കറന്റ് അക്കൗണ്ട് കമ്മിയെ ജിഡിപിയുടെ 0.3 ശതമാനത്തോളം വർദ്ധിപ്പിക്കും. നടപ്പ് സാമ്പത്തിക വർഷത്തിന്റെ ആദ്യ പകുതിയിൽ തന്നെ ഇന്ത്യയുടെ കറന്റ് അക്കൗണ്ട് കമ്മി 11.2 ബില്യൺ ഡോളറായി ഉയർന്നിട്ടുണ്ട്.
രാജ്യാന്തര വിപണിയിൽ വില കൂടിയെങ്കിലും ആഭ്യന്തര വിപണിയിൽ ഇന്ധനവില വർദ്ധിപ്പിക്കാത്തത് പൊതുമേഖലാ എണ്ണക്കമ്പനികളുടെ സാമ്പത്തിക ഭദ്രതയെ ബാധിച്ചു തുടങ്ങിയിട്ടുണ്ട്. എൽപിജി സിലിണ്ടറുകൾ സബ്‌സിഡി നിരക്കിൽ വിൽക്കുന്നതിലൂടെ മാത്രം എണ്ണക്കമ്പനികൾക്ക് നിലവിൽ 62,000 കോടി രൂപയുടെ നഷ്ടമാണ് ഉണ്ടായിരിക്കുന്നത്. വരും ദിവസങ്ങളിലും പശ്ചിമേഷ്യയിലെ സംഘർഷം തുടരുകയാണെങ്കിൽ ഇന്ത്യയിലെ പെട്രോൾ, ഡീസൽ വിലയിലും ആഭ്യന്തര പണപ്പെരുപ്പത്തിലും ഇതിന്റെ പ്രതിഫലനം പ്രകടമാകുമെന്നാണ് സാമ്പത്തിക വിദഗ്ദ്ധർ ചൂണ്ടിക്കാണിക്കുന്നത്.
Content Highlights: India's crude oil basket averaged around $120 per barrel in October 2026, reaching its highest monthly level since March 2012.
