Get the latest news at
your fingertips!
Download our app now
LIVE TV
Search
കേരള ക്രിക്കറ്റ് ലീഗിൽ വെടിക്കെട്ട് അർധ സെഞ്ച്വറി നേടി ജലജ് സക്സേന. കെസിഎല്ലിൽ ആലപ്പി റിപ്പിൾസിന് വേണ്ടി വെടിക്കെട്ട് ഫിഫ്റ്റി സ്വന്തമാക്കിയിരിക്കുകയാണ് താരം. ഏരീസ് കൊല്ലം സെയ്ലേഴ്‌സിനെതിരായ മത്സരത്തിലാണ് ജലജ് ഗംഭീര ബാറ്റിങ് പുറത്തെടുത്തത്.
50 പന്തില്‍ 85 റണ്‍സാണ് ജലജ് സ്വന്തമാക്കിയത്. ഒൻപത് ഫോറും നാല് സിക്‌സറും അടങ്ങുന്നതായിരുന്നു ജലജിന്റെ പ്രകടനം. സക്‌സേനയുടെ ബാറ്റിങ് കരുത്തില്‍ ആലപ്പി റിപ്പിള്‍സ് ഭേദപ്പെട്ട സ്‌കോറിലെത്തുകയും ചെയ്തു. 20 ഓവറില്‍ ആറു വിക്കറ്റിന് 182 റണ്‍സാണ് ആലപ്പി നേടിയത്. ആലപ്പിയുടെ ടോപ് സ്‌കോററായ ജലജ് അഖില്‍ സജീവന്റെ പന്തില്‍ വത്സല്‍ ഗോവിന്ദ് ക്യാച്ചെടുത്താണ് ജലജിനെ പുറത്താക്കിയത്. ആലപ്പി നിരയില്‍ ജലജ് ഒഴികെയുള്ള ബാറ്റര്‍മാര്‍ നിരാശപ്പെടുത്തി.
മത്സരത്തിൽ ടോസ് നേടിയ കൊല്ലം സെയ്ലേഴ്‌സ് ബൗളിങ് തിരഞ്ഞെടുക്കുകയായിരുന്നു. ക്യാപ്റ്റന്‍ മുഹമ്മദ് അസ്ഹറുദ്ദീനും ജലജും ആലപ്പിക്ക് ഭേദപ്പെട്ട തുടക്കമാണ് സമ്മാനിച്ചത്. ഇരുവരും 61 റണ്‍സിന്റെ കൂട്ടുകെട്ട് പടുത്തുയർത്തി. 24 പന്തില്‍ 24 റണ്‍സെടുത്താണ് അസ്ഹറുദ്ദീന്‍ മടങ്ങിയത്. തുടര്‍ന്നെത്തിയ അഭിഷേക് പി നായരിന് കാര്യമായി ഒന്നും ചെയ്യാനായില്ല. 17 പന്തില്‍ 18 റണ്‍സെടുത്ത അഭിഷേക് റണ്ണൗട്ടായി. തുടര്‍ന്നെത്തിയ ടികെ അക്ഷയിയും റണ്ണൗട്ടിലൂടെ മടങ്ങി. ഒമ്പത് പന്തില്‍ 11 റണ്‍സായിരുന്നു അക്ഷയിയുടെ സമ്പാദ്യം.
കഴിഞ്ഞ മത്സരത്തിൽ മികച്ച ബാറ്റിങ് പ്രകടനം പുറത്തെടുത്ത മുഹമ്മദ് കൈഫിനും ഇന്നത്തെ മത്സരത്തില്‍ തിളങ്ങാനായില്ല. നാല് പന്തില്‍ രണ്ട് റണ്‍സെടുതത് താരത്തെ എന്‍എസ് അജയഘോഷാണ് പുറത്താക്കിയത്. ഏഴാമനായി എത്തിയ മുഹമ്മദ് ഇനാന്റെ തകര്‍പ്പന്‍ ബാറ്റിങ് ആലപ്പിക്ക് ആശ്വാസമായി. ഒമ്പത് പന്തില്‍ 21 റണ്‍സാണ് മുഹമ്മദ് ഇനാന്‍ അടിച്ചുകൂട്ടിയത്.
ആറു പന്തില്‍ 10 റണ്‍സുമായി കെഎ അരുണും, ഒരു പന്തില്‍ രണ്ട് റണ്‍സുമായി ആദിത്യ ബൈജുവും പുറത്താകാതെ നിന്നു. കൊല്ലം സെയിലേഴ്‌സിനായി ഷറഫുദ്ദീന്‍, അഖില്‍ സജീവന്‍, എജി അമല്‍, എന്‍എസ് അജയഘോഷ് എന്നിവര്‍ ഓരോ വിക്കറ്റ് വീതം വീഴ്ത്തി,
Content Highlights: Jalaj Saxena hits Fifty in KCL Aries Kollam Sailors vs Alleppey Ripples
