'കെസി വേണുഗോപാല്‍ ബിജെപി ഏജന്റ്, പ്രവര്‍ത്തനങ്ങള്‍ സംശയാസ്പദം'; രാഹുല്‍ ഗാന്ധിക്ക് പരാതി

ഡിസിസി അധ്യക്ഷന്‍മാരുടെ പട്ടിക പുറത്ത് വന്നതിന് പിന്നാലെ തര്‍ക്കം രൂക്ഷമായ കേരളത്തിലെ കോണ്‍ഗ്രസില്‍ നിലപാട് കടുപ്പിച്ച് കൂടുതല്‍ നേതാക്കള്‍. മുതര്‍ന്ന നേതാക്കള്‍ക്ക് എതിരെ കടുത്ത നിലപാട് സ്വീകരിച്ച് കൂടുതല്‍ നേതാക്കള്‍ രംഗത്ത് എത്തി. മുന്‍ കെപിസിസി സെക്രട്ടറി പി എസ് പ്രശാന്ത് ആണ് ഇത്തരത്തില്‍ രംഗത്ത് എത്തിയ ഒടുവിലെ നേതാവ്.

എഐസിസി ജനറല്‍ സെക്രട്ടറിയും, കേരളത്തിലെ പ്രമുഖ നേതാക്കളില്‍ ഒരാളുമായി കെസി വേണുഗോപാലിന് എതിരെയാണ് പി എസ് പ്രശാന്തിന്റെ ആരോപണം. കെസി വേണുഗോപാല്‍ ബിജെപി ഏജന്റ് ആണ് എന്നാണ് പി എസ് പ്രശാന്തിന്റെ പ്രധാന ആരോപണം. ഇതിനുള്ള തെളിവുകള്‍ ഉള്‍പ്പെടെ പ്രശാന്ത് രാഹുല്‍ ഗാന്ധിക്ക് കൈമാറിയെന്നാണ് റിപ്പോര്‍ട്ടുകള്‍.

കെസി വേണുഗോപാലിന്റെ എഐസിസിയിലെ നിയമനം പുനഃപരിശോധിക്കണം. കോണ്‍ഗ്രസില്‍ നിന്ന് ബിജെപിയുടെ ഏജന്റായി പ്രവര്‍ത്തിക്കുകയാണ് അദ്ദേഹം. ജനിച്ചുവളര്‍ന്ന പ്രദേശത്ത് രാഷ്ട്രീയ സ്വാധീനമില്ലാത്ത വ്യക്തിയാണ് അദ്ദേഹം. എന്നാല്‍ തനിക്ക് രാഷ്ട്രീയ അഭയം നല്‍കിയ ജില്ലയില്‍ പാര്‍ട്ടിയുടെ നാശത്തിന് അദ്ദേഹത്തിന്റെ ഇടപെടല്‍ കാരണമായി എന്നും പിഎസ് പ്രശാന്ത് ചുണ്ടിക്കാട്ടുന്നു.

തിരുവനന്തപുരത്ത് പാലോട് രവിയെ അധ്യക്ഷനാക്കിയതിന് എതിരെയും പരാതി ഉയര്‍ന്നിട്ടുണ്ട്. പാലോട് രവിക്ക് എതിരെയും പരാതിയില്‍ പരാമര്‍ശമുണ്ട്. ഡിസിസി അധ്യക്ഷന്‍മാരെ പ്രഖ്യാപിച്ചതിന് പിന്നാലെ പാലോട് രവിയ്ക്ക് എതിരെയും ബിജെപി ബന്ധം ആരോപിക്കപ്പെട്ടിരുന്നു. സംഘപരിവാര്‍ പ്രവര്‍ത്തകരെ കേസില്‍ നിന്ന് രക്ഷിക്കാന്‍ എംഎല്‍എ ആയിരിക്കെ ഇടപെട്ടെന്നായിരുന്നു ആരോപണം. പിന്നാലെയാണ് കെ സി വേണുഗോപാലിന് എതിരെ തന്നെ നേതാക്കള്‍ രംഗത്ത് എത്തുന്നത്.

ഡിസിസി പുനഃസംഘടനയില്‍ നിലവിലെ സാഹചര്യത്തില്‍ വിട്ടുവീഴ്ചയ്ക്ക് ഇല്ലെന്നാണ് പ്രബലരായ എ,ഐ ഗ്രൂപ്പുകളുടെ നിലപാട്. എന്നാല്‍ ഗ്രൂപ്പുകള്‍ക്ക് വഴങ്ങേണ്ടെന്ന നിലപാടാണ് കെപിസിസി അധ്യക്ഷന്‍ കെ സുധാകരനും, പ്രതിപക്ഷ നേതാവ് വിഡി സതീശനും ഉള്ളത്. കെ സുധാകരനും, വിഡി സതീശനും കെ സി വേണുഗോപാലിന്റെ പൂര്‍ണ പിന്തുണയുമുണ്ട്. ഈ സാഹചര്യത്തിലാണ് ആരോപണങ്ങളും വിവാദങ്ങളും കെ സി വേണുഗോപാലിലേക്ക് തിരിയുന്നത്.

ഡിസിസി അധ്യക്ഷ നിയമനത്തില്‍ അതൃപ്തി പ്രകടിപ്പിച്ച രംഗത്ത് എത്തിയ മുതിര്‍ന്ന നേതാക്കള്‍ കടുത്ത നിലപാടിലേക്ക് തിരിയുമെന്നാണ് പുതിയ റിപ്പോര്‍ട്ടുകള്‍. തങ്ങളെ വിശ്വാസത്തില്‍ എടുക്കാത്തവരുമായി സഹകരിക്കേണ്ടെന്നാണ് ഇവരുടെ തീരുമാനം. പട്ടികയ്‌ക്കെതിരെ കൂടുതല്‍ നേതാക്കള്‍ വരും ദിവസങ്ങളില്‍ രംഗത്ത് എത്തുമെന്നാണ് വിവരം. അതിനിനെടെ, പുനഃസംഘടനയ്ക്ക് പിന്നാലെ സംസ്ഥാനത്ത് ഉയര്‍ന്ന തര്‍ക്കങ്ങളില്‍ ഹൈക്കമാന്റ് ആശങ്ക പ്രകടിപ്പിച്ചതായാണ് വിവരം.

അതേസമയം, കോണ്‍ഗ്രസിലുണ്ടായ കലാപം മുതിര്‍ന്ന നേതാക്കള്‍ പാര്‍ട്ടിവിടുന്ന നിലയിലേക്ക് എത്തുമെന്ന സൂചനയാണ് ആദ്യ വിമര്‍ശനം ഉയര്‍ന്ന പാലക്കാട് നിന്നും പുറത്തു വരുന്നത്. പാലക്കാട് ഡിസിസി അധ്യക്ഷ സ്ഥാനം ലഭിക്കാതിരുന്ന എവി ഗോപിനാഥ് കോണ്‍ഗ്രസ് വിട്ടേക്കുമെന്നാണ് സൂചന. ഇന്ന് പതിനൊന്നിന് വിളിച്ച് ചേര്‍ത്തിട്ടുള്ള വാര്‍ത്താസമ്മേളനത്തില്‍ തന്റെ ഭാവി നിലപാട് പ്രഖ്യാപിച്ചേക്കുമെന്നാണ് റിപ്പോര്‍ട്ടുകള്‍.

പ്രാദേശിക നേതാക്കള്‍ ഉള്‍പ്പെടെ എവി ഗോവിനാഥിന് ഒപ്പം കോണ്‍ഗ്രസ് വിട്ടേയ്ക്കുമെന്നാണ് വിവരം. കോണ്‍ഗ്രസ് ഭരിക്കുന്ന പെരിങ്ങോട്ടുകുറിശ്ശിയിലെ 11 പഞ്ചായത്ത് അംഗങ്ങളാണ് ഇത്തരത്തില്‍ പ്രതികരണമായി രംഗത്ത് എത്തിയത്. ഗോപിനാഥിനൊപ്പം ഉറച്ച് നില്‍ക്കുമെന്നും അദ്ദേഹമെടുക്കുന്ന ഏത് തീരുമാനവും ഉള്‍ക്കൊള്ളുമെന്നുമാണ് ഇവര്‍ അറിയിച്ചിട്ടുള്ളത്.