മോദി പങ്കെടുക്കുന്നത് നാലു മണിക്കൂര്‍; പരിപാടിക്ക് ചെലവഴിച്ചത് 23 കോടി

പ്രധാനമന്ത്രി നരേന്ദ്രമോദി നാലു മണിക്കൂര്‍ മാത്രം പങ്കെടുക്കുന്ന പരിപാടിക്ക് 23 കോടി രൂപയിലധികം ചെലവഴിച്ച് മധ്യപ്രദേശ് സര്‍ക്കാര്‍. അടുത്തയാഴ്ചയാണ് പ്രധാനമന്ത്രി ഭോപ്പാലില്‍ എത്തിച്ചേരുക. ആദിവാസി വിഭാഗത്തില്‍പ്പെട്ട പ്രമുഖരെ ആദരിക്കാന്‍ വേണ്ടിയാണ് ചടങ്ങ് സംഘടിപ്പിക്കുന്നത്.

ജംബോരി മൈതാനത്തിലെ പരിപാടിയുടെ ആര്‍ഭാടത്തിന് മാത്രമായാണ് കോടികള്‍ സംസ്ഥാന സര്‍ക്കാര്‍ ചെലവിട്ടത്. ജംബോരി മൈതാനത്തിലെ പരിപാടിക്ക് രണ്ടു ലക്ഷം ആദിവാസി വിഭാഗങ്ങളെ പങ്കെടുപ്പിക്കാന്‍ തീരുമാനിച്ച സര്‍ക്കാര്‍ ഇവര്‍ക്ക് വേണ്ടി യാത്ര സംവിധാനം ഒരുക്കുന്നതിന് മാത്രം പതിമൂന്ന് കോടിരൂപയാണ് ചെലവഴിക്കുക. ജംബോരി മൈതാനത്തിലെ പരിപാടിയുടെ വേദിയുടെ അലങ്കാരങ്ങള്‍, നാലു ഗോപുരങ്ങള്‍, ടെന്റുകള്‍, പ്രചാരണങ്ങള്‍ക്ക് വേണ്ടിയുള്ള പരസ്യം എന്നിവക്കായി സര്‍ക്കാര്‍ ചെലവഴിച്ചത് ഒന്‍പതുകോടി രൂപയാണ്. വേദി സംസ്ഥാനത്തെ ആദിവാസി പാരമ്പര്യം വിളിച്ചോതുന്ന അലങ്കാരങ്ങള്‍ കൊണ്ട് സമ്പന്നമാക്കാന്‍ മുന്നൂറോളം തൊഴിലാളികളാണ് പ്രവര്‍ത്തിച്ചത്. എന്നാല്‍ പ്രധാനമന്ത്രി അത്യാര്‍ഭാടം നിറഞ്ഞ വേദിയില്‍ ചെലവഴിക്കുക വെറും ഒന്നേകാല്‍ മണിക്കൂര്‍ മാത്രമാണ്.

സംസ്ഥാനത്ത് നാല്പ്പത്തിയേഴു നിയമസഭാ സീറ്റുകളാണ് ആദിവാസി വിഭാഗങ്ങള്‍ക്കായി സംവരണം ചെയ്യപ്പെട്ടിട്ടുള്ളത്. അതില്‍ ഇരുപത്തൊന്‍പത് സീറ്റുകള്‍ 2008ല്‍ ബിജെപി നേടിയിരുന്നു. എന്നാല്‍ 2013ല്‍ മുപ്പത്തിമൂന്ന് സീറ്റുകളായി ഉയര്‍ന്ന ബിജെപിയുടെ സീറ്റു നില 2018ല്‍ പതിനാറുസീറ്റുകളിലേക്കു കുത്തനെ താഴുകയും ചെയ്തിരുന്നു.

അതേസമയം, ദേശീയ ക്രൈം റെക്കാര്‍ഡ് ബ്യൂറോയുടെ കണക്കു പ്രകാരം ആദിവാസികള്‍ക്കുനേരെ ഏറ്റവും കൂടുതല്‍ ആക്രമണം നടക്കുന്നത് മധ്യപ്രദേശിലാണ്. 2021 ല്‍ 2401 കേസുകളാണ് ആദിവാസികള്‍ക്കെതിരെ നടന്ന അക്രമങ്ങളില്‍ രജിസ്റ്റര്‍ ചെയ്യപ്പെട്ടതെങ്കില്‍ 2019ല്‍ അത് 1,922യായിരുന്നു. 2019ല്‍ കോണ്‍ഗ്രസ് സര്‍ക്കാര്‍ അധികാരത്തിലിരുന്നപ്പോള്‍ 1, 868 ആയിരുന്നു ആദിവാസികള്‍ക്കെതിരെയുള്ള അക്രമങ്ങളില്‍ രജിസ്റ്റര്‍ ചെയ്യപ്പെട്ട കേസുകള്‍.