'ബിജെപി സഖ്യം, അല്ലെങ്കില്‍ പിളര്‍പ്പ്'; ഉദ്ദവ് താക്കറേയോട് ഏക്‌നാഥ് ഷിന്‍ഡെ

സൂറത്ത്: ശിവസേന നേതൃത്വത്തോട് ഇടഞ്ഞ് ഗുജറാത്തിലെ സൂറത്തിലേക്ക് മാറിയ മഹാരാഷ്ട്ര മന്ത്രിയും മുതിര്‍ന്ന നേതാവുമായ ഏക്‌നാഥ് ഷിന്‍ഡെയുമായി പാര്‍ട്ടി ചര്‍ച്ചകള്‍ക്കായി നിയോഗിച്ച മിലിന്ദ് നര്‍വേക്കര്‍ സംസാരിച്ചു. ഇരുവരും തമ്മിലുള്ള കൂടിക്കാഴ്ച രണ്ട് മണിക്കൂറോളം നീണ്ടു നിന്നു. ചര്‍ച്ചയ്ക്കിടെ മഹാരാഷ്ട്ര മുഖ്യമന്ത്രിയും ശിവസേനാ തലവനുമായ ഉദ്ദവ് താക്കറെയുമായി ഷിന്‍ഡെ ഫോണില്‍ സംസാരിച്ചു.

തന്റെ കൂടെ 35 എംഎല്‍എമാര്‍ ഉണ്ടെന്ന അവകാശ വാദം ഉദ്ദവ് താക്കറയുമായുള്ള ഫോണ്‍ സംഭാഷണത്തിലും ഷിന്‍ഡെ ആവര്‍ത്തിച്ചു. ബിജെപിയുമായി സഖ്യമുണ്ടാക്കാന്‍ ശിവസേന തയ്യാറാണെങ്കില്‍ പാര്‍ട്ടിയില്‍ പിളര്‍പ്പ് ഉണ്ടാവില്ലെന്ന് ഷിന്‍ഡെ താക്കറെയ്ക്ക് മുന്നറിയിപ്പ് നല്‍കി. തനിക്കെതിരെ പാര്‍ട്ടി നടപടി എടുക്കേണ്ടതില്ലെന്നും തനിക്ക് മുഖ്യമന്ത്രി സ്ഥാനമോഹം ഇല്ലെന്നും അദ്ദേഹം താക്കറെയോട് പറഞ്ഞു. നേരത്തെ, ശിവസേനയുടെ നിയമസഭാ കക്ഷി നേതാവ് സ്ഥാനത്ത് നിന്നും ഷിന്‍ഡെയെ മാറ്റിയിരുന്നു.

ബിജെപി ശിവസേന പ്രവര്‍ത്തകരേയും നേതാക്കളേയും അപമാനിക്കുകയാണെന്ന് ഷിന്‍ഡെയോട് ഉദ്ദവ് താക്കറെ സംഭാഷണത്തിനിടെ പറഞ്ഞു. മുമ്പും പാര്‍ട്ടിയെ ഇകഴ്ത്തിക്കാട്ടാന്‍ ബിജെപി ശ്രമിച്ചിട്ടുണ്ടെന്നും താക്കറെയെ ഓര്‍മ്മിപ്പിച്ചു. എന്നാല്‍, കോണ്‍ഗ്രസുമായും എന്‍സിപിയുമായി സഖ്യം ചേരുന്നതിലാണ് തങ്ങള്‍ക്ക് ബുദ്ധിമുട്ടെന്നാണ് ഇതിന് മറുപടിയായി ഷിന്‍ഡെ അറിയിച്ചത്.

മഹാരാഷ്ട്രയില്‍ രാഷ്ട്രീയ അനിശ്ചിതത്വം തുടരുന്നതിനിടെ ഉപമുഖ്യമന്ത്രിയും മുതിര്‍ന്ന എന്‍സിപി നേതാവുമായ അജിത് പവാര്‍ ഉദ്ദവ് താക്കറെയുമായി ചര്‍ച്ച നടത്തി. തങ്ങളുടെ എംഎല്‍എമാര്‍ എല്ലാവരും ഒപ്പമുണ്ടെന്നും നിയമസഭാ കക്ഷി നേതാവുമായും പിസിസി പ്രസിഡന്റുമായും ചര്‍ച്ച ബന്ധപ്പെട്ടുകൊണ്ടിരിക്കുന്നുണ്ടെന്നും കോണ്‍ഗ്രസ് അറിയിച്ചു. രാഷ്ട്രീയ അസ്ഥിരതയുണ്ടാക്കാന്‍ ചിലരെ വാങ്ങാന്‍ ബിജെപിക്ക് സാധിച്ചേക്കുമെന്നും എന്നാല്‍ അതില്‍ അവര്‍ വിജയിക്കാന്‍ പോകുന്നില്ലെന്നും കോണ്‍ഗ്രസ് നേതാവ് ഹരീഷ് റാവത്ത് പറഞ്ഞു. മഹാരാഷ്ട്രയിലെ രാഷ്ട്രീയ സംഭവങ്ങള്‍ ശിവസേനയുടെ ആഭ്യന്തര വിഷയം മാത്രമാണെന്നും ഉദ്ദവ് താക്കറെ നേരിട്ട് അത് പരിഹരിക്കുമെന്നും സഖ്യ സര്‍ക്കാരിനെ ഇതൊന്നും ബാധിക്കില്ലെന്നുമാണ് എന്‍സിപിയുടേയും കോണ്‍ഗ്രസിന്റേയും പരസ്യ നിലപാട്.

STORY HIGHLIGHTS: Eknath Shinde says Uddhav Thackeray if Shiv Sena is ready to ally with the BJP, there won't be a split