സുരേഷ് ഗോപി കേന്ദ്രമന്ത്രിയാകും. പ്രധാനമന്ത്രി നരേന്ദ്രമോദി തീരുമാനിച്ചു. താന്‍ അത് അനുസരിക്കുന്നുവെന്ന് സുരേഷ് ഗോപി പറഞ്ഞു. മറ്റ് കാര്യങ്ങളെക്കുറിച്ചൊന്നും അറിയില്ലെന്നും നിയുക്ത എംപി പ്രതികരിച്ചു. ഡല്‍ഹിയിലേക്ക് പോകാന്‍ ഇറങ്ങിയപ്പോഴായിരുന്നു പ്രതികരണം. ഏറ്റെടുത്ത സിനിമകള്‍ പൂര്‍ത്തിയാക്കാനുള്ളതിനാല്‍ സുരേഷ് ഗോപി കേന്ദ്രമന്ത്രി പദവി ഏറ്റെടുത്തേക്കില്ലെന്ന് സൂചനയുണ്ടായിരുന്നു.
പ്രധാനമന്ത്രി നരേന്ദ്രമോദിയുടെ തീരുമാന പ്രകാരമാണ് ദില്ലിയിലേക്ക് തിരിക്കുന്നതെന്ന് സുരേഷ് ഗോപി. കേന്ദ്രമന്ത്രി പദം സംബന്ധിച്ച് അദ്ദേഹമാണ് തീരുമാനമെടുത്തത്. താന്‍ അത് അനുസരിക്കുകയാണെന്നും സുരേഷ് ഗോപി മാധ്യമങ്ങളോട് പറഞ്ഞു.
'അദ്ദേഹം തീരുമാനിച്ചു. ഞാന്‍ അനുസരിച്ചു. ഉടന്‍ പോകും' എന്നായിരുന്നു നിയുക്ത എംപിയുടെ പ്രതികരണം.
വകുപ്പുകള്‍ സംബന്ധിച്ച ചോദ്യത്തിന് 'എനിക്ക് ഒന്നുമേ അറിയത്തില്ല' എന്നായിരുന്നു പ്രതികരണം.
കേരളത്തിനൊരു അംബാസഡര്‍ എന്ന നിലയ്ക്കാണോ പദവി എന്ന ചോദ്യത്തോട് ' അത് ഞാന്‍ എംപിയായിരുന്നാലും അങ്ങനെ തന്നെ. കേരളത്തിനും തമിഴ്‌നാടിനും എംപിയായിരിക്കും. അതെന്റെ പ്രചരണ യോഗങ്ങളില്‍ പറഞ്ഞിരുന്നു. തൃശൂരിലെ ജനങ്ങള്‍ പാസാക്കിയതാണ്. 11.30 ന് വീട്ടിലെത്തണം എന്നാണ് അറിയിച്ചത്' എന്നും സുരേഷ് ഗോപി പറഞ്ഞു. ആഘോഷങ്ങള്‍ പുരോഗമിക്കുകയാണ്. അത് കഴിഞ്ഞ ശേഷം കൂടുതല്‍ പ്രതികരിക്കാമെന്നും കൂട്ടിച്ചേര്‍ത്തു.
ഹർദീപ് സിങ് പുരി, മൻസുഖ് മാണ്ഡവ്യ, ജി. കിഷൻ റെഡ്ഡി, രാംവിലാസ് പാസ്വാന്റെ മകൻ ചിരാഗ് പാസ്വാൻ, ഗുജറാത്ത് മുൻ സംസ്ഥാന അധ്യക്ഷൻ സി ആർ പാട്ടീൽ എന്നിവർ സത്യപ്രതിജ്ഞ ചെയ്തു.
72 പേരുടെ സത്യപ്രതിജ്ഞാ ചടങ്ങിന് ശേഷം ദേശീയഗാനം ആലപിച്ചു. തുടർന്ന് സത്യപ്രതിജ്ഞ ചെയ്ത മുഴുവൻ മന്ത്രിമാരും പ്രധാനമന്ത്രിക്കൊപ്പം ഫോട്ടോ എടുത്തതോടെ മുഴുവൻ ചടങ്ങുകളും അവസാനിച്ചു.
