ക്രിമിനൽകേസുകളിൽ പ്രതിയായ മൊട്ട വർ​ഗീസ് വെളളക്കെട്ടിൽ മരിച്ച നിലയിൽ

പത്തനംതിട്ട: ഒട്ടേറെ ക്രിമിനൽ കേസുകളിൽ പ്രതിയായ യുവാവിനെ വെളളക്കെട്ടിൽ മരിച്ച നിലയിൽ കണ്ടെത്തി. മൊട്ട വർ​ഗീസ് എന്ന വർ​ഗീസിനെയാണ് മരിച്ച നിലയിൽ കണ്ടെത്തിയത്. മോഷണകേസുകളിലും അബ്കാരി കേസുകളിലും പ്രതിയാണ് വർ​ഗീസ്.

ശനിയാഴ്ച രാവിലെ പന്തളം കുന്നുകുഴിക്ക് സമീപമുളള വെളളക്കെട്ടിലാണ് കമഴ്ന്ന് കിടക്കുന്ന നിലയിൽ മൃതദേഹം കണ്ടെത്തിയത്. പൊലീസെത്തി പരിശോധിച്ചപ്പോഴാണ് മരിച്ചത് മൊട്ട വർ​ഗീസാണെന്ന് തിരിച്ചറിഞ്ഞത്. മൃതദേഹത്തിൽ ക്ഷതമേറ്റ പാടുകൾ കണ്ടെത്തിയത് മരണത്തിൽ ദുരൂഹതയുയർത്തുന്നുണ്ട്. മൃതദേഹത്തിന്റെ സമീപത്തു നിന്നും മദ്യക്കുപ്പികളും പൊലീസിന് ലഭിച്ചിട്ടുണ്ട്.

കഴിഞ്ഞ ദിവസം പളളിപ്പെരുന്നാളുമായി ബന്ധപ്പെട്ട് മരിച്ച വർ​ഗീസും നാട്ടിലെ ചിലരും തമ്മിൽ വാക്കേറ്റമുണ്ടായിരുന്നാതായി നാട്ടുകാർ പറയുന്നത്. മൃതദേഹം കണ്ടെത്തിയ സ്ഥലത്ത് പൊലീസ് ഡോ​ഗ് സ്ക്വാഡും ഫോറൻസിക് വിദ​ഗ്ധരും പരിശോധന നടത്തി. പൊലീസ് അന്വേഷണമാരംഭിച്ചു.

STORY HIGHLIGHTS: in Pathanamthitta a Criminal Case Accused is Found Died in a Pool of Water