LIVE TV
ഫോണ്‍ ഉപയോഗവും അഡിക്ഷനും ഇന്ന് ലോകം ചര്‍ച്ച ചെയ്യുന്ന ഏറ്റവും വലിയ വിഷയങ്ങളിലൊന്നാണ്. കുട്ടികളിലും ചെറുപ്പക്കാരിലും വര്‍ദ്ധിച്ച് വരുന്ന ഫോണ്‍ അഡിക്ഷന്‍ എങ്ങനെയാണ് കുടുംബങ്ങളെയും സാമൂഹിക വലയത്തെയും ബാധിക്കുന്നതെന്നും ഇതിനെ എങ്ങനെ മറികടക്കാമെന്നും ആരോഗ്യ വിദഗ്ദര്‍ മനസിലാക്കി വരികയാണ്. തുടര്‍ച്ചയായി റീലുകള്‍ കാണുക, മണിക്കൂറോളം സ്ക്രോളിങ് ചെയ്യുക, ഫോണ്‍ ഉപയോഗിക്കാന്‍ കഴിയാതെ വരുമ്പോള്‍ അസ്വസ്ഥരാവുക ഇത്തരത്തിലുള്ള ശീലങ്ങളുള്ളയാളാണ് നിങ്ങളെങ്കില്‍ ഇനി പറയുന്ന കാര്യങ്ങള്‍ തീര്‍ച്ചയായും അറിഞ്ഞിരിക്കണം.
എന്താണ് സ്ക്രീന് അഡിക്ഷന്‍ ?
'സ്ക്രീന് അഡിക്ഷന്‍' എന്ന ഒരു രോഗാവസ്ഥ ഇത് വരെ കണ്ടെത്തിയിട്ടില്ല. എന്നാല്‍ അഡിക്ഷന്‍ മൂലം ഉണ്ടാവുന്ന അസാധാരണ പ്രവര്‍ത്തനങ്ങളെ ആരോഗ്യ വിദഗ്ദര്‍ വിലയിരുത്തിയിട്ടുണ്ട്. അമിത ഫോണ്‍ ഉപയോഗം, ഇത് പരിമിതപ്പെടുത്താനുള്ള ബുദ്ധിമുട്ട്, വിച്ഛേദിക്കപ്പെടുമ്പോള്‍ ഉണ്ടാകുന്ന ദേഷ്യം, സംതൃപ്തിക്കായി കൂടുതല്‍ സ്ക്രീന് സമയത്തിന്റെ ആവശ്യകത തുടങ്ങിയ പാറ്റേണുകളാണ് സ്ക്രീന് അഡിക്ഷന്‍ ഉള്ള ഒരു വ്യക്തിയില്‍ കണ്ടു വരുന്ന പ്രത്യേകതകള്‍. ഇത് പതിയെ നിങ്ങളുടെ ദൈനംദിന പ്രവര്‍ത്തനങ്ങളെ ബാധിക്കുകയും മാനസികാവസ്ഥയെ പ്രതികൂലമായി മാറ്റുകയും ചെയ്യും.
സ്ക്രീന് അമിത ഉപയോഗം ഉറക്കത്തെ എങ്ങനെ ബാധിക്കുന്നു ?
ഉറക്കത്തിലെ അസ്വസ്ഥതയാണ് പലപ്പോഴും ആദ്യം പ്രത്യക്ഷപ്പെടുന്ന ലക്ഷണമെന്നാണ് ആരോഗ്യ വിദഗ്ദര്‍ പറയുന്നത്. ഉറക്കക്കുറവിനുള്ള പ്രധാന ഘടകങ്ങളിലൊന്ന് രാത്രിയില്‍ ദീര്‍ഘനേരം സ്ക്രീന് കാണുന്നതാണ്. ഇത് ശാരീരിക പ്രവര്‍ത്തനങ്ങളെ കുറയ്ക്കുകയും ഉറക്കത്തിന്റെ ഗുണനിലവാരത്തെ കൂടുതല്‍ ദോഷകരമായി ബാധിക്കുകയും ചെയ്യുന്നു. സ്‌ക്രീനില്‍ നിന്നുള്ള നീല വെളിച്ചത്തിന്റെ എക്‌സ്‌പോഷര്‍ ഉറക്ക-ഉണര്‍വ് ചക്രങ്ങളെ നിയന്ത്രിക്കുന്ന ഹോര്‍മോണായ മെലറ്റോണിന്‍ തടസ്സപ്പെടുത്തുകയും ഉറക്കമില്ലായ്മ വഷളാക്കുകയും ചെയ്യും.
കുട്ടികളുടെ മസ്തിഷ്‌ക വികാസത്തില്‍ സ്വാധീനം
പ്രായമായവരെ അപേക്ഷിച്ച് കുട്ടികള്‍ സ്‌ക്രീനുകള്‍ക്ക് അടിമപ്പെടാന്‍ സാധ്യതയുള്ളവരാണ്. കുട്ടികളിലെ അമിതമായ സ്ക്രീന് ഉപയോഗം ശ്രദ്ധ, സ്വയം നിയന്ത്രണം, ഓര്‍മ്മശക്തി വികസനം എന്നിവയെ ബാധിക്കും. ഇത് സാമൂഹിക-വൈകാരിക കഴിവിനെ തടസ്സപ്പെടുത്തുകയും അനുചിതമായ അളവിലുള്ള ഉത്തേജനം കാരണം തലച്ചോറിന്റെ ന്യൂറോപ്ലാസ്റ്റിസിറ്റിയെ ദുര്‍ബലപ്പെടുത്തുകയും ചെയ്യും.
ശ്രദ്ധ കേന്ദ്രീകരിക്കുന്നതിലും അക്കാദമിക് പ്രകടനത്തിലും കുറവ്
സ്ഥിരമായ ശ്രദ്ധ, പ്രശ്‌നപരിഹാരം, മള്‍ട്ടിടാസ്‌കിംഗ്, ടാസ്‌ക് സ്വിച്ചിംഗ് എന്നിവയെല്ലാം അമിത സ്ക്രീൻ ടൈം ബാധിക്കും. 'ജോലിയുടെയും പഠനത്തിന്റെയും പ്രകടനം തകരാറിലാകുക, സ്‌ക്രീനുകളുടെ ടൈം കുറയുമ്പോൾ ഉത്കണ്ഠ ഉണ്ടാവുക തുടങ്ങി നിരവധി പ്രശ്നങ്ങൾ സ്ക്രീൻ അഡിക്ഷൻ മൂലം ഉണ്ടായേക്കാം.
കുട്ടികളിലെ സ്ക്രീൻ അഡിക്ഷൻ്റെ ലക്ഷണങ്ങൾ
ഗാഡ്ജെറ്റുകളില്‍ നിന്ന് അകന്നു നില്‍ക്കുമ്പോള്‍ കുട്ടികളിൽ ഉണ്ടാകുന്ന അസ്വസ്ഥത
സ്ക്രീന് ഉപയോഗിക്കാതെ വരുമ്പോൾ വിഷാദമോ ഉത്കണ്ഠയോ അനുഭവപ്പെടുന്നു
ഉറക്ക പ്രശ്‌നങ്ങള്‍, തലവേദന, കഴുത്ത് വേദന, കണ്ണിന്റെ ക്ഷീണം
ഹോബികളോ അക്കാദമിക് ജോലിയോ അവഗണിക്കല്‍
കുടുംബത്തില്‍ നിന്നും സുഹൃത്തുക്കളില്‍ നിന്നും സാമൂഹികമായി അകന്നു നില്‍ക്കല്‍
സ്ക്രീന് സമയത്തെക്കുറിച്ച് മറച്ചുവെക്കുകയോ കള്ളം പറയുകയോ ചെയ്യുക
സ്ക്രീൻ അഡിക്ഷൻ ഇതുവരെ ഒരു ഔദ്യോഗിക ഡയഗ്നോസ്റ്റിക് ലേബൽ ഇല്ല. പക്ഷേ അത് മൂലമുണ്ടാവുന്ന പാർശ്വഫലങ്ങൾ യഥാർത്ഥവും അസ്വസ്ഥത ഉളവാക്കുന്നതുമാണ്. ആരോഗ്യ വിദഗ്ദർ പറയുന്നത് പോലെ ഇത് യുവാക്കൾക്കിടയിലെ ഒരു നിശബ്ദ പ്രതിസന്ധിയാണ്. ഉറക്കം മുതൽ ഓർമ്മ, വൈകാരിക ക്ഷേമം വരെ എല്ലാത്തെയും ഇത് ബാധിക്കുന്നു. ആദ്യകാല ലക്ഷണങ്ങൾ തിരിച്ചറിയുകയും വീട്ടിലും, സ്കൂളുകളിലും, ജോലിസ്ഥലത്തും ആരോഗ്യകരമായ ശീലങ്ങൾ വളർത്തിയെടുക്കുകയും ചെയ്യുക എന്നതാണ് ഈ അദൃശ്യ കെണിയിൽ നിന്ന് മുക്തി നേടാനുള്ള ആദ്യപടി. ഇനി ഗുരുതര കേസുകളിൽ ആരോഗ്യ വിദഗ്ദരിൽ നിന്ന് സഹായം തേടാം.
Content Highlights- Scrolling gaming without day or night; Screen addiction is a silent crisis among young people
