തരൂർ മുഖ്യാതിഥിയാകുന്ന കോട്ടയത്തെ മഹാസമ്മേളനത്തിന് മാറ്റമില്ല; പരിപാടിയുമായി മുന്നോട്ടെന്ന് യൂത്ത് കോൺഗ്രസ്

കോട്ടയം: കോട്ടയത്ത് ശശി തരൂർ എം പിയെ മുഖ്യാതിഥിയായി പങ്കെടുപ്പിച്ച് നടത്തുന്ന മഹാസമ്മേളനത്തിന് മാറ്റമില്ല. ഡിസംബർ മൂന്നിന് ഈരാറ്റുപേട്ടയിൽ നടത്തുന്ന പരിപാടിയുമായി മുന്നോട്ട് പോകുമെന്ന് യൂത്ത് കോൺഗ്രസ് അറിയിച്ചു. ജില്ലാ കമ്മിറ്റി യോഗത്തിന്റേതാണ് തീരുമാനം. 38 അംഗ കമ്മിറ്റിയിൽ പരിപാടിക്കെതിരെ എതിർപ്പ് ഉന്നയിച്ചത് ആറുപേർ മാത്രമാണ്. വർഗീയ ഫാസിസത്തിനെതിരെ സന്ദേശം നൽകിയാണ് യൂത്ത് കോൺ​ഗ്രസ് മഹാസമ്മേളനം സംഘടിപ്പിക്കുന്നത്.

മഹാസമ്മേളനം സംഘടിപ്പിക്കാനുള്ള തീരുമാനത്തിനെതിരെ കോട്ടയം ജില്ലാ യൂത്ത് കോൺഗ്രസ് കമ്മിറ്റി യോഗത്തിൽ പ്രതിഷേധം ഉയർന്നിരുന്നു. പരിപാടി നടത്താനുള്ള തീരുമാനമെടുത്തത് ഏകപക്ഷീയമായാണ് എന്നായിരുന്നു ജില്ലാ കമ്മിറ്റി യോഗത്തിൽ ഒരു വിഭാഗം ഉയർത്തിയ ആരോപണം. ഉമ്മൻ ചാണ്ടിയുടെ പേര് അനാവശ്യമായി യോഗത്തിലേക്ക് വലിച്ചിഴച്ചെന്നും ഡിസിസി പ്രസിഡന്റ് നാട്ടകം സുരേഷിനെ അനുകൂലിക്കുന്ന ജില്ലാ ഭാരവാഹികളിൽ ചിലർ കുറ്റപ്പെടുത്തി.

മലബാർ സന്ദർശനത്തിന് പിന്നാലെ തരൂരിന്റെ പര്യടനം തെക്കൻ ജില്ലകളിലേക്ക് പ്രവേശിക്കുമെന്നാണ് ഇത് വ്യക്തമാക്കുന്നത്. കോട്ടയത്ത് കെ എം ചാണ്ടി അനുസ്മരണത്തിലും തരൂർ പങ്കെടുക്കും. തരൂരിന്റെ മലബാർ സന്ദർശനത്തിൽ കോൺ​ഗ്രസിനകത്ത് വിമർശനങ്ങളും കുറ്റപ്പെടുത്തലുകളും ഉയർന്നിരുന്നു. കോൺഗ്രസ് എംപി എന്ന നിലയിലാണ് തന്റെ പ്രവർത്തനമെന്നും, ഒരു വിഭാഗീയ പ്രവർത്തനവും നടത്തുന്നില്ലെന്നും തരൂർ കണ്ണൂരിൽ പറഞ്ഞിരുന്നു.

STORY HIGHLIGHTS: Youth Congress says there will be no change in Shashi Tharoor s Kottayam program