Top

'ഇന്ന് മാധ്യമങ്ങളെ കാണാന്‍ ഉദ്ദേശമില്ല'; ദേഹാസ്വസ്ഥ്യമെന്ന് സ്വപ്‌നാ സുരേഷ്

11 Jun 2022 5:09 AM GMT
റിപ്പോർട്ടർ നെറ്റ്‌വർക്ക്

ഇന്ന് മാധ്യമങ്ങളെ കാണാന്‍ ഉദ്ദേശമില്ല; ദേഹാസ്വസ്ഥ്യമെന്ന് സ്വപ്‌നാ സുരേഷ്
X

കൊച്ചി: സ്വർണക്കടത്ത് കേസിലെ വിവാദങ്ങൾക്കിടെ സ്വപ്ന സുരേഷിന് ദേഹാസ്വസ്ഥ്യം. സ്വപ്ന ഇന്ന് ഓഫീസിൽ എത്തില്ല. രണ്ട് ദിവസത്തെ വിശ്രമം ആവശ്യമാണ്. ഇന്ന് മാധ്യമങ്ങളെ കാണാനുദ്ദേശിക്കുന്നില്ലെന്നും എച്ച്ആര്‍ഡിഎസ് അറിയിച്ചു. മുഖ്യമന്ത്രിയുടേയും കോടിയേരി ബാലകൃഷ്ണന്റേയും ബിനാമിയാണ് ഷാജ് കിരണ്‍ എന്ന് കഴിഞ്ഞ ദിവസം പാലക്കാട് നടത്തിയ പത്രസമ്മേളനത്തില്‍ സ്വപ്‌ന സുരേഷ് ആരോപിച്ചിരുന്നു.

സ്വര്‍ണക്കടത്ത് കേസിലെ രഹസ്യമൊഴി മാറ്റാന്‍ ഷാജ് കിരണിലൂടെ സമ്മര്‍ദ്ദമുണ്ടായെന്ന് സ്വപ്ന സുരേഷ് ആരോപിച്ചു. ഷാജ് മാനസികമായി പീഡിപ്പിച്ചതുകൊണ്ടാണ് ഫോണ്‍ റെക്കോര്‍ഡ് ചെയ്തത്. ഞാന്‍ എച്ച്ആര്‍ഡിഎസിന്റെ തടവറയില്‍ അല്ല. ഈ മാനസിക പീഡനം താങ്ങാനാകുന്നില്ല. എച്ച്ആര്‍ഡിഎസ് തന്നെ സ്വാധീനിക്കുന്നില്ലെന്നും അവര്‍ പാലക്കാട് നടത്തിയ വാര്‍ത്താ സമ്മേളനത്തില്‍ പറഞ്ഞു. ഷാജ് കിരണുമായി നടത്തിയ ഫോണ്‍ സംഭാഷണം അവര്‍ പുറത്ത് വിട്ടു.

ഇതിനിടെ താൻ ഒളിവിലല്ലെന്നും അറസ്റ്റിനെ ഭയക്കുന്നില്ലെന്നും ഷാജ് കിരൺ വ്യക്തമാക്കി. സ്വപ്ന സുരേഷിനെതിരെ കൂടുതൽ തെളിവുകൾ പുറത്തു വിടും. ഇതിനായി ഇപ്പോള്‍ ചെന്നൈയിലേക്ക് പോയിക്കൊണ്ടിരിക്കുകയാണ്. സ്വപ്‌നയുമായി ബന്ധപ്പെട്ട ഡിലീറ്റഡ് വീഡിയോ വീണ്ടെടുക്കാനാണ് തങ്ങള്‍ ചെന്നൈയിലേക്ക് പോകുന്നതെന്നും ഷാജ് കിരണ്‍ റിപ്പോര്‍ട്ടര്‍ ടിവിയോട് പറഞ്ഞു.

Story Highlight: Swapna Suresh will not see media today due to health issues

Next Story