Top

പ്ലസ്ടു പരീക്ഷക്കൊപ്പം ലേണേഴ്‌സും, പക്ഷെ വാഹനം ഓടിക്കാന്‍ 18 ആകണം; പദ്ധതിയുമായി എംവിഡി

18 വയസ്സിന് ശേഷം മാത്രമാകും ലേണേഴ്‌സ് ലൈസന്‍സ് കൈയ്യില്‍ കിട്ടുക

17 Sep 2022 11:15 AM GMT
റിപ്പോർട്ടർ നെറ്റ്‌വർക്ക്

പ്ലസ്ടു പരീക്ഷക്കൊപ്പം ലേണേഴ്‌സും, പക്ഷെ വാഹനം ഓടിക്കാന്‍ 18 ആകണം; പദ്ധതിയുമായി എംവിഡി
X

തിരുവനന്തപുരം: ഹയര്‍സെക്കണ്ടറി പഠനത്തിനൊപ്പം ലേണേഴ്‌സ് ലൈസന്‍സും നല്‍കാന്‍ പദ്ധതി. ഇത് സംബന്ധിച്ച കരിക്കുലം മോട്ടോര്‍ വാഹന വകുപ്പ് വിദ്യാഭ്യാസ വകുപ്പിന് ഈ മാസം 28 ന് കൈമാറും. വിദ്യാഭ്യാസ വകുപ്പ് അംഗീകരിച്ചാല്‍ ഗതാഗത നിയമത്തില്‍ ഭേദഗതി വരുത്തും. എന്നാല്‍ 18 വയസ്സ് തികഞ്ഞാല്‍ മാത്രമാകും വാഹനം ഓടിക്കാന്‍ അനുമതി ലഭിക്കുക.

18 വയസ്സിന് ശേഷം മാത്രമാകും ലേണേഴ്‌സ് ലൈസന്‍സും കൈയ്യില്‍ കിട്ടുക. ഗതാഗത നിയമലംഘനങ്ങളും റോഡ് അപകടങ്ങളും വര്‍ധിച്ചു വരുന്ന പശ്ചാത്തലത്തിലാണ് മോട്ടോര്‍ വാഹനവകുപ്പിന്റെ നീക്കം. പ്ലസ്ടു പരീക്ഷക്കൊപ്പം ലേണേഴ്‌സ് ലൈസന്‍സ് കൂടി ഉള്‍പ്പെടുത്താമെന്നാണ് തീരുമാനം.

പ്ലസ്ടു സിലബസില്‍ ഗതാഗത നിയമങ്ങള്‍കൂടി വിദ്യാര്‍ത്ഥികളെ പഠിപ്പിക്കും. പരീക്ഷ പാസായാല്‍ 18 വയസ്സ് തികഞ്ഞ് ലൈസന്‍സിന് അപേക്ഷിക്കുന്ന സമയത്ത് ലേണേഴ്‌സ് പരീക്ഷ പ്രത്യേകമായി എഴുതേണ്ടി വരില്ല. അതേസമയം വിശദമായ പരിശോധനയ്ക്ക് ശേഷം മാത്രമേ ഇക്കാര്യത്തില്‍ വിദ്യാഭ്യാസ വകുപ്പ് അന്തിമ തീരുമാനം എടുക്കു.

കരിക്കുലം ഗതാഗത കമ്മീഷണര്‍ എസ് ശ്രീജിത്തിന്റെ നേതൃത്വത്തിലാണ് മോട്ടോര്‍ വാഹന വകുപ്പ് തയാറാക്കിയത്. ഇത് ഗതാഗതമന്ത്രി ആന്റണി രാജു ഈ 28ന് വിദ്യാഭ്യാസമന്ത്രി വി. ശിവന്‍കുട്ടിക്ക് കൈമാറും. സര്‍ക്കാരിന്റെ അംഗീകാരം ലഭിച്ചാല്‍ കേന്ദ്ര വാഹന ഗതാഗത നിയമത്തിലടക്കം മാറ്റം വരുത്തണം. അതിനായി കേന്ദ്ര സര്‍ക്കാരിനെ സമീപിക്കാനാണ് ഗതാഗത വകുപ്പിന്റെ തീരുമാനം.

Next Story