കഴിയുന്നതെല്ലാം ചെയ്യാന് ഓരോ മലയാളിയും ബാധ്യസ്ഥരാണ്, ദുരിതാശ്വാസനിധിയിലേക്ക് സംഭാവന ചെയ്യുക: ബേസിൽ

തിരുവനന്തപുരം: വയനാട് ഉരുള്പൊട്ടലിന്റെ പശ്ചാത്തലത്തില് മുഖ്യമന്ത്രിയുടെ ദുരിതാശ്വാസ നിധിയിലേക്ക് സഹായങ്ങള് തുടരുകയാണ്. ഇപ്പോഴിതാ ദുരിതാശ്വാസ നിധിയിലേക്ക് സംഭാവന നല്കാന് അഭ്യര്ത്ഥിച്ച് സംവിധായകനും നടനുമായ ബേസില് ജോസഫും രംഗത്തെത്തിയിരിക്കുകയാണ്. സോഷ്യല് മീഡിയയിലൂടെയായിരുന്നു താരത്തിന്റെ പ്രതികരണം.

'സമാനതകള് ഇല്ലാത്ത ദുരന്തമാണ് വയനാട്ടില് സംഭവിച്ചിരിക്കുന്നത് ദുരന്തനിവാരണത്തിനായി നമ്മളാല് കഴിയുന്നതെല്ലാം ചെയ്യാന് ഓരോ മലയാളിയും ബാധ്യസ്ഥരാണ്. ബഹുമാനപ്പെട്ട മുഖ്യമന്ത്രിയുടെ ദുരിതാശ്വാസ നിധിയിലേക്ക് കഴിവിന്റെ പരമാവധി സംഭാവന ചെയ്യുക', സോഷ്യല് മീഡിയ അക്കൗണ്ടുകളിലൂടെ പങ്കുവെച്ച വീഡിയോയിലൂടെ ബേസില് പറഞ്ഞു. ദുരിതാശ്വാസ നിധിയുടെ അക്കൗണ്ട് വിവരങ്ങളും താരം വീഡിയോയ്ക്ക് താഴെ കുറിച്ചിട്ടുണ്ട്.

വയനാട്ടിലെ ദുരിതബാധിതര്ക്കായി മുഖ്യമന്ത്രിയുടെ ദുരിതാശ്വാസ നിധിയിലേക്കുള്ള സഹായങ്ങള് ലോകത്തിന്റെ വിവിധഭാഗങ്ങളില് നിന്ന് എത്തുകയാണ്. ലുലു ഗ്രൂപ്പ് ചെയര്മാന് എംഎ യൂസഫലി, വ്യവസായി രവി പിള്ള, കല്യാണ് ജ്വല്ലേഴ്സ് ഉടമ കല്ല്യാണരാമന് എന്നിവര് അഞ്ച് കോടി രൂപ വീതം ധനസഹായം പ്രഖ്യാപിച്ചതായി മുഖ്യമന്ത്രി വാര്ത്താസമ്മേളനത്തില് വ്യക്തമാക്കി. വിഴിഞ്ഞം പോര്ട്ട് അദാനി ഗ്രൂപ്പ്, കെഎസ്എഫ്ഇ എന്നിവരും അഞ്ച് കോടി രൂപ വീതം പ്രഖ്യാപിച്ചിട്ടുണ്ട്.

മുഖ്യമന്ത്രിയുടെ ദുരിതാശ്വാസ നിധി; എംഎ യൂസഫലി, രവി പിള്ള, കല്യാണരാമൻ എന്നിവർ അഞ്ചുകോടി വീതം നൽകി

കാനറാ ബാങ്ക് ഒരുകോടി രൂപയും കെഎംഎംഎല് 50 ലക്ഷം രൂപയും വനിതാ വികസന കോര്പ്പറേഷന് 30 ലക്ഷം രൂപയും ഔഷധി ചെയര്പേഴ്സണ് ശോഭന ജോര്ജ്ജ് 10 ലക്ഷം രൂപയും നല്കി. തമിഴ്നാട് മുഖ്യമന്ത്രി പ്രഖ്യാപിച്ച അഞ്ചു കോടി രൂപ തമിഴ്നാട് പൊതുമരാമത്ത് മന്ത്രി ഇവി വേലു ഓഫീസില് എത്തി കൈമാറി. ടിബറ്റന് ആത്മീയ നേതാവ് ദലൈലാമയുടെ ട്രസ്റ്റ് 11 ലക്ഷം രൂപ സംഭാവനയായി പ്രഖ്യാപിച്ചിട്ടുണ്ട്. എല്ലാ മന്ത്രിമാരും ഒരു മാസത്തെ ശമ്പളം ദുരിതാശ്വാസനിധിയിലേക്ക് സംഭാവന നല്കാനും തീരുമാനിച്ചിട്ടുണ്ടെന്നും മുഖ്യമന്ത്രി അറിയിച്ചു. ദുബായ് ആസ്ഥാനമായി പ്രവര്ത്തിക്കുന്ന മലയാളികളുടെ സാംസ്കാരിക സംഘടനയായ ഓര്മ്മ മുഖ്യമന്ത്രിയുടെ ദുരിതാശ്വാസ നിധിയിലേക്ക് അടിയന്തിര സഹായമായി 10 ലക്ഷം രൂപ നല്കുമെന്ന് പ്രഖ്യാപിച്ചിട്ടുണ്ട്.