LIVE TV
പ്രവാസികൾ ഉൾപ്പെടെയുള്ള യുഎഇ നിവാസികളുടെ ആരോഗ്യ സംരക്ഷണം ലക്ഷ്യമിട്ട് സംഘടിപ്പിക്കുന്ന ദുബായ് ഫിറ്റ്‌നസ് ചലഞ്ചിന്റെ പത്താം പതിപ്പിന് വ്യാഴാഴ്ച തുടക്കമാകുന്നു. ഒക്ടോബർ 31 മുതൽ നവംബർ 29 വരെയാണ് ഒരു മാസം നീളുന്ന ഫിറ്റ്‌നസ് മാമാങ്കം അരങ്ങേറുന്നത്. ഡിജിറ്റൽ ഗോൾഫ് വിനോദങ്ങൾ മുതൽ ആകർഷകമായ സൂര്യാസ്തമയ യോഗ സെഷനുകൾ വരെ വൈവിധ്യമാർന്ന പരിപാടികളാണ് ഇത്തവണ പങ്കാളികളെ കാത്തിരിക്കുന്നത്.
ദുബായിലെ പ്രശസ്തമായ വിനോദസഞ്ചാര കേന്ദ്രങ്ങളായ കൈറ്റ് ബീച്ച്, സബീൽ പാർക്ക്, അൽ വർഖ പാർക്ക് എന്നിവിടങ്ങളിലാണ് പ്രധാന ഫിറ്റ്‌നസ് വില്ലേജുകൾ സജ്ജീകരിച്ചിരിക്കുന്നത്. കുടുംബങ്ങൾക്കും കുട്ടികൾക്കും ഒരുപോലെ ആസ്വദിക്കാൻ കഴിയുന്ന രീതിയിലാണ് കൈറ്റ് ബീച്ചിലെ പരിപാടികൾ ക്രമീകരിച്ചിരിക്കുന്നത്. വോളിബോൾ, ക്രിക്കറ്റ്, യോഗ, ബോക്‌സിംഗ് തുടങ്ങിയ ജനപ്രിയ ഇനങ്ങൾക്കൊപ്പം ഡിജിറ്റൽ ഫുട്‌ബോൾ, ഗോൾഫ് ഗെയിമുകൾ എന്നിവയും ഇത്തവണ പുതുതായി ഇവിടെ ഉൾപ്പെടുത്തിയിട്ടുണ്ട്.
വ്യത്യസ്ത തരം വ്യായാമമുറകൾ ഒരേ വേദിയിൽ ചെയ്യാൻ ആഗ്രഹിക്കുന്നവർക്കായി സബീൽ പാർക്കിൽ പ്രത്യേക ജിം സൗകര്യവും ഒരുക്കിയിട്ടുണ്ട്. ഇതിനുപുറമേ കുട്ടികൾക്കായുള്ള പ്രത്യേകം കളിസ്ഥലങ്ങളും പാർക്കിൽ സജ്ജമാണ്. എല്ലാ പ്രായക്കാർക്കും ഒരുപോലെ പങ്കെടുക്കാൻ കഴിയുന്ന കായികാനുഭവമാണ് ഈ കേന്ദ്രങ്ങൾ വാഗ്ദാനം ചെയ്യുന്നത്.
ദുബായ് ഫിറ്റ്‌നസ് ചലഞ്ചിന്റെ ഏറ്റവും വലിയ ആകർഷണങ്ങളായ ദുബായ് റൈഡ് സൈക്ലിംഗ് നവംബർ 1-നും, പ്രശസ്തമായ ഷെയ്ഖ് സായിദ് റോഡിലൂടെയുള്ള ദുബായ് റൺ ഓട്ടം നവംബർ 22-നും നടക്കും. ആയിരക്കണക്കിന് ആളുകളാണ് ഈ രണ്ട് പ്രധാന ഇവന്റുകളിൽ പങ്കെടുക്കാനായി എത്തുന്നത്.
നവംബർ 29-ന് നടക്കുന്ന പ്രത്യേക സൂര്യോദയ യോഗയോടെയായിരിക്കും ഒരു മാസം നീണ്ടുനിൽക്കുന്ന ഈ പരിപാടിക്ക് ഔദ്യോഗികമായി സമാപനമാകുക. ദുബായ് ഫിറ്റ്‌നസ് ചലഞ്ചിന്റെ ഔദ്യോഗിക വെബ്‌സൈറ്റ് വഴി പൊതുജനങ്ങൾക്ക് പൂർണ്ണമായും സൗജന്യമായി ഇതിൽ പങ്കാളികളാകാൻ പേര് രജിസ്റ്റർ ചെയ്യാവുന്നതാണ്.
Content Highlights: Dubai Fitness Challenge 2026 begins on October 31, inviting residents and visitors to enjoy 30 minutes of daily physical activity for 30 days, with fitness events, community activities and yoga.
