LIVE TV
തിരുവനന്തപുരം: കേരളത്തില് നിന്നടക്കം ഹജ്ജ് തീര്ത്ഥാടനത്തിന് തെരഞ്ഞെടുക്കപ്പെട്ട ഹാജിമാര്ക്ക് മെഡിക്കല് സര്ട്ടിഫിക്കറ്റ് സമര്പ്പിക്കാനുള്ള തീയതി നീട്ടി നല്കണമെന്ന് ആവശ്യപ്പെട്ട് സംസ്ഥാന ഹജ്ജ് വകുപ്പ് മന്ത്രി എന് ഷംസുദ്ദീന് കേന്ദ്ര ന്യൂനപക്ഷ കാര്യ മന്ത്രി കിരണ് റിജിജുവിന് കത്തയച്ചു. കേരളത്തില് നിന്ന് തെരഞ്ഞെടുക്കപ്പെട്ടവരില് നല്ലൊരു പങ്കും വിദേശത്ത് ജോലി ചെയ്യുന്നവരാണെന്നും ഹജ്ജ് കമ്മിറ്റി ഓഫ് ഇന്ത്യ നിഷ്കര്ഷിച്ചിട്ടുള്ള തരത്തിലുള്ള മെഡിക്കല് സ്ക്രീനിംഗ് സര്ട്ടിഫിക്കറ്റ് സെപ്റ്റംബര് 15-നകം ലഭ്യമാക്കാന് പലര്ക്കും പ്രയാസമുണ്ടെന്നും മന്ത്രി കത്തില് സൂചിപ്പിച്ചു.
വിദേശത്തെ സര്ക്കാര് സംവിധാനങ്ങളില് നിന്നും സ്വകാര്യ ആശുപത്രികളില് നിന്നും ഇത്തരം സര്ട്ടിഫിക്കറ്റുകള് ലഭിക്കുന്നതില് തടസ്സങ്ങളുണ്ട്. പല സ്ഥാപനങ്ങളും ഇവ നല്കാന് വിസമ്മതിക്കുന്നുണ്ടെന്നും കാണിച്ച് സംസ്ഥാന ഹജ്ജ് കമ്മിറ്റിക്ക് നിരവധി പരാതികള് ലഭിച്ചിട്ടുണ്ടെന്നും മന്ത്രി പറഞ്ഞു.
ഈ സാഹചര്യത്തില് മെഡിക്കല് സ്ക്രീനിംഗ് സര്ട്ടിഫിക്കറ്റ് സമര്പ്പിക്കാനുള്ള തീയതി നീട്ടാന് അടിയന്തര നടപടി സ്വീകരിക്കണമെന്നും പ്രവാസികളായ ഹാജിമാര്ക്ക് സര്ട്ടിഫിക്കറ്റ് നല്കാന് പ്രത്യേക സമയപരിധി അനുവദിക്കണമെന്നും മന്ത്രി ആവശ്യപ്പെട്ടു. ഈ വര്ഷത്തെ ഹജ്ജ് തീര്ത്ഥാടനം മലയാളികള് ഉള്പ്പെടെയുള്ള എല്ലാവര്ക്കും സുഗമമായി നിര്വഹിക്കാനുള്ള അവസരം ഒരുക്കണമെന്നും അദ്ദേഹം കേന്ദ്ര മന്ത്രിയോട് കത്തിലൂടെ അഭ്യര്ത്ഥിച്ചു.
Content Highlights: Kerala Hajj Minister N. Samsuddin has written to Union Minority Affairs Minister Kiren Rijiju, requesting an extension of the deadline for selected Hajj pilgrims, including those from Kerala, to submit their mandatory medical certificates.
