Get the latest news at
your fingertips!
Download our app now
LIVE TV
Search
സർഗ്ഗാത്മകതയുടെ നിറവിൽ ഇന്ത്യൻ സ്‌കൂളിന്റെ വാർഷിക യുവജനോത്സവമായ തരംഗിന്റെ സ്റ്റേജ് ഇതര ഇനങ്ങൾക്ക് തുടക്കമായി. മലയാളം, ഫ്രഞ്ച്, ഹിന്ദി, തമിഴ്, ഉറുദു ഭാഷകളിൽ ഉപന്യാസ രചനാ മത്സരത്തോടെയായിരുന്നു തുടക്കം. സെപ്റ്റംബർ 29 ന് ഇസ ടൗൺ കാമ്പസിൽ എല്ലാ തലങ്ങൾക്കുമായി ഇംഗ്ലീഷ് ഉപന്യാസ രചനാ മത്സരം നടന്നു. 6,000-ത്തിലധികം വിദ്യാർത്ഥികൾ മത്സരങ്ങളിൽ പങ്കാളിത്തം രേഖപ്പെടുത്തി.
'രാഷ്ട്രനിർമ്മാണത്തിൽ യുവാക്കളുടെ പങ്ക്' എന്ന സീനിയർ തലത്തിനുള്ള വിഷയം വിദ്യാർത്ഥികളുടെ അവബോധം പ്രതിഫലിപ്പിച്ചു. ഇംഗ്ലീഷ് ചെറുകഥ രചനയിലും ചിത്രരചനാ മത്സരത്തിലും നിരവധി വിദ്യാർത്ഥികൾ പങ്കെടുത്തു. ശനിയാഴ്ച ഇംഗ്ലീഷ് കവിതാ രചനയും പെൻസിൽ ഡ്രോയിംഗും രംഗോലി മത്സരവും നടന്നു. വർണ്ണാഭമായ പാറ്റേണുകൾ സൃഷ്ടിക്കുന്ന പരമ്പരാഗത ഇന്ത്യൻ നാടോടി കലയായ രംഗോലിയിൽ വിദ്യാർത്ഥികൾ സർഗ്ഗാത്മകത മാറ്റുരച്ചു.
ഒക്ടോബർ ഒമ്പതിന് വെള്ളിയാഴ്ച ഇസ ടൗൺ കാമ്പസിലെ ജഷൻമാൽ ഓഡിറ്റോറിയത്തിൽ ഫെസ്റ്റിവലിന്റെ സ്റ്റേജ് പരിപാടികൾ ഉദ്ഘാടനം ചെയ്യും. ഔപചാരിക ഉദ്ഘാടനത്തിന് ശേഷം നാടോടി നൃത്ത പ്രകടനം അരങ്ങേറും. ഇസ ടൗൺ, റിഫ കാമ്പസുകളിലെ ഏഴ് വേദികളിലായി പരിപാടികൾ നടക്കും. റിഫ കാമ്പസിൽ, ഭരതനാട്യം, കഥക് തുടങ്ങിയ ക്ലാസിക്കൽ വ്യക്തിഗത നൃത്ത പ്രകടനങ്ങൾ നടക്കും.
ഒക്ടോബർ 10, 11, 12, 13 തീയതികളിൽ സ്റ്റേജ് മത്സരങ്ങളും ഒക്ടോബർ 18, 25 തീയതികളിൽ ഡിബേറ്റ്, ക്വിസ് പരിപാടികളും നടക്കും. പ്രമുഖ ഇന്ത്യൻ ശാസ്ത്രജ്ഞരായ സി.വി. രാമൻ, ആര്യഭട്ട, വിക്രം സാരാഭായ്, ജെ.സി ബോസ് എന്നിവരുടെ പേരിലുള്ള നാല് ഹൗസുകളിൽ വിദ്യാർത്ഥികൾ മത്സരിക്കുന്നു. ഏറ്റവും ഉയർന്ന വ്യക്തിഗത പോയിന്റുകൾ നേടുന്ന വിദ്യാർത്ഥികൾക്ക് കലാരത്ന, കലാശ്രീ അവാർഡുകൾ സമ്മാനിക്കും. ഓരോ ഹൗസിന്റെയും മൊത്തത്തിലുള്ള പ്രകടനത്തെ അടിസ്ഥാനമാക്കി ഹൗസ് ചാമ്പ്യൻ അവാർഡുകളും നൽകും.
സ്കൂൾ ചെയർമാൻ അഡ്വ. ബിനു മണ്ണിൽ വറുഗീസ്, സെക്രട്ടറി വി. രാജപാണ്ഡ്യൻ, എക്സിക്യൂട്ടീവ് കമ്മിറ്റി അംഗങ്ങൾ, പ്രിൻസിപ്പൽ വി.ആർ പളനിസ്വാമി, സീനിയർ സ്കൂൾ & അക്കാദമിക് അഡ്മിനിസ്ട്രേഷൻ വൈസ് പ്രിൻസിപ്പൽ ജി. സതീഷ് എന്നിവർ വിദ്യാർത്ഥികളുടെ ഉത്സാഹപൂർവ്വമായ പങ്കാളിത്തത്തിന് അഭിനന്ദനങ്ങൾ അറിയിച്ചു. അതത് വേദികളിൽ ഗ്രൂപ്പ് ഇന സമ്മാനങ്ങൾ ഫലം പ്രഖ്യാപിക്കുമ്പോൾ തന്നെ നൽകും.
അതിനിടെ വ്യക്തിഗത പ്രകടനങ്ങൾക്കുള്ള സമ്മാനദാനം പിന്നീട് നടക്കുന്ന ഗ്രാൻഡ് ഫിനാലെയിൽ നടക്കും. ഇന്നലെ നടന്ന രംഗോലി മത്സര ഫലം ചുവടെ കൊടുക്കുന്നു : ലെവൽ എ: 1. ആര്യഭട്ട, 2. ജെ സി ബോസ്, 3. വിക്രം സാരാഭായ്. ലെവൽ ബി: 1. വിക്രം സാരാഭായ്, 2. സി വി രാമൻ, 3. ആര്യഭട്ട. ലെവൽ സി: സി വി രാമൻ, 2. ജെ സി ബോസ്, 3. വിക്രം സാരാഭായ്.
Content Highlights: Indian School Youth Festival in Bahrain brims with creativity
