LIVE TV
അഭിനയിക്കുകയാണെന്ന് തോന്നിപ്പിച്ചാല് അഭിനയം പരാജയപ്പെട്ടു എന്ന് നിരന്തരം ഓര്മ്മപ്പെടുത്തിയ നടനായിരുന്നു തിലകന്. വിസ്മയകരമാംവിധം വൈവിധ്യം പുലർത്തിയ സിനിമകൾ സമ്മാനിച്ച പ്രതിഭ കെ ജി ജോർജ് വിട പറഞ്ഞിട്ട് ഇന്നേക്ക് മൂന്ന് വർഷം. തിലകന്റെയും കെ ജി ജോർജിന്റെയും ഓർമ്മകളിൽ കുറിപ്പ് പങ്കുവെച്ചിരിക്കുകയാണ് ഷമ്മി തിലകൻ. ഇരുവരും വിടപറഞ്ഞത് ഒരേ ദിവസം തന്നെയാണെന്നത് കാലം കരുതിവെച്ച ഒരു വിചിത്രമായ നിയോഗമെന്ന് ഷമ്മി തിലകൻ. ചില മഹാപ്രതിഭകള് അരങ്ങൊഴിഞ്ഞാലും അവരുടെ കാലൊച്ചയും ശബ്ദഗാംഭീര്യവും എന്നെന്നും വേദിയെ പ്രകമ്പനം കൊള്ളിച്ചുകൊണ്ടേയിരിക്കുമെന്നും ഷമ്മി കുറിച്ചു.
ഫേസ്ബുക്ക് പോസ്റ്റിന്റെ പൂർണരൂപം
"All the world’s a stage, And all the men and women merely players; They have their exits and their entrances, And one man in his time plays many parts…" - William ഷേക്സ്പേരെ അര്ത്ഥവത്തായ വരികള്..! എന്നാൽ ചില മഹാപ്രതിഭകള്, തങ്ങളുടെ വേഷങ്ങൾ പൂർത്തിയാക്കി അരങ്ങൊഴിഞ്ഞാലും അവരുടെ കാലൊച്ചയും ശബ്ദഗാംഭീര്യവും എന്നെന്നും വേദിയെ പ്രകമ്പനം കൊള്ളിച്ചുകൊണ്ടേയിരിക്കും..! ഇന്ന് സെപ്റ്റംബർ 24. എന്റെ ജീവിതത്തെയും കലയെയും ഒരുപോലെ നിർവ്വചിച്ച രണ്ട് മഹാപ്രതിഭകൾ കാലത്തിന്റെ യവനികയ്ക്കുള്ളിൽ മറഞ്ഞ ദിവസം..! രക്തബന്ധത്തിന്റെ മായാത്ത തണലിൽ നിര്ത്തി, നടനത്തിന്റെ മഹാസമുദ്രത്തില് നീന്തിത്തുടിക്കാന് പ്രചോദനമേകിയ പിതാവിന്റേയും; 'ഇരകൾ' എന്ന വിസ്മയ ചിത്രത്തിലൂടെ സിനിമാലോകത്തേക്ക് കൈപിടിച്ചുയർത്തി, സിനിമയുടെ യഥാർത്ഥ സൗന്ദര്യശാസ്ത്രം പകർന്നുതന്ന എന്റെ സമാരാധ്യനായ ഗുരു കെ. ജി. ജോർജ്ജ് സാറിന്റേയും ഓർമ്മ ദിവസം..!'
'2012-ല് അച്ഛനും, 2023-ല് ജോർജ്ജ് സാറും വിടപറഞ്ഞത് ഒരേ ദിവസം തന്നെയാണെന്നത് കാലം കരുതിവെച്ച ഒരു വിചിത്രമായ നിയോഗം..! "ഞാൻ നന്നായി പൊരുതി ; എന്റെ ഓട്ടം പൂര്ത്തിയാക്കി ; വിശ്വാസം കാത്തു." (2 തിമോത്തേയോസ് 4:7) എന്ന ബൈബിള് വചനം അന്വർത്ഥമാക്കി, കലയിലും ജീവിതത്തിലും തരിമ്പുപോലും വിട്ടുവീഴ്ച ചെയ്യാതെ പൊരുതിയ രണ്ട് കർമ്മയോഗികളായിരുന്നു അവർ. "നിന്റെ വചനം എന്റെ കാലുകൾക്കു ദീപവും എന്റെ പാതയ്ക്കു പ്രകാശവുമാകുന്നു…" എന്ന സങ്കീർത്തന വരികൾ പോലെയായിരുന്നു ഇരുവരും എനിക്ക്. പ്രതിസന്ധികളിൽ തളരാതെ എങ്ങനെ ഒരു മനുഷ്യനായി ആർജ്ജവത്തോടെ തലയുയർത്തി ജീവിക്കണമെന്ന് സ്വന്തം ജീവിതത്തിലൂടെ അച്ഛൻ പഠിപ്പിച്ചപ്പോൾ, ക്യാമറയ്ക്ക് മുന്നിൽ കഥാപാത്രങ്ങളുടെ ആത്മാവിലേക്ക് എങ്ങനെ കണ്ണുതുറക്കണമെന്ന് ജോർജ് സാറില് നിന്നും ഞാന് മനസ്സിലാക്കി. അഭിനയത്തിന്റെ അനന്തസാധ്യതകൾ അച്ഛൻ പകർന്നുതന്നപ്പോൾ, സിനിമയെക്കുറിച്ചുള്ള പുതിയ കാഴ്ചപ്പാടുകൾ ജോർജ് സാർ സമ്മാനിച്ചു'.
'ഷേക്സ്പിയർ പറഞ്ഞതുപോലെ, തങ്ങളുടെ വേഷപ്പകർച്ചകൾ പൂർത്തിയാക്കി കാലത്തിന്റെ മറ്റൊരു വേദിയിലേക്ക് അവർ യാത്രയായിട്ടുണ്ടാകാം. എങ്കിലും മരണത്തിന് മായ്ക്കാൻ കഴിയാത്ത വിധം അവർ സൃഷ്ടിച്ച വിസ്മയങ്ങളിലൂടെ, അവർ കൊത്തിയുണ്ടാക്കിയ മാതൃകകളിലൂടെ ഇന്നും നമ്മോടൊപ്പം അവർ ജീവിക്കുന്നു. ഒരിക്കലും അസ്തമിക്കാതെ വിണ്ണിൽ ജ്വലിച്ചുനിൽക്കുന്ന രണ്ട് ധ്രുവനക്ഷത്രങ്ങള്.! എന്റെ രാപ്പകലുകളിൽ ഇന്നും വഴികാട്ടുന്ന വെളിച്ചമായി നിലകൊള്ളുന്ന പുണ്യങ്ങൾ..!! ആദരവോടെ ശിരസ്സ് നമിക്കുന്നു…', ഷമ്മി കുറിച്ചു.
Content Highlights: Shammy Thilakan Posts a note on Thilakans and K G George death anniversary
