LIVE TV
കഥാപാത്രത്തിനായി ഒന്നര വര്ഷം നീണ്ട കഠിന പരിശീലനത്തിലൂടെ തന്റെ ശരീരം പൂര്ണമായി മാറ്റിയെടുത്ത് നടൻ കാർത്തിക് ആര്യൻ. 'ചന്ദു ചാംപ്യന്' എന്ന ചിത്രത്തിലെ വേഷത്തിന് വേണ്ടിയാണ് നടൻ ഇത്രയും വലിയ ട്രാൻസ്ഫോർമേഷൻ നടത്തിയത്. ഇപ്പോള് ചിത്രത്തിലെ പ്രകടനത്തിന് ദേശീയ പുരസ്കാരം ലഭിച്ചതോടെ, ഒന്നര വര്ഷത്തെ കഠിനാധ്വാനം വീണ്ടും സോഷ്യൽ മീഡിയയിൽ ചര്ച്ചയാകുകയാണ്.
കാര്ത്തിക്കിന്റെ ഈ മാറ്റത്തിന് പിന്നില് 18 മാസത്തെ കഠിന പരിശീലനമായിരുന്നു. ബോക്സിങ്, മസില് ട്രെയിനിങ്, വിവിധ തരത്തിലുള്ള തീവ്രമായ വര്ക്കൗട്ടുകള് എന്നിവ പരിശീലനത്തിന്റെ ഭാഗമായിരുന്നു. ഫിറ്റ്നസ് ട്രെയിനര് ത്രിദേവ് പാണ്ഡെയുടെ നേതൃത്വത്തിലായിരുന്നു പരിശീലനം. തുടക്കത്തില് ജിമ്മില് പോകാന് മടിച്ചിരുന്ന ഒരാളില് നിന്ന് ഫിറ്റ്നസിനെ ജീവിതത്തിന്റെ ഭാഗമാക്കിയ ഒരാളിലേക്കുള്ള യാത്രയായിരുന്നു ഇതെന്ന് കാര്ത്തിക് തന്നെ പറഞ്ഞിട്ടുണ്ട്. ഒരു ഘട്ടത്തില് അമ്മ ജിമ്മില് പോകാന് പറയുന്നതിന് പകരം ജിമ്മില് നിന്ന് തിരിച്ചുവരാന് വിളിക്കുന്ന അവസ്ഥയിലെത്തിയെന്ന് താരം തമാശയായി കുറിക്കുകയും ചെയ്തു.
ചന്ദു ചാംപ്യനില് ഇന്ത്യയുടെ പാരാലിമ്പിക് സ്വര്ണമെഡല് ജേതാവ് മുരളികാന്ത് പേട്കറുടെ ജീവിതമാണ് കാര്ത്തിക് അവതരിപ്പിച്ചത്. മസില് ബില്ഡിങ് മാത്രമായിരുന്നില്ല താരത്തിന്റെ പരിശീലനം. ഒരു കായികതാരത്തിന്റെ ശരീരഭാഷയും ബോക്സിങ് ശൈലിയും സ്വന്തമാക്കുന്നതും തയ്യാറെടുപ്പിന്റെ ഭാഗമായിരുന്നു. ചിത്രത്തിന്റെ കഥ പ്രചോദനകരമാണെങ്കില് അതിന് വേണ്ടി കാര്ത്തിക് നടത്തിയ യാത്രയും അത്രതന്നെ പ്രചോദനകരമാണെന്നായിരുന്നു കാര്ത്തിക്കിന്റെ ട്രാൻസ്ഫോർമേഷനെക്കുറിച്ച് കബീര് ഖാന് നേരത്തെ പറഞ്ഞത്.
'ചന്ദു ചാംപ്യന്' ഒരുക്കുന്നതിനായി സംവിധായകന് കബീര് ഖാന് കാര്ത്തിക്കിനെ സമീപിക്കുമ്പോള് താരത്തിന്റെ ശരീരത്തിലെ കൊഴുപ്പിന്റെ അളവ് 39 ശതമാനമായിരുന്നുവെന്ന് അദ്ദേഹം നേരത്തെ വെളിപ്പെടുത്തിയിരുന്നു. എന്നാല് പരിശീലനം പൂര്ത്തിയാക്കി ചിത്രീകരണത്തിനെത്തിയപ്പോള് അത് വെറും 7 ശതമാനമായി കുറഞ്ഞിരുന്നു. സ്റ്റിറോയിഡുകള് ഉപയോഗിക്കാതെയായിരുന്നു ഈ മാറ്റമെന്നും കബീര് ഖാന് വ്യക്തമാക്കിയിരുന്നു.
Content Highlights: karthik aryans body transformation viral in social media
