LIVE TV
മോഹിത് സൂരി സംവിധാനം ചെയ്ത് അഹാൻ പാണ്ഡെ, അനീറ്റ് പദ്ദ എന്നിവർ കേന്ദ്രകഥാപാത്രങ്ങളായി എത്തിയ 'സൈയാരാ' എന്ന ചിത്രം ബോക്സ് ഓഫീസിനെ പിടിച്ചുലയ്ക്കുന്ന കാഴ്ച്ചയാണുണ്ടാകുന്നത്. മികച്ച പ്രതികരണം നേടുന്ന സിനിമയ്ക്ക് വലിയ തിരക്കാണ് തിയേറ്ററുകളിൽ ഉണ്ടാകുന്നത്. ചിത്രം ആഗോള തലത്തിൽ സിനിമ 500 കോടി പിന്നിട്ടു.
ഇന്ത്യൻ നിന്ന് 370 കോടിയും ഓവർസീസ് മാർക്കറ്റിൽ നിന്ന് 139 കോടിയുമാണ് സൈയാരായുടെ കളക്ഷൻ ഇതോടെ സിനിമയുടെ ആഗോള കളക്ഷൻ 509 കോടിയായി. വെറും 45 കോടി ബജറ്റിലാണ് സിനിമ ഒരുങ്ങിയത്. അങ്ങനെ നോക്കുമ്പോൾ ബോളിവുഡ് കണ്ട ഏറ്റവും വലിയ വിജയത്തിലേക്കാണ് സിനിമയുടെ പോക്ക്. ഇന്ത്യന് സിനിമയില് എല്ലാ ഭാഷകളും എടുത്താലും ഈ വര്ഷം 500 കോടിക്ക് മുകളില് നേടുന്ന രണ്ടാമത്തെ ചിത്രമായിരിക്കും സൈയാര. ബോളിവുഡ് ചിത്രം ഛാവ മാത്രമാണ് ഈ വര്ഷം ആ നേട്ടം സ്വന്തമാക്കിയിട്ടുള്ളത്. ഇന്ത്യയില് നിന്ന് ഛാവ മാത്രം 693 കോടി നേടിയിരുന്നു. ഇപ്പോൾ സൈയാരാ ഛാവയുടെ ഈ നേട്ടത്തെയും മറികടക്കുമോ എന്നാണ് എല്ലാവരും ഉറ്റുനോക്കുന്നത്.
ഇന്ത്യന് സിനിമയില് ഈ വര്ഷത്തെ ടോപ്പ് കളക്ഷന് ചിത്രങ്ങളിലൊന്നായ എമ്പുരാനെ ഇതിനകം മറികടന്നിട്ടുണ്ട് സൈയാര. 265 കോടിയോളമായിരുന്നു എമ്പുരാന്റെ ആഗോള കളക്ഷന്. ഈ വർഷം പുറത്തുവന്ന ആമിർ ഖാൻ, സൽമാൻ ഖാൻ, അക്ഷയ് കുമാർ ചിത്രങ്ങളെയെല്ലാം സൈയാരാ ഇതിനോടകം മറികടന്നു. സൽമാൻ ഖാൻ ചിത്രമായ സിക്കന്ദർ, ആമിർ ചിത്രം സിത്താരെ സമീൻ പർ, അക്ഷയ് കുമാർ ചിത്രങ്ങളായ കേസരി ചാപ്റ്റർ 2, ഹൗസ്ഫുൾ 5 എന്നീ സിനിമകളെയാണ് കളക്ഷനിൽ സൈയാരാ മറികടന്നിരിക്കുന്നത്.
ആഷിഖി 2 , ഏക് വില്ലൻ തുടങ്ങിയ സിനിമകളിലൂടെ പ്രേക്ഷക ശ്രദ്ധ നേടിയ സംവിധായകനാണ് മോഹിത് സൂരി. അദ്ദേഹത്തിന്റെ ചിത്രത്തിലെ ഗാനങ്ങൾ എല്ലാം വലിയ സ്വീകാര്യത നേടുക പതിവാണ്. സൈയാരായിലെ ഗാനങ്ങളും വലിയ ശ്രദ്ധ നേടുന്നുണ്ട്. യഷ് രാജ് ഫിലിംസിന്റെ ബാനറിൽ ആദിത്യ ചോപ്ര ആണ് സിനിമ നിർമിക്കുന്നത്. സങ്കല്പ് സദാനഹ്, രോഹൻ ശങ്കർ എന്നിവരാണ് സിനിമയുടെ എഴുത്തുകാർ. വികാസ് ശിവരാമൻ ആണ് സിനിമയുടെ ഛായാഗ്രഹണം നിർവഹിക്കുന്നത്.
Content Highlights: Saiyaara 500 crores box office collection
