Get the latest news at
your fingertips!
Download our app now
LIVE TV
Search
കമൽഹാസൻ-മണിരത്‌നം ടീമിന്റെ പുതിയ ചിത്രം തഗ് ലൈഫ് തിയേറ്ററുകളിൽ പ്രദർശനം തുടരുകയാണ്. വലിയ താരനിര ഭാഗമായ സിനിമ ആദ്യദിനം മുതൽ തണുപ്പൻ പ്രകടനമാണ് ബോക്സ് ഓഫീസിൽ കാഴ്ചവെക്കുന്നതും. ഇപ്പോഴിതാ സിനിമയിലെ താരങ്ങളുടെ പ്രതിഫല സംബന്ധിച്ച റിപ്പോർട്ടുകൾ ശ്രദ്ധ നേടുകയാണ്.
കമൽഹാസനും മണിരത്‌നവും ചേർന്ന് നിർമിച്ച സിനിമയിൽ ഏറ്റവും അധികം പ്രതിഫലം കൈപ്പറ്റിയത് സിലമ്പരശനാണെന്നാണ് പിങ്ക് വില്ല ഉൾപ്പടെയുള്ള മാധ്യമങ്ങൾ റിപ്പോർട്ട് ചെയ്യുന്നത്. അമരൻ എന്ന കഥാപാത്രത്തെ അവതരിപ്പിക്കുന്നതിന് നടന് 40 കോടി രൂപയാണ് പ്രതിഫലം. നടന്റെ കരിയറിലെ ഏറ്റവും വലിയ പ്രതിഫലമാണിത്.
ഇന്ദ്രാണി എന്ന കഥാപാത്രം അവതരിപ്പിക്കുന്നതിന് 12 കോടി രൂപയാണ് തൃഷയുടെ പ്രതിഫലം. ഗുഡ് ബാഡ് അഗ്ലി എന്ന മുൻ ചിത്രത്തിലെ അഭിനയത്തിന് തൃഷയ്ക്ക് ലഭിച്ച പ്രതിഫലത്തിന്റെ മൂന്നിരട്ടിയാണിത്. ആ ചിത്രത്തിൽ തൃഷയ്ക്ക് നാല് കോടി രൂപയായിരുന്നു പ്രതിഫലം. തഗ് ലൈഫിനായി ജോജു ജോർജ് ഒരു കോടിയും അഭിരാമി 50 ലക്ഷവും പ്രതിഫലം കൈപറ്റിയതായും റിപ്പോർട്ടുകളുണ്ട്.
അതേസമയം തഗ് ലൈഫ് ബോക്സ് ഓഫീസിൽ കിതയ്ക്കുന്ന കാഴ്ചയാണുള്ളത്. മൂന്ന് ദിവസം കൊണ്ട് സിനിമ ഇന്ത്യൻ ബോക്സ് ഓഫീസിൽ നിന്ന് 30.15 കോടിയാണ് നേടിയത്. മൂന്നാം ദിനമായ ഇന്നലെ 7.5 കോടിയാണ് സിനിമ കളക്ട് ചെയ്തത്. ചിത്രം പ്രേക്ഷകരുടെ പ്രതീക്ഷയ്ക്കൊത്ത് ഉയര്‍ന്നില്ലെന്നും നിരാശരാക്കിയെന്നുമാണ് സോഷ്യൽമീഡിയയിൽ പങ്കുവച്ച അഭിപ്രായങ്ങൾ തെളിയിക്കുന്നത്. മണിരത്നത്തിൽ നിന്നും ഇങ്ങനെയൊരു ചിത്രം പ്രതീക്ഷിച്ചില്ലെന്നും പറയുന്നവരുണ്ട്.
ജോജു ജോർജ്, തൃഷ, അഭിരാമി, ഐശ്വര്യ ലക്ഷ്മി, നാസർ, അശോക് സെല്‍വന്‍, അലി ഫസല്‍, ജിഷു സെന്‍ഗുപ്ത, സാന്യ മല്‍ഹോത്ര, രോഹിത് ഷറഫ്, വൈയാപുരി തുടങ്ങിയവരാണ് സിനിമയിലെ മറ്റു കഥാപാത്രങ്ങളെ അവതരിപ്പിക്കുന്നത്. രാജ്കമൽ ഫിലിംസ് ഇന്റർനാഷണൽ, മദ്രാസ് ടാക്കീസ്, റെഡ് ജയന്റ് മൂവീസ്, ആർ മഹേന്ദ്രൻ, ശിവ അനന്ത് എന്നിവർ ചേർന്നാണ് ചിത്രത്തിന്റെ നിർമ്മാണം.
Content Highlights: Thug Life stars remuneration
