LIVE TV
നടൻ സലിം കുമാറിനെതിരെ വിനായകൻ നടത്തിയ പരോക്ഷ വിമർശനത്തിൽ പ്രതികരണവുമായി സലിം കുമാറിന്റെ മകനും നടനുമായ ചന്തു സലിം കുമാര്‍. സീനിയർ നടന്മാർ തന്നെ മാറ്റി നിർത്തിയപ്പോൾ നിന്റെ അച്ഛനാണ് ഒപ്പം നിന്നത് എന്നായിരുന്നു ഒരിക്കൽ തന്നെ കണ്ടപ്പോൾ വിനായകൻ പറഞ്ഞത്. ഇപ്പോൾ അതേ വ്യക്തിയാണ് അച്ഛനെ വിമർശിക്കുന്നതെന്ന് ചന്തു പറഞ്ഞു. ഫേസ്ബുക്കിലെ സിനിമാ കൂട്ടായ്മയായ സിനിമാ പാരഡൈസോ ക്ലബ്ബിലെ ഒരു പോസ്റ്റിന് മറുപടിയായാണ് ചന്തുവിന്റെ പ്രതികരണം.
'വിനായകന്‍ എന്നെ ആദ്യം കണ്ടപ്പോള്‍ എന്നോട് പറഞ്ഞൊരു കാര്യമുണ്ട്. ഈ സീനിയര്‍ നടന്മാരെന്നു പറയണവന്മാരൊക്കെ എന്നെ മാറ്റി നിര്‍ത്തുമായിരുന്നടാ.. നിന്റെ അച്ഛനില്ലേ, അയാള്‍ മാത്രമേ എന്നെ കൂടെ നിര്‍ത്തിയിട്ടൊള്ളു.. അതാണെടാ അയാളുടെ ക്വാളിറ്റി എന്നാണ്. ഇതേ ആള് തന്നെയാണ് ഇതും പറയുന്നത്. ഡ്രഗ് എക്‌സ്‌പ്ലോയിറ്റ് ചെയ്യുന്ന ഒരാളെ എത്രത്തോളം അത് ബാധിക്കുന്നുണ്ടെന്ന് മനസ്സിലാക്കണം. അയാള്‍ക്ക് ആര് എന്തെന്ന് പോലും മനസ്സിലാകുന്നില്ല,' എന്ന് ചന്തു സലിംകുമാർ കുറിച്ചു.
'അയാൾ ഇതുവരെ പോയിട്ടുള്ള പരിപാടികള്‍ എല്ലാം ഒന്നെങ്കില്‍ ബോധവല്‍ക്കരണ ക്ലാസുകള്‍ അല്ലെങ്കില്‍ സാമൂഹികസമ്മേളനങ്ങള്‍. അവിടെയെല്ലാം അയാളെ കേള്‍ക്കാന്‍ വരുന്നവരോടാണ് അയാള്‍ സംസാരിക്കുന്നത്. അവിടെയെല്ലാം പോയിരുന്ന്, എന്നെപോലെ എല്ലാവരും കുടിച്ച് ലിവര്‍ സിറോസിസ് വരുത്തി വെക്കു എന്ന് പറയാന്‍ പറ്റില്ലല്ലോ. അനുഭവിക്കുന്നവര്‍ക്കല്ലേ അതിന്റെ ദൂഷ്യഫലങ്ങള്‍ അറിയാനും അത് പറഞ്ഞു മനസ്സിലാക്കാനും പറ്റുകയുള്ളു. ഡ്രഗ്‌സിനെതിരെ പറയുന്നത് ക്രൈം ആണെന്ന് ഇതുവരെ അറിവില്ല. ഇവിടെ ഓരോ ആളുകള്‍ കാര്യങ്ങള്‍ മനസ്സിലാക്കി തിരിച്ചു ജീവിതം പിടിച്ചെടുക്കുവാന്‍ നോക്കുന്നു. വീട്ടില്‍ അമ്മയെയും പെങ്ങളെയും ഒക്കെ ആരെങ്കിലും കമന്റ് അടിച്ചാല്‍, കൊഴപ്പമില്ല ഭാഷ ഇച്ചിരി മോശം ആണെന്നെല്ലേ ഉള്ളു.. പ്രശ്‌നമാക്കണ്ട എന്ന് പറയുമായിരിക്കും അല്ലേ?' എന്നും ചന്തു ചോദിച്ചു.
കഴിഞ്ഞ ദിവസമാണ് വിനായകൻ സലിം കുമാറിന്റെ പേര് പരാമർശിക്കാതെ സമൂഹ മാധ്യമങ്ങളിൽ കുറിപ്പ് പങ്കുവെച്ചത്. മദ്യപിച്ച് ആരോഗ്യം നശിച്ചവർ പൊതു വേദിയിൽ വന്നിരുന്ന് ലഹരിയെക്കുറിച്ച് സംസാരിക്കുന്നു. ടെക്നോളജിയെ കുറിച്ച് ഒന്നും അറിയാത്തവരാണോ യുവതീ യുവാക്കളെ ഉപദേശിക്കുന്നത് എന്നായിരുന്നു വിനായകൻ കുറിച്ചത്. പിന്നാലെ നടൻ ഈ പോസ്റ്റ് പിൻവലിക്കുകയുമുണ്ടായി.
Content Highlights: Chanthu Salim Kumar comments on the statement by Vinayakan
