Top

'ഇഷ്ടമുള്ള വസ്ത്രം ഇടുകയോ ഇടാതിരിക്കുകയോ ചെയ്യട്ടെ, ആര്‍ക്കാണ് കുഴപ്പം?'; 'പത്താന്‍' ഗാനവിവാദത്തില്‍ ബൈജു

ഒരുപാട് വസ്ത്രങ്ങള്‍ ആ ഗാനരംഗത്തില്‍ മാറിമാറി വരുന്നുണ്ട്. പിന്നെന്താണ് കുഴപ്പമെന്നും ബൈജു

20 Dec 2022 11:31 AM GMT
ഫിൽമി റിപ്പോർട്ടർ

ഇഷ്ടമുള്ള വസ്ത്രം ഇടുകയോ ഇടാതിരിക്കുകയോ ചെയ്യട്ടെ, ആര്‍ക്കാണ് കുഴപ്പം?; പത്താന്‍ ഗാനവിവാദത്തില്‍ ബൈജു
X

കൊച്ചി: പത്താന്‍ സിനിമയിലെ 'ബേഷാരം രംഗ്' ഗാന വിവാദത്തില്‍ പ്രതികരണവുമായി നടന്‍ ബൈജു സന്തോഷ്. അവരവര്‍ക്ക് ഇഷ്ടമുള്ള വസ്ത്രം ധരിക്കുകയോ, ധരിക്കാതിരിക്കുകയോ ചെയ്യട്ടേയെന്നായിരുന്നു ബൈജുവിന്റെ പ്രതികരണം. ഷാഫി സംവിധാനം ചെയ്യുന്ന 'ആനന്ദം പരമാനന്ദം' സിനിമയുടെ പ്രൊമോഷന്റെ ഭാഗമായി വിളിച്ചുചേര്‍ത്ത വാര്‍ത്താസമ്മേളനത്തിലായിരുന്നു നടന്‍ തന്റെ നിലപാട് വ്യക്തമാക്കിയത്.

'അവര്‍വര്‍ക്ക് ഇഷ്ടമുള്ള വസ്ത്രം അവര്‍ ഇടുകയോ ഇടാതിരിക്കുകയോ ചെയ്യട്ടേ. ഇവിടെ ആര്‍ക്കാണ് ഇത്ര കുത്തിക്കഴപ്പ്?. അവനവന്റെ കാര്യം നോക്കി നടന്നാല്‍ പോരെ. എന്തിനാണ് മറ്റുള്ളവരിലേക്ക് നോക്കുന്നത്. സ്വന്തം വീട്ടില്‍ എന്ത് നടക്കുന്നു എന്നതല്ല അയല്‍വക്കത്തെ വീട്ടില്‍ എന്ത് നടക്കുന്നു എന്നാണ് നോക്കുന്നത്. എന്തിനാണ് അത്', ബൈജു ചോദിച്ചു.

മാത്രമല്ല ഗാനരംഗത്തില്‍ ഒരു കളറിലുള്ള വസ്ത്രം മാത്രമല്ലല്ലോ ഇട്ടിരിക്കുന്നതെന്ന് നടന്‍ പറഞ്ഞു. ഒരുപാട് വസ്ത്രങ്ങള്‍ ആ ഗാനരംഗത്തില്‍ മാറിമാറി വരുന്നുണ്ട്. പിന്നെന്താണ് കുഴപ്പമെന്നും ബൈജു ചോദിച്ചു.

'പത്താന്‍' എന്ന ചിത്രത്തിലെ ആദ്യ വീഡിയോ ഗാനം കഴിഞ്ഞ ദിവസമാണ് പുറത്തിറങ്ങിയത്. ഗാനരംഗത്തില്‍ ദീപിക ഓറഞ്ച് ബിക്‌നിയണിഞ്ഞതാണ് ഒരു വിഭാഗമാളുകള്‍ വിവാദമാക്കിയത്. കഴിഞ്ഞ ദിവസം ഗാനത്തിനെതിരെ മധ്യപ്രദേശ് ആഭ്യന്തര മന്ത്രി നരോത്തം മിശ്രയും രംഗത്തെത്തിയിരുന്നു. ദീപികയുടെ വസ്ത്രധാരണത്തിലും സിനിമയിലെ ഗാനരംഗത്തിലും തിരുത്തല്‍ നടത്തേണ്ടതുണ്ട്. അവ ശരിയാക്കണം. അല്ലെങ്കില്‍ ഈ സിനിമ മധ്യപ്രദേശില്‍ പ്രദര്‍ശിപ്പിക്കുകയില്ല എന്നായിരുന്നു നരോത്തം മിശ്രയുടെ ആരോപണം.

Story highlights: Actor Baiju's reaction on Deepika's dress on Besharam rang song

Next Story