LIVE TV
ആർട്ടിഫിഷ്യൽ ഇന്റലിജൻസ് സാങ്കേതികവിദ്യ ഉപയോഗിച്ച് നിർമ്മിക്കുന്ന ഗാനങ്ങൾ തിരിച്ചറിയുന്നതിനായി യൂട്യൂബ് തങ്ങളുടെ പ്ലാറ്റ്‌ഫോമുകളിൽ പുതിയ ലേബലിംഗ് സംവിധാനം അവതരിപ്പിച്ചു. എഐ ഉപയോഗിച്ച് നിർമ്മിച്ച പാട്ടുകൾ ഏതൊക്കെയെന്ന് ശ്രോതാക്കൾക്ക് എളുപ്പത്തിൽ മനസ്സിലാക്കാനും ഡിജിറ്റൽ രംഗത്ത് സുതാര്യത ഉറപ്പാക്കാനുമാണ് കമ്പനി ഇത്തരമൊരു നടപടി സ്വീകരിച്ചിരിക്കുന്നത്.
കമ്പനിയുടെ ഔദ്യോഗിക ബ്ലോഗ് പോസ്റ്റ് അനുസരിച്ച്, എഐ ഗാനങ്ങൾ തിരിച്ചറിയാൻ ശ്രോതാക്കൾ തങ്ങളോട് ആവശ്യപ്പെട്ട പശ്ചാത്തലത്തിലാണ് ഈ മാറ്റമെന്ന് യൂട്യൂബ് വ്യക്തമാക്കി. എഐ ടൂളുകൾ ഉപയോഗിച്ച് പൂർണ്ണമായോ അല്ലെങ്കിൽ പ്രധാനമായോ നിർമ്മിച്ച പാട്ടുകളിലാണ് ഈ ലേബലുകൾ പതിക്കുക. ബുധനാഴ്ച മുതൽ 'യൂട്യൂബ് മ്യൂസിക്' പ്ലാറ്റ്‌ഫോമിൽ ഈ ലേബലുകൾ ദൃശ്യമായിത്തുടങ്ങിയിട്ടുണ്ട്, ഇത് വൈകാതെ തന്നെ പ്രധാന യൂട്യൂബ് ആപ്പിലേക്കും വ്യാപിപ്പിക്കും.
യൂട്യൂബിന്റെ സ്വന്തം ഡിറ്റക്ഷൻ ടൂളുകൾ വഴിയും അവരുടെ മ്യൂസിക് പാർട്ണർമാർ നൽകുന്ന വിവരങ്ങളുടെ അടിസ്ഥാനത്തിലുമായിരിക്കും പാട്ടുകൾ എഐ നിർമ്മിതമാണോ എന്ന് കണ്ടെത്തുക. ആപ്പിൾ മ്യൂസിക്, സ്‌പോട്ടിഫൈ, ടൈഡൽ തുടങ്ങിയ പ്രമുഖ മ്യൂസിക് സ്ട്രീമിംഗ് പ്ലാറ്റ്‌ഫോമുകളും എഐ ഗാനങ്ങളെ പ്രത്യേകം തരംതിരിക്കാനുള്ള നടപടികളുമായി മുന്നോട്ട് പോകുന്നതിനിടയിലാണ് യൂട്യൂബിന്റെയും ഈ പുതിയ പ്രഖ്യാപനം വരുന്നത്.
കൂടാതെ, സംഗീത വ്യവസായ രംഗത്തെ പ്രമുഖ സംഘടനകളായ RIAA, ഗ്രാമീസ്, SAG-AFTRA എന്നിവരടങ്ങുന്ന കൂട്ടായ്മയും എഐ ഗാനങ്ങൾക്ക് കൃത്യമായ ലേബലുകൾ നൽകണമെന്ന് നേരത്തെ ആവശ്യപ്പെട്ടിരുന്നു. ആർട്ടിസ്റ്റുകളുടെ പകർപ്പവകാശ സംരക്ഷണത്തിനും വ്യാജ ഉള്ളടക്കങ്ങൾ തടയുന്നതിനും ഈ പുതിയ മാറ്റം ഏറെ സഹായകരമാകുമെന്നാണ് വിലയിരുത്തപ്പെടുന്നത്.
Content Highlights: YouTube has introduced a new labelling system to help users identify songs created using artificial intelligence (AI). The labels are intended to improve transparency and make it easier for listeners to recognize AI-generated music.
