LIVE TV
രാജ്യത്തെ ഏറ്റവും വലിയ പൊതുമേഖലാ ബാങ്കായ സ്റ്റേറ്റ് ബാങ്ക് ഓഫ് ഇന്ത്യ (SBI) ഈ വർഷം 1,500 പ്രൊബേഷണറി ഓഫീസർമാരെ (PO )
നിയമിക്കുന്നതിനുള്ള റിക്രൂട്ട്മെന്റ് നടപടികൾ ആരംഭിച്ചു. ബാങ്കിന്റെ ഔദ്യോഗിക വിജ്ഞാപനമനുസരിച്ച്, ഓൺലൈൻ അപേക്ഷകൾ സ്വീകരിച്ചുതുടങ്ങിയിട്ടുണ്ട്. ജൂലൈ 8 വരെയാണ് അപേക്ഷ സമർപ്പിക്കാനുള്ള അവസാന തീയതി.
അംഗീകൃത സർവകലാശാലയിൽ നിന്ന് ഏതെങ്കിലും വിഷയത്തിൽ ബിരുദം നേടിയവർക്ക് അപേക്ഷിക്കാം. അവസാന വർഷ ബിരുദ വിദ്യാർഥികൾക്കും നിബന്ധനകൾക്ക് വിധേയമായി അപേക്ഷിക്കാൻ അവസരമുണ്ട്. എന്നാൽ നിയമന സമയത്ത് ബിരുദം വിജയകരമായി പൂർത്തിയാക്കിയതിന്റെ രേഖ ഹാജരാക്കണം.
ഉദ്യോഗാർഥികളുടെ പ്രായം 2026 ഏപ്രിൽ 1-നുള്ള കണക്കുപ്രകാരം 21 വയസ്സ് പൂർത്തിയായിരിക്കണം. പരമാവധി പ്രായം 30 വയസാണ്. എസ്.സി., എസ്.ടി., ഒ.ബി.സി. ഉൾപ്പെടെയുള്ള സംവരണ വിഭാഗങ്ങൾക്ക് കേന്ദ്ര സർക്കാർ ചട്ടങ്ങൾ അനുസരിച്ചുള്ള വയസിളവുകൾ ലഭിക്കും. മൂന്ന് ഘട്ടങ്ങളിലായാണ് തിരഞ്ഞെടുപ്പ് നടക്കുക. ആദ്യഘട്ടത്തിൽ പ്രിലിമിനറി ഓൺലൈൻ പരീക്ഷ നടത്തും. ഇതിൽ വിജയിക്കുന്നവർക്ക് മെയിൻസ് പരീക്ഷ എഴുതാൻ അവസരം ലഭിക്കും. തുടർന്ന് സൈക്കോമെട്രിക് ടെസ്റ്റ്, ഗ്രൂപ്പ് എക്സർസൈസ്, വ്യക്തിഗത അഭിമുഖം എന്നിവയുടെ അടിസ്ഥാനത്തിലാണ് അന്തിമ മെറിറ്റ് പട്ടിക തയ്യാറാക്കുക. പ്രിലിമിനറി പരീക്ഷ യോഗ്യത നിർണയിക്കാൻ മാത്രമായതിനാൽ അതിലെ മാർക്ക് അന്തിമ റാങ്കിങ്ങിൽ പരിഗണിക്കില്ല.
തിരഞ്ഞെടുക്കപ്പെടുന്നവർ ജൂനിയർ മാനേജ്മെന്റ് ഗ്രേഡ് സ്കെയിൽ–I വിഭാഗത്തിൽ പ്രൊബേഷണറി ഓഫീസർമാരായി നിയമിക്കപ്പെടും. ആരംഭ അടിസ്ഥാന ശമ്പളം 48,480 ആയിരിക്കും. ഇതിന് പുറമെ ക്ഷാമബത്ത (DA), വീട് വാടക അലവൻസ് (HRA), മെഡിക്കൽ ആനുകൂല്യങ്ങൾ, പെൻഷൻ പദ്ധതികൾ, മറ്റ് സേവനാനുകൂല്യങ്ങൾ എന്നിവയും ലഭിക്കും. മുംബൈ പോലുള്ള നഗരങ്ങളിൽ ആകെ വാർഷിക ശമ്പള പാക്കേജ് ഏകദേശം 22 ലക്ഷം വരെ എത്താമെന്നാണ് ബാങ്കിന്റെ വിലയിരുത്തൽ.
ജനറൽ, ഒ.ബി.സി., ഇ.ഡബ്ല്യു.എസ്. വിഭാഗങ്ങളിലെ ഉദ്യോഗാർഥികൾക്ക് അപേക്ഷാഫീസ് 750 രൂപയാണ്. എസ്.സി., എസ്.ടി., ഭിന്നശേഷിക്കാർ എന്നിവർക്ക് അപേക്ഷാഫീസ് നൽകേണ്ടതില്ല. അപേക്ഷകർ എസ്ബിഐയുടെ ഔദ്യോഗിക കരിയർ പോർട്ടൽ വഴി രജിസ്റ്റർ ചെയ്ത് ഫോട്ടോ, ഒപ്പ്, ആവശ്യമായ സർട്ടിഫിക്കറ്റുകൾ എന്നിവ അപ്ലോഡ് ചെയ്തശേഷം അപേക്ഷ സമർപ്പിക്കണം. പരീക്ഷാ തീയതികളും അഡ്മിറ്റ് കാർഡ് സംബന്ധിച്ച വിവരങ്ങളും പിന്നീട് ബാങ്ക് ഔദ്യോഗികമായി പ്രസിദ്ധീകരിക്കും.
ബാങ്കിങ് മേഖലയിലെ ഏറ്റവും മത്സരാധിഷ്ഠിതമായ നിയമനങ്ങളിൽ ഒന്നാണ് എസ്ബിഐ പി.ഒ റിക്രൂട്ട്മെന്റ്. മികച്ച ശമ്പളവും വേഗത്തിലുള്ള കരിയർ വളർച്ചയും രാജ്യത്തുടനീളമുള്ള നിയമനാവസരവുമാണ് ഈ തസ്തികയെ ഉദ്യോഗാർഥികൾക്കിടയിൽ ഏറെ ജനപ്രിയമാക്കുന്നത്.
Content Highlights: SBI Announces 1,500 PO Vacancies; Salary Package Up to ₹22 Lakh
