LIVE TV
ന്യൂഡല്‍ഹി: കേന്ദ്ര സാമൂഹിക സുരക്ഷാ പദ്ധതികളുടെ പേരുമാറ്റി കേന്ദ്രസര്‍ക്കാര്‍. ഇന്ദിരാഗാന്ധി പെന്ഷന് പദ്ധതികള്‍ക്ക് പുതിയ പേരുകള്‍ നിര്‍ദേശിച്ചു. പ്രധാനമന്ത്രി നരേന്ദ്ര മോദിയുടെ അധ്യക്ഷതയില്‍ ചേര്‍ന്ന കേന്ദ്ര മന്ത്രിസഭാ യോഗത്തിലാണ് പേരുകള്‍ മാറ്റാന്‍ അംഗീകാരം നല്‍കിയത്. ദേശീയ സാമൂഹിക സഹായ പദ്ധതിയുടെ പേരും ഇന്ദിരാഗാന്ധിയുടെ പേരിലുള്ളതുള്‍പ്പെടെ വിവിധ ഉപപദ്ധതികളുടെ പേരുകളും മാറ്റാനാണ് അംഗീകാരം.
ഇന്ദിരാഗാന്ധിയുടെ പേരിലുള്ള വാര്‍ധക്യ, വിധവാ, ഭിന്നശേഷി പെന്‍ഷനുകള്‍ക്ക് ഇനി പ്രധാനമന്ത്രിയുടെ പേരുകളാണ് നല്‍കുക. ദേശീയ കുടുംബ ആനുകൂല്യ പദ്ധതിക്കും പേരുമാറ്റും. 2026-27 മുതല്‍ 2030-31 വരെയുള്ള അഞ്ച് വര്‍ഷത്തേക്ക് ദേശീയ സാമൂഹിക സഹായ പദ്ധതി തുടരാനും മന്ത്രിസഭ അംഗീകാരം നല്‍കി. ഇതിനായി ആകെ 53,428 കോടി രൂപയും കേന്ദ്രസര്‍ക്കാര്‍ വകയിരുത്തിയിരുത്തി.
ദേശീയ സാമൂഹിക സഹായ പദ്ധതിക്ക് പ്രധാന്‍ മന്ത്രി സാമൂഹിക് സഹായത യോജന എന്ന് പുനര്‍നാമകരണം ചെയ്യും. ഇന്ദിരാഗാന്ധി ദേശീയ വാര്‍ധക്യകാല പെന്ഷന് പദ്ധതിക്ക് പ്രധാന്‍ മന്ത്രി വൃദ്ധാവസ്ഥ പെന്ഷന് യോജന എന്നും ഇന്ദിരാഗാന്ധി ദേശീയ വിധവാ പെന്ഷന് പദ്ധതിക്ക് പ്രധാന്‍ മന്ത്രി വിധവാ പെന്ഷന് യോജന എന്നും ഇന്ദിരാഗാന്ധി ദേശീയ ഭിന്നശേഷി പെന്ഷന് പദ്ധതിക്ക് പ്രധാന്‍ മന്ത്രി ദിവ്യാംഗ്ജന്‍ പെന്ഷന് യോജന എന്നും പുനര്‍നാമകരണം ചെയ്യും. ദേശീയ കുടുംബ ആനുകൂല്യ പദ്ധതിക്ക് പ്രധാന്‍ മന്ത്രി പരിവാര്‍ ലാഭ് യോജന എന്നുമാണ് പേര് നല്‍കുക.
ഭിന്നശേഷി പെന്ഷന് പദ്ധതിയുടെ മാനദണ്ഡത്തില്‍ കേന്ദ്രസര്‍ക്കാര്‍ ഇളവ് വരുത്തിയിട്ടുണ്ട്. നേരത്തെ 80 ശതമാനം വൈകല്യമുള്ളവര്‍ക്കായിരുന്നു ഭിന്നശേഷി പെന്ഷന് അനുവദിച്ചിരുന്നത്. ഇനിമുതല്‍ നാല്‍പത് ശതമാനം വൈകല്യമുള്ളവര്‍ക്കും പെന്ഷന് അര്‍ഹതയുണ്ടെന്ന് കേന്ദ്രസര്‍ക്കാര്‍ അറിയിച്ചു. ജനിക്കുന്ന അന്നുമുതല്‍ ഭിന്നശേഷി പെന്ഷന് അര്‍ഹതയുണ്ടാകും.
Content Highlights: The Central Government has renamed social welfare pension schemes named after former Prime Minister Indira Gandhi, including old-age, widow and disability pensions, under new Pradhan Mantri titles
