LIVE TV
ചെന്നൈ: വിദ്യാര്ത്ഥി സമരങ്ങളില് യു ടേണ് എടുത്ത് വിജയ് സര്ക്കാര്. സമരങ്ങളിലും പ്രക്ഷോഭ പരിപാടികളിലും വിദ്യാര്ത്ഥികള് പങ്കെടുക്കുന്നത് തടയാനാണ് സര്ക്കാര് തീരുമാനം. ഇത് സംബന്ധിച്ച് സകൂള് വിദ്യാഭ്യാസ - ഉന്നത വിദ്യാഭ്യാസ വകുപ്പുകള്ക്കും പൊലീസിനും ജില്ലാ ഭരണകൂടങ്ങള്ക്കും സര്ക്കാര് നിര്ദേശം നല്കി. വിദ്യാര്ത്ഥികള് പ്രക്ഷോഭങ്ങളില് പങ്കെടുക്കുന്നത് തടയാന് ആവശ്യമായ മുന് കരുതലുകളും നടപടികളും സ്വീകരിക്കണം എന്നാണ് സര്ക്കാരിന്റെ ഔദ്യോഗിക നിര്ദേശം.
കോളേജ് വിദ്യാഭ്യാസ വകുപ്പ് പുറത്തിറക്കിയ നിര്ദേശം ഇടത് വിദ്യാര്ത്ഥി സംഘടനകളേയും കോക്രോച്ച് ജനതാ പാര്ട്ടിയേയും ലക്ഷ്യമിട്ടുള്ളതാണെന്നാണ് വിലയിരുത്തല്. വിദ്യാര്ത്ഥി പ്രക്ഷോഭങ്ങളെ നേരിടാന് എടുത്ത മുന് കരുതലുകളെ കുറിച്ച് റിപ്പോര്ട്ട് സമര്പ്പിക്കാനും ജില്ലാ ഭരണകൂടങ്ങള്ക്ക് നിര്ദേശം നല്കിയിട്ടുണ്ട്.
ഈ നിര്ദ്ദേശത്തിന് പിന്നാലെ സിജെപി കടുത്ത വിമര്ശനമാണ് ഉയര്ത്തിയിരിക്കുന്നത്. വിജയ് സര്ക്കാരിന്റെ നടപടി ഭരണഘടനാവിരുദ്ധമാണെന്നും യുക്തിരഹിതവും അശാസ്ത്രീയവുമായ നടപടിയാണ് ഇതെന്നും സംഘടനയുടെ ദേശീയ വക്താവ് സൗരവ് ദാസ് കുറ്റപ്പെടുത്തി. എന്നാല് ബിജെപി ഇതിനെ പിന്തുണക്കുന്ന സ്ഥിതിയാണുണ്ടായത്. സിജെപിയെയും ഇടതുപക്ഷ സംഘടനകളെയും 'അരാജകത്വത്തിന്റെ വക്താക്കള്' എന്നാണ് ബിജെപി നേതാവ് വിനേജ് പി സെല്വം അധിക്ഷേപിച്ചത്.
തമിഴ്നാട്ടില് സര്ക്കാര് രൂപീകരണത്തിന് ആവശ്യമായ അംഗബലം ഉറപ്പാക്കാന് സഹായിക്കുന്നതിനായി, ജൂണ് മാസത്തില് വിജയ്യുടെ ടിവികെക്ക് ഇടതുപക്ഷ പാര്ട്ടികള് ഉപാധികളില്ലാത്ത പുറത്തുനിന്നുള്ള പിന്തുണ നല്കിയിരുന്നു എന്നത് ശ്രദ്ധേയമാണ്. തമിഴ്നാട് നിയമസഭാ തെരഞ്ഞെടുപ്പില് ഏറ്റവും വലിയ ഒറ്റക്കക്ഷിയായി ടിവികെ ഉയര്ന്നുവന്നെങ്കിലും കേവല ഭൂരിപക്ഷം ലഭിച്ചിരുന്നില്ല. അതിനാല്, സഭയിലെ വിശ്വാസവോട്ടെടുപ്പ് വിജയിക്കാന് കോണ്ഗ്രസ്, വിസികെ തുടങ്ങിയ ചെറിയ പാര്ട്ടികളുടെ പിന്തുണയെ ആശ്രയിക്കേണ്ടി വന്നിരുന്നു. ഇടത് പാര്ട്ടികളുടെ അടക്കം പിന്തുണ ഉള്ള സര്ക്കാരില് നിന്നുണ്ടായ നടപടിയില് വലിയ വിമര്ശനങ്ങള് ഇനിയും ഉണ്ടാകുമെന്നാണ് വിലയിരുത്തല്.
Content Highlights: The Vijay government has directed school and higher education departments, police and district administrations to take measures to prevent students from participating in protests and agitations. The government has also instructed authorities to take necessary precautionary steps regarding student participation in such programmes.
