LIVE TV
കൊച്ചി: നെടുമ്പാശേരിയില്‍ മൂന്നു പേരുടെ മരണത്തിനിടയാക്കിയ അപകടത്തില്‍ പ്രതിക്കെതിരെ ശക്തമായ നടപടി സ്വീകരിക്കണമെന്ന് ആവശ്യപ്പെട്ട് അപകടത്തില്‍ മരിച്ച ഗോപികയുടെ കുടുംബം. ഗോപികയുടെ അച്ഛന്റെ സഹോദരനാണ് ഫേസ് ബുക്ക് പോസ്റ്റ് പങ്കുവെച്ച് രംഗത്തെത്തിയത്. പൊലീസിനെതിരെ വിമര്‍ശനവുമായാണ് പിതൃസഹോദരൻ്റെ പ്രതികരണം. സ്വാധീനം ഉപയോഗിച്ചാണ് പ്രതിയെ ജുവനൈല്‍ ഹോമിലേക്ക് വിടാനുള്ള തീരുമാനം കൈക്കൊണ്ടതെന്നാണ് കുടുംബത്തിന്റെ ആരോപണം. മുഖ്യമന്ത്രിക്കും ആഭ്യന്തര മന്ത്രിക്കും ഞങ്ങളുടെ സംശയങ്ങള്‍ മാറ്റാന്‍ കഴിയുമോയെന്നും കുടുംബം ചോദിക്കുന്നുണ്ട്.
ഞായറാഴ്ച പുലര്‍ച്ചെ പന്ത്രണ്ടരയോടെയാണ് മദ്യലഹരിയില്‍ സുഹൈല്‍ സജീവ് ഓടിച്ച മിനി കൂപ്പര്‍ കാര്‍ മൂന്നുപേര്‍ സഞ്ചരിച്ചിരുന്ന സ്‌കൂട്ടറില്‍ ഇടിച്ചത്. വയനാട് സ്വദേശി ദേവിക, പാലക്കാട് സ്വദേശി ഗോപിക, കര്‍ണാടക സുള്ള്യ സ്വദേശി ഇയാസ് എന്നിവര്‍ അപകടത്തിൽ തല്‍ക്ഷണം മരിച്ചിരുന്നു. തൃക്കാക്കര കരകൗശല വില്‍പനശാലയില്‍ പാര്‍ട്ട് ടൈം ജോലി ചെയ്യുന്നവരായിരുന്നു മരിച്ച മൂന്ന് വിദ്യാര്‍ത്ഥികളും. സ്ഥാപനത്തിലെ സഹപ്രവര്‍ത്തകര്‍ക്കൊപ്പം രാത്രിയില്‍ ചായ കുടിച്ച് മടങ്ങിവരവെയാണ് അപകടമുണ്ടായത്.
നെടുമ്പാശ്ശേരിയിലേക്കുള്ള യാത്രയില്‍ യുവാവ് മൂന്ന് ബാറുകളില്‍ക്കയറി മദ്യപിച്ചിരുന്നു. ഇതിന്റെ വീഡിയോയും മൊബൈലില്‍ ചിത്രീകരിച്ചു. സുഹൃത്തിനെ വിമാനത്താവളത്തില്‍ നിന്ന് കൂട്ടിക്കൊണ്ടുപോകാനാണ് പ്രതിയെത്തിയത്. വിമാനം എത്തുന്ന സമയം 2.40 ആയതിനാല്‍ വീണ്ടും ബാറുകളില്‍ പോയി മദ്യപിച്ചു. 19കാരനായ പ്രതിക്ക് നിയമവിരുദ്ധമായി മദ്യം നല്‍കിയതിന് മൂന്ന് ബാറുകൾക്ക് എതിരെ എക്സൈസ് കേസെടുത്തിട്ടുണ്ട്. കോര്‍ട്ട് യാര്‍ഡ് ബൈ മാരിയറ്റ് ബാര്‍ ഹോട്ടലിനെതിരെയാണ് ആദ്യം കേസെടുത്തത്. പിന്നാലെ വൈറ്റിലയിലെ ദയ, പാലാരിവട്ടത്തെ മണ്‍സൂണ്‍ എംപ്രസ് എന്നീ ബാറുകള്‍ക്കെതിരെയും കേസെടുത്തു. മൂന്ന് ബാറുകളിലും പ്രതി എത്തുന്നതും മദ്യപിച്ചതും എക്സൈസ് സ്ഥിരീകരിച്ചിട്ടുണ്ട്. സിസിടിവി ദൃശ്യങ്ങളില്‍ ഇക്കാര്യം വ്യക്തമാണെന്നും എക്സൈസ് പ്രതികരിച്ചു. ഇവരുടെ ലൈസന്‍സ് റദ്ദാക്കുന്നതും പരിഗണനയിലാണ്. കേരള അബ്കാരി നിയമപ്രകാരം 23 വയസാണ് മദ്യം വാങ്ങുന്നതിനുള്ള പ്രായപരിധി.
ഫേസ്ബുക്ക് പോസ്റ്റിൻ്റെ പൂർണ്ണ രൂപം
പ്രിയമുള്ളവരേ, എന്റെ അനിയന്‍ എം. ആര്‍. പ്രദീപ് കുമാറിന്റെ മൂത്ത മകള്‍ ഗോപിക നെടുമ്പാശ്ശേരിയില്‍ വെച്ച് 4 പ്രതികള്‍ അത്യധികം മദ്യപിച്ച് ഉണ്ടാക്കിയ വാഹനാപകടത്തില്‍ മരിച്ച വിവരം നിങ്ങളെല്ലാം അറിഞ്ഞിരിക്കുമല്ലോ. എന്റെ സ്വന്തം സംഹാദരന്റെ മകളാണ്. എനിക്ക് സ്വന്തം മകളെ പോലെയാണ് അവളും. രാത്രി 2 മണിക്ക് അവളും മറ്റു സുഹൃത്തുക്കളും ചേര്‍ന്ന് നെടുമ്പാശ്ശേരി എയര്‍പോര്‍ട്ട് ഭാഗത്തു നിന്ന്, നൈറ്റ് ഷിഫ്റ്റിലുള്ള പാര്‍ട്ട്‌ടൈം ജോലി കഴിഞ്ഞ് ഭക്ഷണം കഴിച്ച് സ്വന്തം താമസ സ്ഥലത്തേക്ക് മടങ്ങുമ്പോഴാണ് ഈ നരഹത്യ നടന്നത്.
എന്റെ സഹോദരന്‍ ഒരു ഓട്ടോ റിക്ഷ തൊഴിലാളിയാണ്. വളരെ പാവപ്പെട്ട കര്‍ഷക തൊഴിലാളി കുടുംബത്തില്‍ ജനിച്ച് വളര്‍ന്ന സാധാരണക്കാരായ മാതാപിതാക്കളുടെ മക്കളാണ് ഞങ്ങള്‍. കൂലിപ്പണി ചെയ്തും ടെയ്‌ലറിങ്ങ് നടത്തിയും ചായക്കട നടത്തിയും ഒക്കെയാണ് ഞങ്ങള്‍ പഠിച്ചതും ജോലി കണ്ടെത്തിയതും. എന്റെ സഹോദരന്റെ മകള്‍ ഗോപിക ആഇഅ പാസ്സായതും പിന്നീട് ഡാറ്റാ അനലിറ്റിക്‌സ് കോഴ്‌സ് പാസായതും നൈറ്റ് ഷിഫ്റ്റില്‍ ജോലി ചെയ്ത് കിട്ടുന്ന കാശുകൊണ്ടാണ്. തുടര്‍ പഠനത്തിനുള്ള പണം കണ്ടെത്താനും ഓട്ടോ തൊഴിലാളിയായ അച്ഛനെ ബുദ്ധിമുട്ടിക്കാതിരിക്കാനുമാണ് എന്റെ കുട്ടി അവള്‍ പഠിച്ച സ്ഥാപനത്തിനോട് ചേര്‍ന്ന ഒരു ആന്റിക് ഷോപ്പില്‍ , അവളുടെ ദീര്‍ഘകാല സുഹൃത്തുക്കളോടൊപ്പം മാതാപിതാക്കളുടെ അറിവോടെയും സമ്മതത്തോടെയും ജോലി ചെയ്തുവരുന്നത്. വീക്കെന്‍ഡ് ആയതിനാല്‍ എയപ്പോര്‍ട്ടിനോടു ചേര്‍ന്നുള്ള ഫുഡ് കോര്‍ട്ടില്‍ നിന്ന് ഭക്ഷണം കഴിച്ച് ഹേം സ്റ്റേയിലേക്ക് മടങ്ങവെയാണ് കൊലയാളി ഞങ്ങളുടെ കുട്ടിയെ അടക്കം മൂന്ന് പേരെ കൊലപ്പെടുത്തിയത്. അതിന്റെ സി.സി.ടി.വി. ദൃശ്യങ്ങള്‍ അടക്കം എണ്ണമറ്റ നിരവധി തെളിവുകളും മെഡിക്കല്‍ റിപ്പോര്‍ട്ടുകളും മറ്റ് ഡിജിറ്റല്‍ തെളിവുകളും പുറത്തു വന്നു കഴിഞ്ഞു.
പ്രതി അമിത മദ്യപനായിരുന്നു എന്ന് സി.ഐ അടക്കമുള്ള ഉദ്യോഗസ്ഥര്‍ മാധ്യമങ്ങളോടും എന്നോടും എറ്റവും അനുഭാവത്തോടെ വെളിപ്പെടുത്തിയതുമാണ്. പ്രതി നാട്ടുകാരോട് വാപ്പ രക്ഷിച്ചോളും എന്ന് വീരവാദം പറഞ്ഞതും സാക്ഷിമൊഴികളായി നമ്മള്‍ കണ്ടതാണ്. വലിയ കോടീശ്വരന്മാരായ മാതാപിതാക്കളുടെ മകനും കൂട്ടുകാരുമാണ് പ്രതികള്‍. മകനെയും കൂട്ടുപ്രതികളെയും രക്ഷിക്കാര്‍ ലക്ഷങ്ങള്‍ അവര്‍ വാരിവിതറുമെന്ന് ഞങ്ങള്‍ക്ക് ഉറപ്പാണ്. മലയാളത്തിലെ ഒരു വിഖ്യാത നടിക്ക് നീതി വാങ്ങിക്കൊടുക്കാന്‍ കഴിയാതിരുന്ന അതേ പ്രദേശത്താണ് ഈ നരഹത്യയും നടന്നിട്ടുള്ളത്. എന്നിട്ട് അതിലെ പ്രതിയെ ജാമ്യമില്ലാത്ത വകുപ്പ് ചുമത്തി ലോക്കപ്പിലടക്കുന്നതിനു പകരം പാലൂട്ടാന്‍ ജുവനൈല്‍ ഹോമിലേക്ക് വിടാനാണ് ഭാവമെങ്കില്‍ ഈ നാട്ടിലെ നീതിന്യായ വ്യവസ്ഥയെ പറ്റി സംശയമുണ്ടാകും.ഭരണകൂടത്തിന്റെ പിന്തുണയോടെ കോടീശ്വരന്‍ എറിഞ്ഞു പിടിച്ച് കീശയിലിടുന്നതാണോ നീതി എന്ന് ഓരോ സാധാരണ മലയാളിയും സംശയിക്കേണ്ടി വരും.
കേരളം ഭരിക്കുന്ന മുഖ്യമന്ത്രി ശ്രീ വി.ഡി. സതീശനും ആഭ്യന്തര വകുപ്പ് മന്ത്രി ശ്രീ രമേശ് ചെന്നിത്തലക്കും സംസ്ഥാന ഡി.ജി.പിക്കും ഈ സംശയം ദൂരീകരിക്കാന്‍ വല്ല നൈതിക ബാധ്യതയും സ്വീകരിക്കാനുണ്ടോ എന്ന് ഉത്തരവാദിത്തപ്പെട്ട ഒരു ബന്ധു എന്ന നിലയില്‍ ചോദിക്കുന്നു. എന്തിനാണ് ഒരു പബ്ലിക് പ്രോസിക്യൂട്ടറെ സര്‍ക്കാര്‍ ശമ്പളം കൊടുത്ത് വെച്ചിരിക്കുന്നത് എന്ന സംശയത്തിനും ഉത്തരം കിട്ടണം. നീതിക്ക് നിങ്ങള്‍ വല്ല വിലയും കല്‍പിക്കുന്നുണ്ടെങ്കില്‍ മറുപടി തരണം
Content Highlights: The family of Gopika, who died in the Nedumbassery accident that claimed three lives, has demanded strict action against the accused.
