LIVE TV
കൊച്ചി: നടിയെ ആക്രമിച്ച കേസിന്റെ തുടര് നടത്തിപ്പിനും നിയമപോരാട്ടങ്ങള്ക്കുമായി ധനശേഖരണത്തിന് ആഹ്വാനം ചെയ്ത് വിമന് ഇന് സിനിമ കളക്ടീവ് (ഡബ്ല്യുസിസി). സമാനമനസ്കരായ ആളുകള് ചേര്ന്ന് രൂപീകരിച്ച 'അവള്ക്കൊപ്പം ലീഗല് സപ്പോര്ട്ട് ട്രസ്റ്റ്' എന്ന കൂട്ടായ്മയിലേക്കാണ് ഡബ്ല്യുസിസി ഇപ്പോള് സംഭാവന ക്ഷണിച്ചിരിക്കുന്നത്.
അപൂര്വ്വത്തില് അപൂര്വ്വം എന്ന് വിശേഷിപ്പിക്കാവുന്ന ഈ കേസില് പൊതു സമൂഹത്തിന്റെ ഭാഗത്ത് നിന്ന് അതിജീവിതയ്ക്ക് ഒരു കൈത്താങ്ങ് നല്കേണ്ടത് ആവശ്യമാണെന്നും അതിജീവിത ഒറ്റയ്ക്ക് പോരാടുന്നതിന് പകരം നമ്മള് അവരോട് ഒത്തുചേര്ന്ന് പോരാടുകയാണ് വേണ്ടതെന്ന് തിരിച്ചറിഞ്ഞാണ് ട്രസ്റ്റിന് രൂപം നല്കിയതെന്നും ഡബ്ല്യൂസിസി അറിയിച്ചു.
നടിയെ ആക്രമിച്ച കേസിലെ നിയമയുദ്ധത്തിന് സാമ്പത്തിക ചെലവുകള് വളരെ കൂടുതലാണ്. ട്രസ്റ്റിന്റെ അക്കൗണ്ടിലേക്ക് വരുന്ന പണം കേസിന്റെ നടത്തിപ്പിനായി മാത്രമെ ഉപയോഗിക്കുകയുള്ളൂ. കേസില് നീതി വിജയിക്കേണ്ടത് അതിജീവിതയുടെ മാത്രമല്ല, നമ്മള് ഓരോരുത്തരുടേയും ആവശ്യമാണെന്നും അത് ഉള്ക്കൊള്ളണമെന്നും ഡബ്ല്യൂസിസി അഭ്യര്ത്ഥിക്കുന്നു.
സ്ത്രീകള്ക്കെതിരായ അതിക്രമങ്ങളില് നിയമപരമായ പോരാട്ടം നടത്തുന്ന അതിജീവിതമാര്ക്ക് പിന്തുണ നല്കുകയെന്നതാണ് ട്രസ്റ്റിന്റെ ലക്ഷ്യം. കൃത്യമായ മാനദണ്ഡങ്ങളുടെ അടിസ്ഥാനത്തിലാണ് അതിജീവിതമാരെ ട്രസ്റ്റ് തെരഞ്ഞെടുക്കുക. അത്തരത്തില് ട്രസ്റ്റ് തെരഞ്ഞെടുക്കുന്ന ആദ്യ പോരാട്ടമാണ് കേസിലേതെന്നും ഡബ്ല്യൂസിസി അറിയിച്ചു.
Content Highlights: actress attack case WCC calls for fundraising
