Get the latest news at
your fingertips!
Download our app now
LIVE TV
Search
കൊച്ചി: ബാറുകളുടെ പ്രവർത്തന സമയം വർധിപ്പിച്ച സർക്കാർ തീരുമാനം പിൻവലിക്കണമെന്ന ആവശ്യവുമായി കെസിബിസി മദ്യവിരുദ്ധ സമിതി. ബാറുകളുടെ സമയം വര്ധിപ്പിച്ച തീരുമാനം അടിയന്തിരമായി പിന്വലിക്കണമെന്നാണ് കെസിബിസി മദ്യവിരുദ്ധ സമിതി സംസ്ഥാന കമ്മറ്റിയുടെ ആവശ്യം. നിയമസഭ തെരഞ്ഞെടുപ്പ് പ്രഖ്യാപിക്കാന് ദിവസങ്ങള് മാത്രം അവശേഷിക്കേ ബാറുകളുടെ സമയം വര്ധിപ്പിച്ചതുള്പ്പെടെയുള്ള മിന്നല് വേഗതയിലുള്ള നയം മാറ്റം തെരഞ്ഞെടുപ്പ് ഡീലായി പൊതുസമൂഹം കണ്ടാല് കുറ്റംപറയാനാവില്ലെന്ന് കെസിബിസി മദ്യവിരുദ്ധ സമിതി പറഞ്ഞു.
മുന്നണിയിലും മന്ത്രിസഭയിലും പോലും കൂടിയാലോചിക്കാതെ അബ്കാരി പ്രീണന നയം സ്വീകരിച്ചു. ആ പണത്തിന് വേണ്ടി നയം മാറ്റിയവർ 'മദ്യം അത് പാമ്പിനെപ്പോലെ കൊത്തുകയും, അണലിയെപ്പോലെ കടിക്കുകയും ചെയ്യുമെന്ന' ബൈബിള് വാക്യം ഓര്മ്മയില് വയ്ക്കുന്നത് ഉചിതമായിരിക്കും. കേരളം മയക്കുമരുന്നുകളുടെ ഹബ്ബായി മാറിയിട്ടുണ്ട്. അവിടെ എരിതീയില് എണ്ണയൊഴിക്കുന്ന'ത് പോലെ മദ്യശാലകളുടെ എണ്ണം വർധിപ്പിച്ചും സമയം വര്ധിപ്പിച്ചും സാധാരണ ജനത്തെ വേട്ടയാടരുത്.
വിനോദസഞ്ചാരികളുടെ മറവില് മദ്യവില്പന വ്യാപകമാക്കാന് സര്ക്കാര് ശ്രമിക്കേണ്ട. വിനോദസഞ്ചാരികള് കേരളത്തിലെത്തുന്നത് നാട്ടിലെ ചളുക്ക് ബ്രാണ്ടി കുടിക്കാനല്ല, പ്രകൃതിഭംഗി ആസ്വദിക്കാനാണ്. മദ്യത്തിന്റെ ലഭ്യത കുറവുകൊണ്ടല്ല വിനോദസഞ്ചാരികളുടെ എണ്ണത്തില് കുറവ് വന്നിരിക്കുന്നത്. മറിച്ച് മയക്കുമരുന്ന് ഉപയോഗിക്കുന്നവരുടെയും, മദ്യപാനികളുടെയും, തെരുവുനായ്ക്കളുടെയും, വന്യമൃഗങ്ങളുടെയും കടന്നാക്രമണം ഭയന്നാണെന്നും കെസിബിസി പറഞ്ഞു.
ഉദ്ദിഷ്ടകാര്യത്തിന് ഉപകാരസ്മരണ നടത്തിയാല് മദ്യപിച്ചും, മയക്കുമരുന്നുകള് കഴിച്ചും ഭ്രാന്തന്മാരെപ്പോലെ നമ്മുടെ പൊതുജനം അക്രമകാരികളാകും. പുര കത്തുമ്പോള് വാഴവെട്ടുന്ന സമീപനമാണ് തെരഞ്ഞെടുപ്പ് അടുക്കുമ്പോള് സര്ക്കാര് സ്വീകരിച്ചിരിക്കുന്നതെന്നും കെസിബിസി മദ്യവിരുദ്ധ സമിതി അഭിപ്രായപ്പെട്ടു. കേരള കത്തോലിക്കാ സഭ മാര്ച്ച് 8ന് മദ്യലഹരി വിരുദ്ധ ഞായര് ആചരിക്കും. സീറോ മലബാര്-ലത്തീന്-മലങ്കര റീത്തുകളിലെ പള്ളികളില് സഭയുടെ സര്ക്കുലര് വായിക്കുകയും വിവിധ പരിപാടികളോടെ ആചരണം നടത്തുകയും ചെയ്യും.
Content Highlight; KCBC Anti-Liquor Committee demands withdrawal of government decision to extend bars' operating hours
