LIVE TV
ഫുട്ബോള് ലോകകപ്പിന്റെ സെമിഫൈനലില് ഇംഗ്ലണ്ട് അര്ജന്റീനയോട് ഒന്നിനെതിരെ രണ്ട് ഗോളുകള്ക്ക് പരാജയപ്പെട്ടതില് കടുത്ത ദുഖം രേഖപ്പെടുത്തി ഇംഗ്ലണ്ട് ഇതിഹാസം ഡേവിഡ് ബെക്കാം. അതേസമയം, ടൂര്ണമെന്റിലുടനീളം ടീം നടത്തിയ പ്രചോദനാത്മകമായ മുന്നേറ്റത്തെ ബെക്കാം പ്രശംസിച്ചു.
ഇംഗ്ലണ്ടിനെതിരായ വിജയത്തോടെ അര്ജന്റീന ലോകകപ്പ് ഫൈനലില് പ്രവേശിച്ചു. ഞായറാഴ്ച കലാശപ്പോരാട്ടത്തില് സ്പെയിനെ നേരിടും. അതേസമയം, 1966-ന് ശേഷം ആദ്യമായി ലോകകപ്പ് ഫൈനലില് എത്താമെന്ന ഇംഗ്ലണ്ടിന്റെ പ്രതീക്ഷകള് ഇതോടെ അവസാനിച്ചു.
തന്റെ ഇന്സ്റ്റാഗ്രാം പോസ്റ്റിലൂടെയാണ് മുന് ഇംഗ്ലണ്ട് ഫുട്ബോള് താരം തോല്വിയിലുള്ള സങ്കടം പങ്കുവെച്ചത്. എങ്കിലും ടീമിനെയും ആരാധകരെയും രാജ്യത്തെയും അദ്ദേഹം അഭിനന്ദിച്ചു: 'ഇത് നമുക്കെല്ലാവര്ക്കും ഹൃദയഭേദകമായ നിമിഷമാണ്, എങ്കിലും എന്നെന്നും പ്രചോദനം നല്കുന്ന ഓര്മ്മകളാണിത്. ഈ ലോകകപ്പില് ഞങ്ങള്ക്ക് നല്കിയ എല്ലാത്തിനും നമ്മുടെ ടീമിനും ആരാധകര്ക്കും രാജ്യത്തിനും നന്ദി,' -ബെക്കാം കുറിച്ചു.
സെമിഫൈനലിന്റെ അവസാന മിനിറ്റുകളില് ഉജ്ജ്വലമായ തിരിച്ചുവരവ് നടത്തിയാണ് നിലവിലെ ചാമ്പ്യന്മാരായ അര്ജന്റീന ഇംഗ്ലണ്ടിനെ 2-1 ന് തോല്പ്പിച്ചത്. മത്സരത്തിന്റെ ആദ്യ പകുതിയില് ഇരുടീമുകളും മധ്യനിരയില് കനത്ത പോരാട്ടമാണ് കാഴ്ചവെച്ചത്, എന്നാല് കുറഞ്ഞ അവസരങ്ങള് മാത്രമാണ് സൃഷ്ടിക്കാനായത്. ഒടുവില് 55-ാം മിനിറ്റില് മോര്ഗന് റോജേഴ്സിന്റെ ക്രോസില് നിന്ന് ആന്റണി ഗോര്ഡന് ഗോള് നേടി ഇംഗ്ലണ്ടിന് ലീഡ് സമ്മാനിച്ചു. ലീഡ് നേടിയ ശേഷം ഇംഗ്ലണ്ട് പ്രതിരോധത്തിലേക്ക് വലിഞ്ഞതോടെ കളിമാറി. ശക്തമായി തിരിച്ചടിച്ച അര്ജന്റീനയുടെ പല ശ്രമങ്ങളും ജോര്ദാന് പിക്ക്ഫോര്ഡ് മികച്ച സേവുകളിലൂടെ തടഞ്ഞു. അലക്സിസ് മാക് അലിസ്റ്ററിന്റെ ഒരു ഷോട്ട് പോസ്റ്റിലിടിച്ച് മടങ്ങുകയും ചെയ്തു. ഒടുവില് 85-ാം മിനിറ്റില് ലയണല് മെസ്സിയുടെ പാസില് നിന്ന് എന്സോ ഫെര്ണാണ്ടസ് നേടിയ ഗോളിലൂടെ അര്ജന്റീന സമനില പിടിച്ചു.
തുടര്ന്ന് ഇന്ജുറി ടൈമില് മെസ്സി നല്കിയ ക്രോസ് ലൗട്ടാറോ മാര്ട്ടിനസ് ഹെഡ്ഡറിലൂടെ വലയിലാക്കിയതോടെ അര്ജന്റീന വിജയം കുറിച്ചു. അവസാന നിമിഷങ്ങളില് ഇംഗ്ലണ്ട് തിരിച്ചടിക്കാന് ശ്രമിച്ചെങ്കിലും അര്ജന്റീന പ്രതിരോധം കാത്തുസൂക്ഷിച്ചു. ഇനി മൂന്നാം സ്ഥാനത്തിനായുള്ള മത്സരത്തില് ഇംഗ്ലണ്ട് ഫ്രാന്സിനെ നേരിടും. അര്ജന്റീന കിരീടപ്പോരാട്ടത്തില് സ്പെയിനുമായി മാറ്റുരയ്ക്കും.
content highlights: 'This is heartbreaking for all of us', Beckham after the semifinal defeat to Argentina
